Dah page ini (29/8), di ban Cần Thơ hu peih nyaom biai “Jhul tagok bruk ba urang ngak di dom bhum palei gah maraong negar nao ngak bruk di negar langiu tapa Danak dak oh hu kein laba”.  Di  nyaom biai, dom urang lambaok mai meng Cục Khik ramik urang ngak di langiu negar, Pasak ngak bruk di langiu negar, Cục bruk ngak (di Mintri LĐTBXH) ginum biai ka dom jalan ngak piah jhul tagok bruk ba urang ngak nao ngak bruk di negar langiu tapa dom kapul bruk ngak. Ba tabiak dom jalan ngak pambuak cung cầu bruk ngak ka urang ngak hu hatai caong nao ngak bruk di negar langiu; jalan ngak, sarak daong brei masaiy jien ka urang ngak nao ngak bruk di negar langiu… tapa danak dak oh hu kein laba.

Meng bruk jak ba di akaok negar dahlau daih lac ong Trương Tấn Sang, tapa Hội Chữ Thập Đỏ pakat negar Việt Nam, danak dak "Salamat ka urang taong ikan kan kathaot, kan kandah" hu alin hadiah 40 baoh sang salamat, 500 bộ áo phao ka urang taong ikan kan kathaot, jaik si kan kathaot saong padang ngak 3 mbaik tatua palei di tỉnh Bến Tre. Brei panuac pak labik nan, ong Trương Tấn Sang, akaok negar dahlau daih brei thau, danak dak ini piah daong ka urang kan kathaot, urang gaok kan kandah ka sang daok piah hu tani tanat labik daok saong alin hadiah ao phao piah daong ka urang taong ikan sahnang hatai tabiak tasik, cakrok bruk ngak mbang, rik daong khik caga quyền ngak po tasik pulao, taneh ia, palei negar.

Tal puac thun ini, Trà Vinh meda langyah hu bruk sang daok ka dom baoh sang gaok kan kathaot, abih di nyu nan lac sang kan kathaot gaok kan kandah ka sang danaok lac mikva bangsa Khmer. Labaih 2 thun tapa, Ủy ban MT negar Việt Nam dom pakat tỉnh Trà Vinh hu jak ba, daong padang ngak hu labaih 4.400 baoh sang anit ranam jao ka dom baoh sang kan kandah ka sang danaok. Meng akaok thun tal urak ini, tỉnh hu daong 1.375 baoh sang ka sang kan kathaot, sang ka urang praong thun jaik kathaot saong hu jao bloh 903 baoh sang, dom baoh sang daok veik meda hu jao dalam thun ini. Abih tih phun jien daong labaih 60 tỷ đồng, meng Kadung jien An sinh xã hội di tỉnh.

Harei ini (29/8), mBan khik ramik jalan pasei đô thị TPHCM peih bruk nduac iek abih jalan Metro ka 1 (Bến Thành - Suối Tiên). Jalan Metro ka 1 nduac iek abih jalan, tabiak meng ga Bến Thành nao angaok glaong tapa 14 nhà ga, tapa lubang di 3 ga dalam haluk saong labik puac abih lac di ga Suối Tiên blaoh mai veik labik tabiak nao. Danak dak jalan Metro ka 1 hu 17 sruh radaih praong atah, yaok sruh hu 3 toa atah 61 met meteh. Tui padang ngak, labik angaok glaong hu adat brei nduac 110 km/h, labik dalam haluk hu adat nduac 80 km/h. Bruk nduac iek abih jalan hu yam tal jaik jang bruk peih tabiak nduac pajeng tuai damuai nao mai di jalan Metro ka 1.

Meng thun 2020 tal urak ini, Bảo hiểm xã hội tỉnh Bình Dương hu pasang iek saong duah mboh rilo labik taong ruak, iek ruak pabak harak brei padeih bruk mbang tui bảo hiểm xã hội ka oh njauk adat ka yaok rabau mbang urang ngak. Hadei di tuk pasang iek, duah mboh suan, Bảo hiểm xã hội Bình Dương hu pataom mek labaih 1,8 tỷ đồng biyar jien suan. Piah samu pacang caga  dom bruk pagait mek jien kadung jien Bảo hiểm xã hội, Bảo hiểm xã hội Bình Dương meda patui veik pasang iek dom labik iek ruak, taong ruak, mayah mboh dom bruk ngak suan meda langyah tui njauk adat di hukum.

Sa mbang pasang iek praong mbang ka 2 ka bruk vak labik ngak tabiak pandap kaya ikan blei meng negar langiu tame hu Hàn Quốc peih ngak dalam 100 harei, meng harei 28/8. Mbang pasang iek ini hu hu mbaok di abih gah karja saong gah dân sự yau ye Mintri Hải dương saong kaya ikan, karja dom puk palei, lambaok bhap bini. Dom gah oh vak labik ngak pandap meda njauk taong tal 10 triệu won (7.600 USD). Dom Cty ngak ja harak labik ngak tabiak pandap meda njauk guk 7 thun atau phạt jien tal 100 triệu won.

Mỹ saong Trung Quốc meda padang sa nyaom ngak bruk  piah ginum biai ka dom bruk catang tagok dalam bruk pablei salih, dalam tuk gah kinh te praong abih di dunya daok duah jalan ngak patrun bruk catang tagok haong gah cagar veik di jalan ngak di drei. Tui nan, nyaom ngak bruk meda ginum biai 6 bilan sa mbang. Dua gah jeng njauk gauk peih tabiak mbang ginum biai piah “ndem mayai nao mai peih ngak pasang iek bruk pablei tabiak negar langiu” piah “trun manieng dom bruk oh njauk gauk ka dom sarak an ninh negar di Mỹ." Min, Mintri pablei salih Mỹ brei thau lac, oh nhượng bộ atau sanya veik dom bruk pambuak tal an ninh negar.

Akaok Hội đồng châu Âu Charles Michel brei thau, kapul ini daok caga raok taduan dom taneh ia tame dalam kapul di thun 2030 saong ndom lac, Liên minh châu Âu daok caga peih praong kapul jang. Dalam sajarah dak padang saong cakrok patagok, Liên minh châu Âu hu rilo mbang peih praong bruk ba tame rilo taneh ia bahrau. Thun 2004 tal thun 2007, meng 15 taneh ia dalam kapul, Liên minh châu Âu taduan raok 12 taneh ia bahrau, tame dalam kapul, lac dom taneh ia di Đông Âu saong bhum Ban-can haong Rumani saong Bungari./.