Dom tỉnh hu ngak salah bruk bayar jien ka taong abih urang ngak

Daok 1 adit tra abih tukvak peih brei paok jien daong pah sang ka urang ngak, min mbiah tal harei ini meng birau hu 1,5 trieu urang taduan paok jien daong,samu jaik 50% bruk ba tabiak. Dom tỉnh hu ngak salah bruk bayar jien ka taong abih urang ngak lac: Sơn La, Đắk Nông, Ninh Thuận, Bạc Liêu, Tiền Giang, Thái Nguyên, Kon Tum, Thái Bình, Lào Cai... Yau nan min, ini lac dom tỉnh hu urang mbang tui sarak nan biak takik. Tui Mentri LĐTB saong XH, bruk ba tal peih jien suai damuai di dom tỉnh, kayua karja palei oh sangka ngak njauk, jalan tacei ba, bruk ngak oh ka glong; oh catang dalam bruk peih ngak sarak.

Di mbang pasang iek di Thường trực HĐ bhap bini ban raya HCM ka bruk peih ngak adat hukum đầu tư công dalam ban raya HCM peih tabiak di harei kabroi (24/8), akaok UB bhap bini ban raya HCM Phan Văn Mãi brei thau, bruk caong buh jien tame cakrok di ban raya HCM lac biak praong. Caong hu abih tih di tukvak 2021-2025 lac 672.000 tỷ đồng. Meyah iek tui gah bruk praong, njauk ngak chip ye TPHCM caong hu 260.000 tỷ đồng, urak ini ban raya bahrau hu parabha brei 142.000 tỷ đồng. Kayua yau nan ye, iek tui bruk peih jien brei, iek tui bruk mek jien tame, TPHCM daok caga pathau khan tagok Trung ương pasang iek, pabak brei 120.000 tỷ đồng.

Piah pacang caga glut jaleih taneh saong pacang khat lahik cuah, patau randaih dalam kraong ia, dom gah chức năng tỉnh Tiền Giang daok pakhang bruk pasang iek saong langyah catang dom bruk ngak suan. Meng kaok thun tal ini, gah chức năng hu duah mboh  79 mbang ngan haong 125 urang kuac mek cuah  suan hukum saong pajeng cuah oh hu harak gar. Tapa nan, taong phạt 39 mbang ngan haong 63 urang, saong yaom jien phạt lac labaih 5,8 tỉ đồng. Urak ini, dom gah chức năng pakhang bruk pasang iek, langyah bruk ngak suan, abih di nyu lac dom labik pandiak, bhian rah tabiak bruk njuk mek cuah suan hukum, ngak haduh hatai manuac sia.

Pambuak tal bruk 40 urang tame negar suan hukum meng Campuchia mai Việt Nam tapa kraong Bình Di di biar harei 18/8 vừa qua, Công an huyện An Phú, tỉnh An Giang hu brei jien ka dom urang nan, yaok urang hu 1,5 triệu đồng piah ndik radaih, mbang huak tui jalan nao sang veik. Jeng pambuak pagam tal bruk nan, Gah An ninh điều tra, Công an tỉnh An Giang hu tabiak harak khởi tố bị can saong cap kreik  Nguyễn Thị Lệ haong Lê Văn Danh piah duah thau ka bruk “Ba menuac tabiak negar suan hukum”.

Dom bác sĩ di Sang iek ruak Sản Nhi tỉnh Hậu Giang birau blaic raic hu siam urang ruak u xơ tử cung trak 4,5 kg, praong labaih 30 cm. Urang ruak umo 42 thun, daok di huyện Long Mỹ. Khôi u di urang ruak hu mboh meng 3 thun dahlau min kayua sang kan kandah oh hu jien blaic raic. Dahlau di tuk tame sang iek ruak, urang ruak pandik tung ala gam sre darah rilo harei. Dom bác sĩ dut iek mboh ruak u xơ tử cung praong ngak sre darah gam haong thận hu ia pakat II. Tui Bác sĩ chuyên khoa II Trương Phong Trần - Trưởng khoa Sản, Sang iek ruak Sản Nhi Hậu Giang, urang kumei njauk brei dut iek ruak phụ khoa định kỳ piah samar thau saong taong ruak aval ka ruak phụ khoa, jeng yau ruak u xơ tử cung.

Piah khik kajap chất lượng bruk pato saong bac dalam thun bac meng bloh, Mintri pato megru, dam dara saong Thể thao Campuchia hu tabiak harak brei dui thun bac 2021-2022 atah jang 1 bilan, tal harei 30/11/2022, kayua tukvak bac da-a saong pato pakai gaok kan kandah meng jit COVID-19. Gam haong nan, taneh ia ini jeng tabiak bruk lac, mbang padeih hè thun bac 2021-2022 hu dui atah meng harei 1 tal abih harei 31/12/2022.

Tổng thống Mỹ Joe Biden birau khan brei thau Rajaei taneh ia ini brei klak abih 20.000 đôla tiền tavak sre ka dom sinh viên hu  mesre piah bac đại học tui danak dak daong jien padai liên bang saong klaak abih 10.000 dola jien sre  ka dom urang oh ginup jien piah tame danak dak ini. Ini hu maong lac sa bruk ngak ndung bak gah chính trị di Tổng thống Mỹ saong đảng Dân chủ piah dui pachreih dom cử tri daok ranaih umo buh brei phiếu anak bruk jaik palih ruah QH kreh vaktu di bilan 11 tal.

Dom urang ngak bruk brei ka quyền di urang kumei daok di Afghanistan hu peih sa gilang tapuk di ban ine Kabul brei ka urang kumei gaok kan kandah dalam bruk nao mai, taom gaok saong bac da-a di tuk Taliban pan quyền. Kuhria meng di tuk tagok pasang iek Afghanistan 1 thun dahlau, gah Taliban hu ba tabiak rilo adat pacang urang kumei yau ye kreik pabah mbang sang bac di anek saih kumei, oh brei urang kumei hu mbaok tame bruk di rajaei, pasang iek bruk ngui cuk saong oh brei urang kumei tabiak truh sang 1 drei./.

Urang lang: Bhumi & M. Phuong – 25/08