Trung tướng Tô Ân Xô, urang brei panuac di Mintri Công an brei thau, dom gah chức năng di Mintri Công an saong Công an tỉnh Đắk Lắk jeng daok ngak catang bruk pagui mek kol taong tame 2 jabat UB bhap bini xã di Đắk Lắk. Kuhria tal mon 9 mesup ini hu 37 urang njauk cap mek. Dalam melam 12/6, hu 2 urang tabiak đầu thú. Abih tih dom urang njauk cap mek saong tabiak đầu thú lac 39 urang. Urak ini dom gah chức năng daok pagui mek dom urang daok veik. Dahlau di nan, Phó Thủ tướng Trần Lưu Quang hu tabiak Harak pok Bằng “Tổ quốc ghi công” brei ka 6 liệt sỹ lac dom urang jakar, urang lin metai harei 11/6/2023 dalam bruk kol jhak cuh phao tame jabat UB bhap bini xã Ea Tiêu saong Ea Ktur dalam huyện Cư Kuin, tỉnh Đắk Lắk.

Daok jaik 1 adit tra lac danak dak jalan mbak praong di negar Danak dak jalan Vành đai 3 labik nao tapa TPHCM hu peih ngak. Tukvak urak ini, pandap panda padang ngak danak dak duh ka danak dak hu pabak. Abih di nyu nan lac, bruk peih mbaok taneh mek hu jak jeng kayua bruk njauk gauk di rilo rahra. Ngan haong hatai caong di rahra, hadei di harei ini hu peih ngak di harei 18/6, po buh jien tame gam haong dom kapul langyah, po thầu, 4 bhum palei meda patui veik yam tapa kan kandah meda mek hu abih tih bruk peih mbaok jalan di puac thun; peih ngak hu tani tanat, siam makre, salamat.

Piah pasiam veik bruk cap tangin gauk ngak ja harak gar mbang jien BHXH, jabat BHXH tỉnh Bình Dương daok pambuak gauk pasang iek veik harak likau padeih ruak di 22 labik iek ruak, meyah mboh suan meda payua tapa công an duah thau, ngak cambaih laih. Anak tal, BHXH saong Sở Y tế tỉnh Bình Dương pambuak bruk pathau khan sarak, adat hukum ka BHXH, piah paglaong hatai sahneng di urang ngak, urang pandar urang ngak ngan saong sarak, hukum ka BHXH. Gam haong nan, patagok bruk pambuak gauk dom dữ liệu, dom phần mềm langyah piah samar mboh, pacang cakak dom bruk bleik saleik, mbang jien.

Dah page harei ini 12/6, di puk Tích Lộc, xã Tích Thiện, huyện Trà Ôn, tỉnh Vĩnh Long bahrau rahtabiak bruk glut jaleih takai kraong atah 40m ngak ka 8 baoh sang  jaleih trun kraong. Makna glut jaleih tuk camriep hu taong yaom lac kayua mbaok kraong dalamm njauk riyak kayua jalan ia nduac saong bruk nao mai di mangaok jalan ia praong ngak ka takai kraong mbaih mbaoh biak trak damak. Hadei di tuk glut jaleih rahtabiak, kanja hu mai tal labik glut jaleih piah taong yaom dom khat lahik, daong ka rahra nao daok di labik salamat. Anak mata kanja hu daong ka dom baoh sang dalam bhum njauk kan kandah, yaok baoh sang 3 triệu đồng.

Huyện Dương Minh Châu, tỉnh Tây Ninh bahrau hu sa bruk medil lac njauk jru mek hadei di tuk mbang bimao glai ngak brei 3 urang tame cấp cứu. Dahlau di nan, harei 8-6, ong Lưu Văn Thum tame glai kaoh bimao “lòng gà” mai ngak pandap mbang ka diuk saong taco likei umo 10 thun mbang haong gauk. Tal mon 3 dah page harei 9-6, taong abih 3 urang nan mboh pandik tian, taglaoh ta-ok, aih craoh, hu ba nao cấp cứu di Sang iek ruak Chợ Rẫy. Daok uranaih likei umo 10 thun var drei jan, hu ba tame sang iek ruak Nhi đồng 2. Dahlau di nan, harei 7, 8, 10-6, di dom huyện Dương Minh Châu, Tân Biên, tỉnh Tây Ninh jeng hu 3 mbang njauk jru mek meng mbang bimao, ngak brei 12 urang tame sang iek ruak cấp cứu, dalam nan hu 2 urang metai

Dalam harak uan salam Harei negar Liên bang Nga, urang pan akaok negar Triều Tiên Kim Jong-un brei thau lac halain hatain pabak veik talei pambuak gauk biak catang di jalan ngak haong Nga. Harak uan salam hu brei thau cambaih, urang pan akaok negar Kim Jong-un pok mayaom talei pambuak gauk di Triều Tiên saong Nga lac “drap ar jalan ngak hu makna praong” brei mboh Triều Tiên meda kham marat piah oh padeih cak rok patagok talei pambuak gauk ini. Anak pathau khan di urang pan akaok negar Triều Tiên, urang pathau khan di Mintri Ngoại giao Mỹ hu brei mboh hatai huac kanda Triều Tiên daok tagok jalan pabak veik phao ndao ka Nga.

Dalam bilan 5 meng bloh, Trung Quốc hu 164 urang metai saong jaik 2.800 urang ruak trak pambuak tal Covid-19. Dom menuac mai tal dom bilik iek ruak pandiak, dom urang ruak trak saong metai dalam bilan 5 glaong jang duk haong bilan 4. Dalam tuk nan Trung Quốc bahrau brei adat ba tame pandar chip vaccine pacang biến thể XBB di sang bac Đại học Tứ Xuyên roh duah, patagok. Dom chuyên gia taneh ia ini ndom lac, vaccine brei ta-eng ka biến thể XBB bahrau hu adat brei pandar, meda daong ka Trung Quốc pacang virus ini hu siam lagaih dalam tukvak hadei di jit praong.

Pê-ru daok dang anak mbang tamuh ruak pandiak tabiak darah praong abih kuhria meng kan mai, ngan haong labaih 130 ribau urang njauk ruak, labaih 200 urang metai – tagok tal dua mbang dut saong mbang tamuh ruak di thun  2017. Labik gah barak di ban Piura daok lac pasak jit ruak, tuk hu jaik 40.000 urang njom ruak saong labaih 60 urang metai. Rilo hệ thống mac som manjek hu peih ngak dalam bhum piah pametai jamaok. Bruk khí hậu El Nino pandiak sarau kadau gam haong hajan khang saong rilo jamaok, hu maong lac makna praong ba tal ruak pandiak tabiak darah biak catang di negar Nam Mỹ ini.