Rilo urang mai likau bruk ngak di ban raya 

Jabat Rajaei birau hu harak văn bản brei thau panuac di Thủ tướng Rajaei Phạm Minh Chính ka bruk peih ngak sarak daong jien pah sang ka urang ngak. Tui nan, bruk peih ngak sarak daong jien pah sang ka urang ngak daok suai damuai, nan ye Thủ tướng Rajaei Phạm Minh Chính eiw Mentri LĐTB & XH dang tabiak, pambuak saong Mentri Jien padai saong dom jabat, tỉnh ban pambuak tal brei samar pasang iek, duah thau cambaih kayua halei yau nan, hu jalan jhul pasamar daong jien pah sang ka urang ngak.

Darak pasa urang ngak di TPHCM urak ini daok biak chreih chrai, haong bruk caong pilih ruah dalam tukvak 2022-2025 hu kuhria mboh lac meng 310.000- 330.000 labik ngak yaok thun, dalam nan, hu labaih 135.000- 140.000 labik ngak bahrau. Tal thun 2025, bruk caong hu urang ngak tapa bac magru meda meblah 87% dom urang ngak di ban raya. Taeng dalam 6 bilan akaok thun ini, bruk caong pilih ruah tapa bac magru di ban raya meblah 85,5% dom urang ngak, ngan haong jaik 126.480 labik ngak bruk.

Peih ngak Sarak 68 di Rajaei, tỉnh Bà Rịa - Vũng Tàu hu daong dom urang gaok kan kandah kayua jit COVID-19 yaom jien abih tih jaik 1.880 tỉ đồng. Yau nan min dalam tuk peih ngak, dom puk palei hu mboh bruk bayar jien kateik gauk saong bayar oh njauk ka 15.716 mbang  ngan haong yaom jien labaih 34 tỉ đồng. Caik rah tabiak bruk ini kayua rilo makna, yau ye dom urang saong jien rilo jang bruk kuhria caga, urang jakar  cơ sở saong bhap bini sahaneng oh njauk hoang sarak peih ngak; bhap bini ngak oh tapak hatai tuk brei thau  bruk khin daong; daok suan chung dalam bruk pasang iek hồ sơ…

Bruk rilo urang jakar, urang ngak gah y tế di dom labik y tế công lập padeih bruk, klaak bruk daok rahtabiak di rilo tinh, ban. Di tỉnh Bình Dương,dalam thun  2021 hadei di tukvak pacang caga jit ruak COVID-19, hu 162 urang ngak gah y tế padeih bruk, klaak bruk. Meng akaok thun 2022 tal urak ini, hu 166 urang ngak gah y tế padeih bruk. Makna praong abih ngak ka urang ngak gah y tế padeih bruk lac kayua bruk biak glaih glar, kan kandah min jien bilan saong chế độ bier. Anak bruk ini, Sở Y tế likau Mintri Y tế, Rajaei hu sarak lagaih piah dui pachreih, khik tani tanat urang ngak gah y tế di puk palei, dalam nan, sangka tal chế độ, sarak ka urang jakar y tế cơ  sở, y tế pacang caga.

      Pasak Ilamu - the thao saong bac megru bhap bini  Đồng Nai birau peih tal pato daoh kadha bhap bini bangsa Châu Mạ saong S'Tiêng ka dom adei uranaih lac urang bangsa takik di palei 4, xã Tà Lài, huyen Tân Phú. Bruk pato daoh kadha daoh bhap bini nan hu peih tabiak di bilan hè, tapa nan pato dom adei uranaih ka ilamu di bangsa; khik ramik, patagok ilamu  di bhap bini dom bangsa, oh caik ka nyu lahik nao dalam raidiuk.

Urang dang akaok kadung jien Dunya (IMF)  ndom lac: bruk kinh tế dunya jeng daok biak sarau kadhau saong bruk klaih klaoh jalan pabak khi đốt tal châu Âu meda jhul rilo nền kinh tế laik tame suy thoái. Bruk mesuh di Ucraina ba tal thảm họa nhân đạo, jhul yaom kaom pandap panda tagok glaong, ngak patagok jien pandar cai. Dom bruk ini mbuan ngak brei 71 triệu urang laik tame kan kandah, rambah rambup

Gah Y tế Liên Mỹ brei thau dahlau ka bruk parilo urang birau njom SARS-CoV-2 kayua dom biến thể birau di Omicron dalam nan hu BA.4 saong BA.5.  Tui Yam ndoc Gah Y tế Liên Mỹ, dom biến thể phụ di Omicron dalam nan hu BA.4 saong  BA.5, urak ini daok lac ralo di Mỹ saong rilo taneh ia karei, daok ngak ka urang birau njom ruak tagok rilo di châu Mỹ. Tui nan iew dom taneh ia di châu Mỹ pambuak veik dom jalan y tế công cộng yau pandar pataik pacang pabah saong pa-atah gauk tuk urang njom mbak tagok rilo.

       Dom mbang pandiak biak jhak daok rahtabiak di dom labik di Trung Quốc, châu Âu, Tây Nam saong pasak negar Mỹ dalam adit ini. Di ban ine Pari (France) nhiệt độ tagok tal 36 độ C, rilo labik daok dalam tanut báo động ka bruk pandiak bhang biak jhak. Tui jabat kuhria mboh dahlau bruk langik tasik negar France, ini meda lac mbang pandiak khang abih ngan haong nhiệt độ kuhria lac tagok tal 40 độ C. Daok di Tây Ban Nha, tui kuria mboh dahlau, nhiệt độ di dom labik meda tagok tal 44 độ C. Bhap bini daok dalam glaih glar kayua langik pandiak bhang. Kanja hu tabiak panuac “cảnh báo đỏ” di dom labik pandiak saong kakei bhap bini takik tabiak gah langiu./.

Urang lang: Thu Thảo -Ái Nghiêm -14/7