Dah page harei 29/5, Quốc hội ginum biai ka bruk jak ba, khik ramik saong pandar dom phun jien pabak bruk pacang caga jit ruak COVID-19. Di mbang ginum biai, ong Nguyễn Lân Hiếu – Yam ndok Sang iek ruak Đại học Y Hà Nội saong Sang iek ruak Đa khoa Bình Dương (lambaok kapul Bình Định) ndom lac, njauk pasang iek bruk pathau khan abih jit COVID-19. Tui ong Nguyễn Lân Hiếu, Việt Nam meda sahanang hatai pathau khan tuk dom urang ruak trak thit ruak, bruk klauk vaccine hu rilo, bruk jit ruak di dunya hu tani tanat. Daok ong Tráng A Dương (kapul Hà Giang) caong Rajaei pathau khan bruk jit ruak COVID-19, pato tacei Minti Y tế pato ka gah ilamo khik ramik, klauk jru vaccine, abih di nyu nan lac jalan brei klauk jru, tanut lahik meneing sahui ka vaccine.

Di dalam tỉnh Đồng Nai hu rilo danak dak oh ka hu jalan bayar jien kayua daok cang taong yaom taneh. Dalam nan, danak dak jalan cao tốc Biên Hòa - Vũng Tàu, kuhria peih tabiak ngak di jhung bilan 6 ni min ka oh hu jalan bayar jien kayua daok pagam pambak tame bruk tư vấn, taong yaom taneh. UBND tỉnh Đồng Nai hu panuac caong Rajaei tacei pato dom mintri, dom gah pambuak tal, brei rami veik, pabak tame dom adat ka patabiak yaom taneh, dalam tukvak daok cang tacei pato, brei adat ka tỉnh padang hệ số ramik veik yaom taneh pandar ka yaok danak dak piah pok tagaok HĐND tỉnh brei tapa.

Urak ini, tỉnh Bình Dương daok samar drah peih ngak 3 jalan adat piah peih bruk padang ngak danak dak jalan Vành đai 3 TPHCM nao tapa tỉnh. Taong abih yaom jien buh tame ngak jalan Vành đai 3 TPHCM nao tapa Bình Dương lac 19.280 tỉ đồng, dalam nan  jien padang ngak lac labaih 5.750 tỉ đồng, daok gilac veik lac jien biyar bồi thường saong daong tái định cư. Urak ini dom puk palei daok jhul samar biyar jien bồi thường ka dom baoh sang gaok tal di danak dak. Tui kuhria, 70% mbaok taneh meda hu jao dalam bilan anak tal piah samar drah hu peih ngak danak dak di harei 15.6 anak tal.

Tỉnh Bà Rịa-Vũng Tàu daok pataom prein yava tame sangka jang ka bhap bini bangsa takik, tui jalan lac tal thun 2025 meda salih bahrau abih bhum bhap bini daok. Dalam thun 2022, tỉnh hu brei labaih 198 tỷ đồng piah buh tame ngak 58 danak dak dalam bhum DTTS; brei labaih 224 tỷ đồng piah ngak dom bruk dalam danak dak bruk ngak negar patagok KTXH ka bhap bini DTTS. Gam haong nan, daong brei ka 70 sang hu mbaok tame 5 bruk raong limo menek, limo palimek, pabe menek, pabe ralow

Công an tỉnh Đồng Tháp brei thau lac, di dalam xã Mỹ Hiệp, huyện Cao Lãnh bahrau rahtabiak sa bala blung ia ngak ka 3 adei saai sa tain metai. Di akaok maong bier harei 28/5 di takei kraong darak praong di puk 2 xã Mỹ Hiệp hu 4 adei manei ia kraong. Tal maong 4 meteh, 3 adei daok bac tal 7, tal 3 saong tal 1 dalam sa baoh sang njauk blung ia. Hadei di tuk mboh bruk ini, urang adei daok veik nduac nao khan haong sang. Hadei di nan, sang hu duah mboh rup tau di 2 adei. Tal maong 9 melam  28/5, kapul Jabat Cảnh sát padam khuah saong daong duah urang njauk bala hu duah mboh rup tau di adei daok veik. Meng di tuk thau hu bruk ini, urang pan akaok tỉnh Đồng Tháp saong urang pan akaok huyện Cao Lãnh hu mai tal rivang, payua panuac klah raba, pandik harao gam haong sang.

Sruh kapal haoh praong pajeng tuai C919 ngak dalam taneh ia di Trung Quốc par hu blaoh mbang pajeng tuai akaok meti di harei 28/5. Tui taong yaom di dom urang ilamu Trung Quốc, mbang par camereip abih di C919 oh lac brei mboh bruk  gheih tagok gam gam di gah ngak pandap di Trung Quốc pamaong tagok gah angaok di chuỗi ngak kong, brei mboh hatai caong tagaok glaong di Trung Quốc, bo daok ngak tayah bruk độc quyền meng lavik mai dalam bruk ngak tabiak kapal haoh di dom hãng Boeing saong Airbus. 

Mintri Ngoại giao Hàn Quốc daok ieu Triều Tiên klaak bruk cuh vệ tinh saong sanya pambuak bruk haong dunya piah pacang caga dom bruk khiêu khích di Bình Nhưỡng. Pathau khan hu ba tabiak dom maong hadei di tuk Tokyo brei thau lac taduan hu khau tin di Bình Nhưỡng ka bruk cuh sa vệ tinh, meda hu peih tabiak dalam tukvak meng harei 31/5 tal harei 11/6. Hội đồng An ninh negar Hàn Quốc hu pataom mbaok ginum biai samar drah hadei di tuk taduan hu khau tin ka bruk cuh vệ tinh di Triều Tiên. Urak ini gah Triều Tiên ka oh mboh ndem hagait ka khau tin ini.

Ai Cập hu kuac raok 2 labik ướp menuac metai, gam haong 2 baoh kubo dalam labik dar urang metai meng kan di labik taneh kubo Saqqara, hu meng labaih 2.300 thun dahlau. Gah dalam 2 labik ướp menuac metai nan, jeng hu khgaiy ndih meng patau, binh haluk kiak, bình adat cambat, sara natri – lac sa dalam dom pandap piah ướp menuac metai saong khan lang khgaiy ndih haong dom janaih pandap ướp xác karei. Bruk kuac raok daok duah mboh 2 baoh kubo sit daok jaik nan hu umo meng 4.400 saong 3.400 thun. Tapa nan brei mboh dom chreih chrai dalam ilamu ba anek menuac saong athur jeng diuk miat, oh metai tui hatai sahneng meng kan lavik di abih  dalam sajarah.