Thu Tuong javap jalei rilo panuac tangi sua di urang ngak 

Harei ini, Quốc hội yam tame adit ngak bruk puac di abih di mbang nyaom 3, Quốc hội mbang 15. Dalam adit ngak bruk ini, Quốc hội meda ginum biai di hội trường ka dom danak dak, dalam nan hu: Hukum iek ruak, taong ruak (pasiam veik); Hukum Pasang iek (pasiam veik); Hukum peih ngak dân chủ di cơ sở; Hukum pacang caga taong paoh gauk dalam sang (pasiam veik); Hukum Dầu khí (pasiam veik); Hukum pasiam veik hu pabak dom paka di Hukum Tần số vô tuyến điện. Dalam adit ngak bruk ini, rilo Sarak meda hu Quốc hội brei tapa, njauk caik hatai nan lac Sarak ka bruk sua tangi saong javap jaloi mbang ginum biai ka 3, Quốc hội mbang 15.    

Di mbang ndom nyai tapak song online  haong labaih  4.500 urang ngak  di  63 labik di  dom tỉnh, ban rah tabiak harei 12/6 di tỉnh Bắc Giang ngan haong kadha “urang ngak Việt Nam song hatai khin patagok taneh ia ”. Tổng Liên đoàn taduan hu jiak  10.000 panuac tangi sua di urang ngak pataom tame dom bruk yau: bruk tagok jien bilan  takik di abih bhum  meng harei  1/7; ramik pasiam sarak ka bảo hiểm xã hội, sang dok;bruk iek glang khik ramik bruk ngak, jien bilan duah hu di urang ngak;bruk bac megru paglong ilamu ngak bruk ka urang ngak...Thủ tướng hu panuac dar phol bruk rik dong di urang ngak dalam mbang ndom nyai ni song ndom lac: “Đảng, karja, dalam nan hu rajaei, Tổng Liên đoàn Lao động Việt Nam caik hatai tui pang dom panuac ndom, dom bruk ngak piah patoam tame pasang iek veik dom jalan ngak, sarak, samar pabak, ngak pasiam veik.Dalam nan,sangka tal hatai cong khin di urang ngak”. 

Rajaei hu tabiak sarak tagok jien bilan tối thiểu bhum ngan haong urang ngak bruk tui harak hợp đồng ngak bruk. Tui nan, meng harei 1/7, yaom jien bilan takik di abih di bhum meda hu tagok jang 6% dut saong yaom jien bilan urak ini, meng 180 tal 260 ribau đồng. Dalam nan, bhum  I meng 4.420.000 đồng sa bilan hu tagok jeng 4.680.000 đồng sa bilan. Bhum II meng 3.920.000 đồng sa bilan tagok 4.160.000 đồng sa bilan. Bhum III meng 3.430.000 đồng sa bilan tagok 3.640.000 đồng/ sa bilan. Bhum IV meng 3.070.000 đồng/ sa bilan tagok 3.250.000 đồng sa bilan.

UBND tỉnh Đồng Tháp bahrau brei thau xã Mỹ Đông, huyện Tháp Mười mek hu tanut palei pala bahrau paglong. Tapa  4 thun peih bruk padang ngak  palei pala bahrau  paglong, mbaok meta di  xã Mỹ Đông dak harei dak siam, meng hu bruk njauk hatai di bhap bini song karja pak ni. Urak ni, jien duah hu kuhria rah tapa tui akaok menuac  di xã hu jiak  61 triệu đồng/sa thun. Xã hu jiak  77% jalan hadah, hajao , mekre, hacih saat ; Tong abih bhap bini jeng njauk hatai  ka bruk padang ngak palei pala bahrau paglong di  xã.

Sở Jalan mbak pajeng ba TP.HCM bahrau hu harak payua UBND Ban raya, ieu ramik brei patrun mateh yaom jien phí pabah lamnge tasik ngan haong bruk pajeng pandap panda meng jalan tasik. Bruk trun mateh yaom jien phí ngan haong pandap blei tame, pablei tabiak meng jalan tasik piah pachreih doanh nghiệp takik pandar jalan radaih, rik daong patrun bruk gar jalan saong bala jalan mbak. Urak ini, bruk pajeng pandap panda meng jalan tasik hu taong yaom lac abih takik, yaok mbang pajeng hu rilo, min bruk pajeng ini bahrau meblah labaih 20%, daok veik lac tapa jalan radaih.

Di nyaom biai  kayua  mBan Bí thư Ban Chấp hành Trung ương Đảng Lao động Triều Tiên ieu pataom di ban ine  Bình Nhưỡng harei  12/6 piah ginum biai ka dom bruk  sami samar bo  Đảng Lao động Triều Tiên dok dang anak, urang pal akaok  Kim Jong-un hu panuac ieu urang jakar  Triều Tiên peih sa bruk “mesruh” khang jang  ngan song dom bruk oh siam mekre song  thói quan liêu. Langiu di nan, nyaom biai hu ginum biai ka dom jalan ngak patagok bruk ngak di urang pal akaok  di  Đảng Lao động dalam bruk peih ngak dom bruk ngak pakat negar .

Hadei di dua thun brei padeih, Nyaom biai haong akaok Mintri Gah pablei salih dunya (WTO) mbang ka 12 hu peih tabiak di harei kabroi (12/06) di Thụy Sĩ.  Di mbang peih mbaok Ginum, Taong Yam ndoc Gah Pablei salih dunya Okonjo-Iweala brei thau lac, mbang ginum biai ini lac sa kein laba piah ka dom taneh ia dalam Gah Pablei salih dunya ngak brei ka dunya mboh lac, WTO meda yam tagok jak jeng. Dom sanya mek hu di Mbang ginum biai meda pok paglaong prein di taong abih dom taneh ia dalam WTO dalam bruk pabak hu hatai caong di bhap bini ka pandap mbang, prein yava, an ninh, sron mbon, bruk ngak saong alam môi trường khang kajap.

Bhap bini rahra di palei  Katsurao di  tỉnh Fukushima, Japon meda hu mai sang veik tuk bruk panduan ba hu klak nao labaih 11 thun hadei di bala hạt nhân kayua mbang megei boh taneh  gam song riyak khang harei 11/3/2011. Ni lac mbang camereip  dom bruk pacang veik hu yah klak piah rahra meda mai daok veik di dom labik bhian njauk kuhria kreh pabah mbang suai lavik kayua tanut njom  phóng xạ glong. Karja pak ni dok caga ba rahra mai veik tapa bruk pasiam gah ngak nong, lac gah ngak prong di pak ni./.

Urang lang: Hanipha- Thu Thảo -13/6