Ngak bruk haong tỉnh Đồng Nai ka bruk peih ngak Sarak 43/2022 saong dom danak dak praong di mblang kapar haok Long Thành saong jalan nduac samar Biên Hoà – Vũng Tàu di dalam tỉnh, ong Nguyễn Đức Hải, Phó akaok Quốc hội hu panuac ieu ngak cambaih bruk ngak di dom gah pambuak tal ngan haong bruk ngak suai tui jalan ba tabiak di dom danak dak praong ini. Gam haong nan, tỉnh Đồng Nai njauk pabak, taong yaom cambaih laih jang piah pasiam hukum gah jalan ngak, sarak peih ngak dom danak dak.

Dalam bilan 3 ni, di palei ilamu – ravang iek dom bangsa Việt Nam (Đồng Mô, Sơn Tây, Hà Nội) hu ngak dom bruk ngan saong kadha “harei pataom bingu Ban”, hu makna pambuak hatai anit ranam saong bruk njauk ngak di rai ranaih ngan saong ilamu bangsa. Dom bruk ngak nan hu mbaok di 100 urang di 16 bangsa saong dom nghệ sĩ, nghệ nhân urang bangsa S’Tiêng mai meng tỉnh Bình Phước, bangsa Thái mai meng tỉnh Sơn La.

Gu inegirai buk pak phường Tương Bình Hiệp, ban Thủ Dầu Một, tỉnh Bình Dương hu Gah Kỷ lục Việt Nam ba tame kỷ lục lac “Gu inegirai pagam meng dom baoh buk lan am ngak meng tangin rilo abih pak Việt Nam”. Bruk siam gheih saong hu taong yaom lac oh hu baoh ka dua di gu inegirai lac ngak meng labaih 14.000 baoh buk. Yaok drei inegirai atah 29m. Dom baoh buk ngak rup ka inegirai hu ngak meng tangin, ngak bingu hala tauk tagok ndong thaot inegirai saong hu am meng njuh. Langiu di nan, kakah di inegirai hu mbeik meng haluk lan saong am tathak.

Tui kuhria,  2 harei tal, bhum ĐBSCL yam tame sa mbang njom mbak glaong tui ia tagok puac bilan 1 saka ia bulan. Ini lac mbang njom mbak khang abih dalam bilan thu thun ini. Dalam dom harei meng harei 7 - 13/3 ia mbak 4g/lít, meda tame dalam 50-60km kuhria meng pabah kraong Vàm Cỏ Đông saong Vàm Cỏ Tây. Dom kraong Cửa Tiểu, Cửa Đại, Hàm Luông, Cổ Chiên saong kraong Hậu, ia mbak njom tame meng 40-50km. Mbak njaom tame thun ini glaong jang rilo thun, nan ye dom puk palei njauk khik piah ia taba piah pandar saong piah pruh ka phun pala. 

Daok di tỉnh Hậu Giang, UBND tỉnh hu ieu kakei dom jabat hu pambuak tal patui iek yaok harei bruk njom ia mbak, samar drah pasang iek dom bhum njauk njom ia mbak, kurang ia pandar piah khik tani tanat bruk pabak ia hacih tal rahra tuk hu ia mbak njom tame. Taphia di nan, dom gah chức năng njauk pathau khan ka rahra pandar ia hu jalan ngak, khik piah ia saong pandar ia patak pataom dalam tukvak njom ia mbak, tuk hu hatai caong meda pandar jalan ngak lac kareik ia salih dom labik piah rami ramik ia pabak ka rahra pandar.

UB Bầu cử Negar Campuchia (NEC) brei thau ka bruk pilih ruah urang ka Thượng viện mbang V, jayah laik tame tangin đảng bhap bini Campuchia (CPP) haong 10.052 phiếu buh brei, samu 55 urang. Đảng bhap bini Campuchia hu tabiak panuac công nhận bruk pilih ruah urang ka Thượng viện mbang V. Tui nan hu panuac lac: “Tapa bruk pilih ruah mbang ini brei mboh hatai kham merat di rahra Campuchia piah khik ramik sron mbon saong daok jhul patagok bruk KTXH piah paglaong raidiuk rahra”  

Jabat Kuhria mboh dahlau bruk langik tasik negar Thái Lan brei thau lac dalam adit anak tal langik pandiak tapa tanut 40 độ C di rilo tinh, ban pak negar ini. Bruk langik pandiak lac kayua tuk độ ẩm glaong, rahra mboh pandiak jang saong nhiet do di rup pabhap meda glaong jang nhiet do gah langiu dut hu. Gah y tế Thái Lan ndom lac, langik pandiak glaong yau nan meda ngak ka manuac mboh glaih glar kayua pandiak atau mabuk pandiak, mebuh nhiet mayah daok gah langiu rilo.

Prang jeng negar camereip abih di dunya vak quyền phá thai plaik anek tame Hukum negar piah khik caga quyền di urang kumei hadei di tuk 2 viện Quốc hội Prang buh phiếu brei tapa. Rilo urang jakar ngak praong saong gah khik caga quyền anek menuac di negar Prang hu panuac pok meyaom chip, maong ini lac sa takai yam brei mboh jayah dalam bruk khik caga quyền di urang kumei saong lac “bruk ba akaok nao dahlau” di taneh ia Prang dalam khik caga quyền tự do plaik anek. Hu thau, kuhria ta-eng thun 2022, hu 234.000 mbang plaik anek hu peih ngak di Prang./.