Pandap ngak meng baoh kayau, ngak jeng labik taom gaok, ndom biai nao mai

Patui danak dak mbang nyaom ka 3, harei ni, 3/6, dom urang Quốc hội ginum biai tui kapul ka danak dak Hukum xăng menyek (pasiam veik). Meng dom nyaom sarak hu batabiak di mbang pasiam veik ni hu cong lac meda jhul samar bruk duah thau, pasang iek, piah duah tabiak trữ lượng bahrau ba tame peih ngak dầu khí, gam song nan langyah hu siam lagaih dalam bruk duah thau, peih ngak. Jeng dalam harei ni, Quốc hội ginum biai tui kapul ka danak dak hukum pasiam veik pabak dom paka di hukum Tần số vô tuyến điện song ginum biai di Hội trường ka dự thảo sarak ka ngak iek bruk rami ramik urang ngak, ba jalan, pato bruk ngak ka urang njauk duas langiu trại giam.

Di tỉnh Tiền Giang daok rah tabiak Harei pataom baoh kayau. Ini lac mbang akaok meti bruk nan hu peih tabiak haong bruk hu mbaok di jaik 30 doanh nghiệp, hợp tác xã saong 24 gian hàng piah yaih khan tal urang blei dom janih baoh kayau di tỉnh, pandap ngak meng baoh kayau, ngak jeng labik taom gaok, ndom biai nao mai, bac megru saong pambuak talei cung - cầu di dom doanh nghiệp, hợp tác xã pablei pandap, dom sang pala, ngak. Lac bhum taneh daok di tapen kraong Tiền, Tiền Giang biak lagaih piah pala dom janih phun mbang baoh. Tal urak ini, tỉnh hu jaik 68 rabau ha phun mbang baoh, yaok thun paik hu labaih 1,8 triệu tấn baoh.

Viện Huyết học -Truyền máu Trung ương bahrau peih danak dak “Hành trình đỏ” mbang ka X thun 2022 ngan haong kadha “Pambuak pagam darah Việt” di Đất Mũi Cà Mau. Danak dak daok hu peih tabiak meng harei ini tal puac bilan 7 di 46 tỉnh, ban saong tui kuhria meda taduan hu labaih 120.000 đơn vị darah. Ini lac mbang ka 8 tỉnh Cà Mau hu mbaok peih ngak bruk ini. Cà Mau urak ini hu 76 kalup kapul Alin darah halain hatain, ngan haong labaih 1.900 urang. Abih tih dom darah taduan hu meng thun 2017-2021 lac labaih 48.900 đơn vị darah (yaom jaik 32 tỷ đồng).

Harei ini 3-6, Mintri ngak nong saong patagok palei pala peih bruk brei thau Việt Nam ngak hu vắc xin jit tả pabui châu Phi. Vắc xin hu angan pablei salih lac NAVET-ASFVAC di Cty cổ phần Jru thú y trung ương Navetco, yaom pablei 34.000 - 36.000 đồng sa liều. Dịch tả pabui châu Phi hu mboh mbang camereip abih di châu Phi thun 1921. Ruak njaom mbak samar, ngak brei ruak di yaok umo thun, yaok janih pabui saong ba tal metai abih. Yaom lac hu labaih 4.000 danak dak roh duah pambuak tal virus saong cakrok vắc xin di dom urang ilamu hu khan brei thau, min angaok dunya oh ka hu vắc xin pablei salih piah pacang ruak

Yaok thun, Việt Nam hu labaih 2.000 uranaih mblung ia, kuhria rah tapa yaok harei hu 5 uranaih njauk mblung ia, dang akaok dalam dom bala di uranaih. Yaom lac, urak ini dom uranaih mblung ia jeng hu trun jang dut saong thun 2010, min bala mblung ia jeng lac sa dalam dom makna akaok meti ba tal metai di uranaih Việt Nam. Pacang caga mblung ia jeng lac sa bruk njauk ngak dahlau di abih di Danak dak bruk ngak pakat negar ka pacang caga bala, rambuac di uranaih tukvak 2021 - 2030. Việt Nam ba tabiak jalan ngak lac trun 10% uranaih metai kayua mblung ia di thun 2025 saong 20% di thun 2030.

Dalam tuk Liên minh châu Âu (EU) brei thau bruk pakauk blei menyek di Nga, kapul dom taneh ia pablei menyek tabiak negar langiu saong dom gah pambuak bruk (OPEC pagam) njauk gauk brei patagok rilo jang menyek tamo tal 648.000 thung sa harei dalam bilan 7 saong bilan 8. Tui nan nyu glaong jang biak rilo duk haong bilan dahlau di nan, lac 432.000 thung sa harei. Mỹ hu pok meyaom bruk ngak bahrau abih ini di OPEC+ ka bruk patagok parilo menyek tamo.

Dalam kadha ndom puac tapa video anak Quốc hội Luxembourg harei 2/6, Tổng thống Ukraine Volodymyr Zelensky khan lac Nga daok pasang iek jaik 20% taneh ia ini. Dahlau di nan, hãng thông tấn TASS jeng brei thau, Tổng thống Zelensky khan lac, yaok harei, lin Ukraine metai lahik jaik 100 urang dalam bruk mesruh haong Nga saong jaik 500 urang lin karei njauk rambus, dalam tuk dom bruk mesruh gauk khang jeng daok patuh tabiak.

Rahra di grauk labik dalam negar Anh daok hu mbaok tame dom bruk praong salam uan Đại lễ Bạch Kim uan 70 thun ngak patao negar Anh di Nữ hoàng Elizabeth đệ Nhị, peih tabiak meng harei 2/6 (tui mon Việt Nam) saong dui atah tal harei 5/6. Labaih 3 rabau gom “đèn hiệu” hu truac hadah di grauk labik dalam negar Anh saong dalam abih Khối thịnh vượng chung. Ini jeng lac mbang camereip abih đèn hiệu hu truac hadah di taong abih 54 ban ine di Khối thịnh vượng chung. Nữ hoàng Elizabeth đệ Nhị tagok ngak patao di harei 6/2/1952, hadei di tuk patao ame lac George palang lahik. Nữ hoàng jeng menuac ngak patao lavik di abih dalam sajarah negar Anh./.

Urang lang: Hani Pha & M. Phuong – 03/06