Di tuk Pahadar 110 thun Harei padang tỉnh Kon Tum (09/02/1913 - 09/02/2023) saong brei thau Harak di Thủ tướng Rajaei pok angan ban Kon Tum lac đô thị ka II di tỉnh Kon Tum rah tabiak tuk melam 9/2 di tỉnh Kon Tum, ong Võ Văn Thưởng, Ủy viên Mintri Chính trị, Thường trực Ban Bí thư hu pok mayaom dom kham marat saong jak jeng bo Đảng bộ, Kanja saong rahra dom bangsa tỉnh Kon Tum ngak hu dalam luac tukvak padang tabiak, dak padang saong patagok. Mboh cambaih di abih lac puk palei, bhum ceik tal ban praong, mbaok mata di Kon Tum daok salih bahrau tapa yaok harei, siam gheih jang, ndung bak ilamo bangsa, ngak jeng prein khang bahrau. Bruk patagok kinh tế di tỉnh tuk halei jeng daok di tanut mbaih; dom baoh sang kan kathaot daok mala 11%.

Page ini 10/2 di Hà Nội, Mentri Ngak nong saong Patagok palei pala peih bruk Ndom biai pambuak kaya nong 970 online “ Jhul patagok bruk pablei salih kaya nong, pandap mbang di Viet Nam saong tỉnh Vân Nam (Trung Quốc). Nyaom biai pataom tame ba tabiak dom jalan jhul patagok bruk pablei salih  jeng yau bruk caong pablei salih nao mai njam patam, baoh kraoh,  kaya nong, pandap mbang di dua negar. Tui Mban khik iek Pabah mbang negar tỉnh Lào Cai, dalam bilan 1, kuhria abih tih jien pablei pandap tabiak negar langiu tapa pabah mbang negar Lào Cai hu jaik 82 trieu dola Mỹ. Pandap panda pablei tabiak negar langiu  ralo meng lac kaya  nong di dom tỉnh, ban gah Maraong yau ye: thanh long, patei, samekai, chôm chôm, panat…

Piah pasiam veik bruk gar radaih di bến phà Xuân Đông (huyện Chợ Gạo), tỉnh Tiền Giang brei ngak tatua Chợ Gạo (tapa kraong Kỳ Hôn, jaik Vàm Kỳ Hôn) pambuak xã Tân Mỹ Chánh (ban Mỹ Tho) saong xã Xuân Đông (huyện Chợ Gạo). Ini lac sa dalam klau mbaik tatua hu padang ngak praong di Danak dak Jalan tỉnh 864 (rah tui kraong Tiền) haong yaom phun jien abih tih labaih 260 tỷ đồng saong lac mbaih tatua ka klau tapa kraong Chợ Gạo - Kỳ Hôn.

Mentri Kong an birau peih bruk brei Kapul urang jakar nao daong urang gaok bala di Thổ Nhĩ Kỳ hadei di mbang megei baoh taneh. Ini lac mbang akaok meti Mentri Kong an Viet Nam brei Kapol urang jakar nao ngak bruk dunya di sa labik rah tabiak bala baik atah  di taneh ia Viet Nam. Kadha nan brei mboh bruk hu ilamu, naih gheih, saong halan hatian taduan bruk ngak di gah urang daong duah urang gaok bala di Viet Nam. Kong an Ban raya HCM brei 5 urang jakar, urang lin naih joi hu ilamu glaong gam haong kapol urang jakar di Mentri Kong an tapa Thổ Nhĩ Kỳ.

Công an huyện Lộc Ninh, tỉnh Bình Phước daok bgak harak gar, taom gaok gauk gar di sa urang kumei angan D.P umo 29 thun daok di Ninh Thuận tabiak negar suan hukum tapa Campuchia kayua mê tín dị đoan, mai sang. Dahlau di nan, harei 7/2, Công an Lộc Ninh saong Đồn Biên phòng Lộc Tấn mboh D.P daok yam tapa Campuchia suan hukum nan ye cap khik, D.P khan lac meng Ninh Thuận tal huyện Lộc Ninh duah jalan tapa negar langiu piah gaok gru saong dom urang tui Pháp luân công karei piah gam bac. Min, tuk hu sua gru daok pak halei ye urang ini oh thau, tok nao tui panuac pato tacei jalan di gru daok dalam akaok. Công an ieu kakei rahra njauk paglaong bruk sangka plaih laik tame dom bruk pasram pháp luân công saong mê tín dị đoan.

Tổng thống Thổ Nhĩ Kỳ Tayyip Erdogan brei thau urang metai kayua megei baoh taneh di taneh ia ini tagok labaih 14.350 urang saong 67.097 urang njauk rambuac. Thổ Nhĩ Kỳ brei sang di dong  ka 10 tỉnh gaok kan kandah saong daok taduan paok jien daong  di dom taneh ia di dunya. Ong Erdogan ndem lac, karja meda bayar jien ka dom urang njauk bala  bala megei baoh taneh saong brei tabiak adat hukum samar drah piah pacang dom urang pambak tame bala megei baoh taneh ini piah duah kein laba. Tui kuhria mboh dahlau khat lahik di Thổ Nhĩ Kỳ saong Syria labaih 4 tỷ đô la.

Talei pambuak bruk pablei salih nao mai di Australia saong Trung Quốc daok hu siam veik tuk Trung Quốc bahrau brei adat blei tôm hùm meng Australia. Jeng dalam harei 9/2, sruh gilai camriep pajeng dang di Australia tame Trung Quốc kuhria meng di thun 2020 tal urak ini. Ini hu taong yaom lac sa bruk siam brei mboh talei pambuak bruk pablei salih di Australia saong Trung Quốc dak harei dak hu siam tagok. 

Gah Y te dunya brei thau, mbang tamuh jit ruak aih craoh trak abih dalam sajarah dakrai Malawi ngak brei 1.210 metai saong  jaik 37.000 mbang urang  njom ruak kuhria meng bilan 3 thun blaoh. Anak bruk urang ruak tagok samar, WHO huac lac mbang tamuh jit ruak urak ini meda rah tabiak jhak veik meyah oh hu dom jalan  ngak khang./.