Ini lac dom kreih camin urang nong naih joii

Di tuk Pahadar 92 thun Harei padang kapul urang nong Việt Nam, harei ini (14/10) di Hà Nội hu peih bruk pok mayaom saong jao angan Urang nong Việt Nam naih gheih thun 2022 ka 100 urang nong. Ini lac dom kreih camin urang nong naih joii, duah jalan ngak bahrau dalam bruk cak rok patagok kinh tế; khin saneng khin ngak, peih ngak, pandar siam lagaih dom kadung jien, urang ngak, taneh riya, khang hatai pandar ilamo kỹ thuật, công nghệ tame bruk ngak mbang, pablei salih. Dom urang ini lac lambaok ka yaok trieu urang nong di dalam taneh ia daok luac harei melam ngak mbang, pablei salih, duah jalan ngak bahrau, tuk halei jeng ba akaok nao dahlau dalam bruk cak rok patagok kinh te ngak nong, palei pala saong padang ngak palei pala bahrau.

Ngak bruk haong tỉnh Bến Tre ka cakrok ngak nong, bruk ngak di HTX saong bruk thủy lợi di harei 13/10, ông Lê Minh Hoan, Akaok Mintri Ngak nong saong Patagok palei pala hu panuac lac, tỉnh njauk paglaong asar siam kaya pandap dalam bruk ngak nong, sangka bruk pilih ruah pajaih siam, salih meng hatai sahneng sản xuất tapa hatai sahneng kinh tế, sangka langyah bruk pablei pandap, sangka tal darak pasar dalam taneh ia gam haong pablei tabiak negar langiu, pambuak haong bruk padang mã số bhum pala, patui jalan pambak praong dom bruk pambuak gauk pala, ngak.

Tỉnh Cà Mau bahrau pok brei angan ka 9 pandap, paok pandap công nghiệp palei pala di dom huyện Năm Căn, Ngọc Hiển, Đầm Dơi. Ini jeng lac dom palei hu prein khang piah cak rok patagok bruk raong kaya ikan pambuak haong glai ia mbak di Cà Mau. Gam haong nan, bruk deih gauk di dom pandap ini lac jeng hu pandap pambuak haong gilai ia mbak di pak ini. Bruk hu pok brei angan lac pandap công nghiệp palei pala angan je meda daong ka dom doanh nghiệp, sang pablei salih hu pandap panda mbuan cak rok patagok angan je; padang hatai jia ngan haong urang pandar.

Sở Pato megru TP.HCM hu padang kapul pasang iek bruk mek jien tame saong cai pandar dalam sang bac, dalam adit ini saong adit hadei meda ngak bruk haong taong abih dom labik pato pakai dalam ban raya. Sở Pato megru TP.HCM jeng hu tacei pato dom jabat pato megru pasang iek veik taong abih dom bruk pambuak tal cai pandar di mban lambaok amaik ame anek saih di tal bac saong di sang bac. Dom bruk halei oh daok dalam quy định bo pataom mek jien ye njauk lang yah tal labik tal dhua.

Hadei di 3 adit taong ruak saong brei daok karei di Sang iek ruak Bệnh nhiệt đới TPHCM, prein yava di urang ruak lac urang kumei umo 35 thun, njauk ruak đậu mùa khỉ camriep di Việt Nam hu siam veik. Urang ruak hu prein yava khang kadang veik, mbang huak hu siam. Harei ini urang ruak hu tabiak sang iek ruak. Dom urang hu taom gaok jaik haong urang ruak tuk mai Việt Nam jeng ka oh mboh hagait medil lac njom ruak. Dahlau di nan, urang ruak mboh njauk ruak meng di tuk daok main di Dubai meng harei 18.9.2022.

Melam bloh (13/10), tại tỉnh Kandal, Campuchia, hu bruk tabaleik gaiy ngak brei 15 anek saih lahik. Kuhria tal mesup ini, gah chức năng duah hu 6 adei min 2 adei metai. Tui panuac khan di gah cảnh sát tỉnh Kandal, bruk nan rah tabiak hadei di tuk dom adei aneh saih peih bac saong daok angaok gaiy mai sang di 1 pulao daok di xã Kampong Phnom, huyện Leuk Dek, tỉnh Kandal. Labik ini hu 300 baoh sang. Meng dahlau mai oh hu bala yau nan, min mbang ini kayua ia ndik tagok glaong ba tal bruk pandik harao nan.

Đài Loan (Trung Quốc) hu peih bruk raok tuai mai ma-in gilac veik hadei di tuk ngak salah bruk dut iek ruak piah pasang iek bruk njom mbak di jit ruak COVID-19. Dahlau di nan, di bilan 6, Đài Loan hu brei patrun harei brei daok karei ngan haong tuai negar langiu brei daok karei meng 7 harei trun daok 3 harei. Meng abih tih jaik 7 triệu urang njauk ruak COVID-19 dalam taneh ia meng akaok thun ini, rajaei Đài Loan hu jhul samar bruk peih pambang gilac veik, ndem lac raidiuk hu mai veik yau dahlau, abih di nyu nan lac tuk hu rilo rahra klauk jru pacang caga jit ruak.

Hội đồng Bảo an Liên Hợp Quốc hu ba tabiak dự thảo sarak brei kreik veik drap ar, pakauk oh brei nao mai saong cấm vận phao ndao ngan saong kapul nyaom halei atau menuac urang halei ngak srau kadau tal sron mbon saong tani tanat di Haiti. Ngoại trưởng Mỹ Antony Blinken ndom lac, sa dalam dom cuang kandah dalam bruk pacang hu siam bruk srau kadau lac talei pambuak gauk di dom băng đảng daok di Haiti kayua kein laba di kol nyu. Mỹ jeng hu ba tabiak dom jalan taong phạt thị thực ngan haong 11 urang pachreih tui dom băng nhóm di Haiti./.

Urang lang: M. Phuong & Thu Thao – 14/10