Taong abih anek saih  brei pandar tài khoan hu brei dahlau piah tame, iek, pasiam khaw tin di drei angaok he thong dalam tuvak hu ba tabiak.  Anek saih hu 12 harei, meng harei ini – 18/7 tal harei 30/7 piah tut ngan, ramik pasiam saong pabak  bruk palih ruah tui hatai caong khin oh cakak mbang tame , atau mbang palih ruah angaok He thong. Dom bruk palih ruah hu ngak tui dahlau hadei tal abih. Dalam tuk tut angan palih ruah, Mentri Pato megru  meda hu mbaok gam kapol daong ilamo ky thuat, tuk halei jeng brei daong ka anek saih.   

HĐ bhap bini tỉnh Đồng Nai mbang X (vaktu 2021 – 2026) brei tapa Sarak brei buh tabiak 195 tỷ đồng piah daong gru pato di dom labik pato di karja dalam tỉnh tal thun 2025. Dalam nan brei daong 2 triệu đồng sa urang sa bilan ka gru pato mầm non. Daong 1,5 triệu đồng/ sa bilan ka gru pato phổ thông công lập di dom janih pato kan pilih ruah hu menuac pato,  gru pato di dom labik pato pakai công lập di dom labik kan pilih ruah hu gru pato. Tukvak daong rilo abih lac 9 bilan sa thun bac. 

Dalam 10 thun tapa, danak dak “Jalan meriak bhong” di tỉnh Kiên Giang  hu taduan labaih 204 ribau đơn vị darah, kuhria tui jien labaih 154 tỷ đồng. Tapa dom bruk  ngak nan, yaok ribau kapol nyaom, urang, baoh sang ngak biak siam dalam bruk halan hatian alin brei darah hu pok meyaom, yaok rituh  bruk “Bhap bini gheih ja ba” pakat  cơ sở, pakat huyện saong pakat tỉnh tapa bruk halan hatian alin brei darah hu taduan brei ngan kuhria tui jien abih tih labaih 6 tỷ 500 rituh trieu dong.

Labaih 1 adit tapa, di ban Cần Thơ, menuac sia nao klauk vaccine  bạch hầu tagok jang labaih 30%. BS.CKI Huỳnh Thanh Triều, Pasak pasang iek ruak kik (CDC) Cần Thơ brei thau, gah y tế ban Can Tho daok brei patagok pasang iek, khik ramik kapul ngak bruk samar drah pacang jit, hu mbaok pacang caga tuk jit ruak meda rah tabiak. CDC Cần Thơ jeng hu panuac kakei lac, dom menuac hu ruak dalam rup, patrun prein pacang caga ruak, njauk nao klauk taong abih janih vaccine, oh lac sa janih bạch hầu piah pacang caga ruak njom mbak. 

Kong an tỉnh Bình Phước chap mek hu bruk cá độ caoh mbanh dat blong tapa online haong yaom jien me-in abih tih labaih 50 tỷ đồng. Dahlau nan, gah chức năng  hu duah mboh dom urang daok di huyện Hớn Quản jak gauk main cá độ mbang jien tui dom mbang dat blong di Giải caoh mbanh vô địch Châu Âu (Euro 2024) saong  Giải caoh mbanh vô địch Nam Mỹ (Copa America 2024). Dom urang nan hu pambuak urang ngak cái cá độ caoh mbanh angaok mạng piah taduan tài khoản cá độ saong parabha jeng rilo tài khoản sit, jao ka gauk gar drei peih bruk main cá độ mbang jien.

Bruk kurang điện ngak ka rahra saong doanh nghiệp di Ukraine brei ba drei tame ka nyu lagaih haong langik pandiak bhang. Bilai pasang iek địa vật lý negar Ukraine brei thau lac langik pandiak tal tanut glaong di abih, lac 34,2oC di Kiev. Tui kuhria, dalam dom harei anak tal, langik daok pandiak khang jang. Pandiak bhang daok ngak khat lahik praong ka kinh tế Ukraine. Bruk paik, yuak bilan pala meda trun tal 30% di dom bhum gah kreih, gah meraong saong gah pai. Mintri Năng lượng Ukraine hu panuac ieu menuac pandar brei patak pataom điện saong patrun patakik bruk pandar dom jamriak hu công suất praong piah khik tani tanat jalan talei điện.

Pluh thun hadei di bruk laik sruh haok MH17 di hãng kapal haok Malaysia Airlines pak Ukraine,, Hà Lan peih bruk pahadar  praong prang  piah hadar 298 urang metai. Dalam var peih ngak nan di labik pahadar  MH17 pak palei Vijfhuizen jaik ban ine Amsterdam, urang gauk gar di dom urang plang lahik iew khang angan di taong abih dom urang metai nan. Harei 17/7/2014, kapal haok  MH17 pal meng ban ine Amsterdam nao  Kuala Lumpur (Malaysia) laik trun kayua njauk ten lua angaok langik gah Timur Ukraine, ba tal taong abih 298 urang metai.

 Bilan 6, bilan 7 yaok thun, meyah nao tal Ấn Độ, tuai hu mboh dom harei pataom pa-ok biak gheih. Ini lac tukvak tabung glaong di bilan paik baoh pa-ok, hu maong lac patao di dom janih baoh pak di Ấn Độ. Ấn Độ lac negar pala rilo pa-ok abih di dunya, hu tal meteh sản lượng pa-ok di dunya. Saong hu tal labaih 1.000 pajaih pa-ok karei di gauk. Yaok janih pa-ok hu pandar sa jalan karei di gauk, oh salih atau srau meluk tame hu. Baoh pa-ok urak ini oh lac sa janih pandap mbang bo daok lac janih baoh ngak brei hadah mbaok mata taneh ia Ấn Độ piah yaih khan tal ayut sahabat di dunya./.