Meng harei 31/7 mbiah tal harei 6/8, dom anek saih  hu tut angan  saong ramik veik hatai caong hu jak jeng di He thong daong palih ruah haong gauk di Mentri Pato megru brei kak jien tut angan palih ruah tui jalan online piah ngak brei salah bruk tut angan palih ruah tame đại học thun 2023. Mentri Pato megru tacei tabiak cambaic laic, anek saih brei kak jien tui Online di angaok He thong palih ruah, oh brei bayar jien di jalan halei karei. He thong tut angan palih ruah đại học, cao đẳng thun 2023 brei adat ka anek saih palih ruah 1 dalam 17 jalan bayar jien karei di gauk ( hu angaok blah web  Cổng Dịch vụ công Negar ) piah kak jien palih ruah.

Urak ini bhum ĐBSCL hu 2 jalan nduac samar daok hu peih ngak, lac jalan nduac samar trục dọc Cần Thơ - Cà Mau saong jalan trục ngang tukvak 1 Châu Đốc - Cần Thơ - Sóc Trăng. Tui taong yaom di Mintri jalan mbak pajeng ba, ini lac dua jalan nduac samar hu bruk jao mbaok taneh siam. Kuhria tal urak ini, jalan trục dọc hu ngak jaik salah bruk peih mbaok jalan. Daok jalan trục ngang hu 76%, mbaok taneh ini pabak hu bruk peih ngak. Dom mbaok taneh daok veik, dom palei daok buh abih prein tame piah ngak salah tui njauk jalan ba tabiak, rik daong jhul samar bruk peih ngak danak dak.

Labaih sa thun tapa, Mban Bangsa saong bol lin bien phong tinh Kien Giang hu caik hatai dalam bruk pambuak gauk pathau khan, jak ba bhap  bini dom bangsa, abih di nyu lac bol bhap di labik tapen negar, kaoh pulao  pataom tame ngak mbang patagok kinh te -xa hoi, patruh iek patrun kathaot; ba drei tame  khik caga taneh riya palei negar, khik brei samalat siam mekre…Thun 2022, Kien Giang peih tabiak 365 var pathau khan, jak ba bhap bini  peih ngak siam dom jalan tacei ba di  Đảng, hukum di Karja, hiep dinh, hukum tapen negar, Hukum Tapen negar di taneh ia; dom sarak bangsa agama..brei ka jaik 4 ribau urang hu mbaok tame bac. Peih 5 tal bac pabak ilamu bangsa ka 216 urang jakar, cong chuc, vien chuc…peih 1 tal pabak ilamu  bangsa ka urang jakar saong urang lin dom  Đồn, Balai Biên phòng. (VOV)

 Sang iek ruak Hùng Vương, TP.HCM hu peih bruk pasang iek prein yava oh mek jien ka jaik 300 uranaih manek tabiak di dalam pasak jit ruak COVID-19.  Yaok uranaih meda hu bac si gah uranaih pasang iek prein yava saong hatai sahaneng. Mayah mboh ruak kik, dom uranaih hu taong ruak patui di nan. Hadei di tuk pasang iek ruak, dom uranaih daok hu taduan pandap saong 2 trieu jien mbaok.

Mbiah tal melam 31/7, hajan ia sua ngak ka huyen Định Quán saong Tân Phú,  lac  2 huyen gah ngaok kraong Đồng Nai, tỉnh Đồng Nai khat lahik labaih 2.000 tấn ilan, labaih 500 ha phun pala dauk dalam ia, jaik abih lac hamu padai. Kuhria khat lahik jien padai labaih 200 tỷ đồng. Urak ini gah chức  năng daok pataom urang jakar bol lin  hu mbaok  piah daong bhap bini pacang ia sua, srong ikan metai tagok ar. Gam haong nan, duah thau, yaok iek dom baoh sang  khat lahik  kayua bala meng langik tasik piah hu jalan daong.

        Hội đồng Quốc phòng saong An ninh negar Myanmar (NDSC) harei kabroi (31/7) hu brei dui atah tavak samar drah di negar ini suai jang 6 bilan, gam haong nan jeng brei thau ka bruk an ninh dalam taneh ia ka oh tani tanat piah peih bruk Tổng tuyển cử. Bruk samar drah hu ba tabiak di Myanmar hadeu di mbang mesuh gauk biak khang di bol lin rajaei saong dom kapul bol par phao kraong di dom bangsa di Myanmar meng bilan 2/2021 saong hadei di nan hu brei dui atah tukvak jang 3 mbang, yaok mbang 6 bilan. Yaok rabau urang Myanmar metai dalam dom mbang mesuh gauk kuhria meng bruk srau kadau  di negar ini di akaok thun 2021.

       Mentri Ngak nong Hàn Quốc harei 31/7 khan lac sa drei meyao di ban ine Seoul metai hadei di tuk ruak jalan suak yawa, yaom lac hu taong ruak blaoh. Dom bruk dut iek ruak hadei di nan mboh meyao nan njom anek ruak kum manuk ada H5N1 ngak ruak trak. Adit dahlau, Hàn Quốc hu dua drei meyao di Seoul metai kayua kum H5N1. Tal urak ini, dom urang hu taom gaok meyao oh mboh ruak hagait karei saong oh hu thei njom ruak H5N1 tapa manuac atau meyao, athur karei.

        Jabat khik caga jalan tapen negar châu Âu brei thau, bruk urang tame suan hukum di Liên minh châu Âu tagok tal 10% dalam mateh akaok thun ini dut saong tukvak ini di thun dahlau, dalam nan urang di cư rilo meng lac nao tapa jalan Địa Trung Hải. Tui pathau khan di Jabat khik caga jalan tapen negar châu Âu, dom mbang tapa tasik di Pasak Địa Trung Hải tagok tal labaih 33% saong jalan di cu meng Tunisia tame Italia tagok khang. Akaok bilan ini, EU hu mbaoh tangin tame sanya haong Tunisia piah pacang cakak bruk di cu suan adat hukum tal dom taneh ia EU./.