Tui UB bangsa, bruk oh hu nao bac thun ini duk haong thun 2019 di dom bangsa takik mboh trun ralo. Dalam nan, bangsa Hà Nhì di Lai Châu, Điện Biên, Lào Cai trun tal 15%; bangsa La Chí di Hà Giang, Lào Cai trun labaih 14%; hadei di nan lac dom bangsa Co di Quảng Nam, Quảng Ngãi; bangsa X’tiêng di Bình Phước; bangsa Raglai di Ninh Thuan, Khánh Hòa takik klak bac duk haong dahlau diah…Bruk nan brei mboh bruk pato bac, abih di nyu lac bruk pato brei thau akhar  hu tanut chuan pakat 1 saong pakat 2 hu sangka, caik hatai. Bruk pato akhar ka urang bangsa takik di bhum kan kandah biak hu lagaih.

Di Nyaom biai mbang ka 29 - HĐND tinh Binh Thuan mbang ka XI, amuk Thanh Thị Kỷ - Akaok Mban Bangsa di HĐND tinh Binh Thuan brei thau, urak ini daok 33 xa oh ka dut iek, ngak harak gar taneh piah brei harak pandar taneh. Dalam nan rilo meng lac bhum mikva bangsa takik. Kayua nan amuk Thanh Thị Kỷ caong khin UBND tỉnh pato tacei dom gah pambuak tal brei jhul khang bruk peih ngak ka samar drah salah blaoh dalam thun 2025, piah mikva bangsa takik hu mbang tui hukum hu daong sarak padang sang daok.

UB bhap bini tỉnh Bến Tre daok samar peih ngak cati catang dom jalan pacang taong ikan suan hukum IUU saong caga tani tanat, pabak dom asar karja duh Kapol Pasang iek di Uy ban chau Au (EC); dalam nan, tinh pataom tame pasang iek, brei harak adat taong mek kaya tasik, tui iek gilai ikan ngak mbang di tasik saong langyah gilai ngak suan hukum chap mek kaya tasik suan hukum, oh khan brei thau; tut angan gilai “3 oh” lac: oh hu tut angan, oh hu pasang iek, oh hu harak adat tui hukum ba tabiak.

Meng peih ngak dom jalan langyah pacang caga, meraik gauk nan ka bruk njauk duas dalam TP.HCM hu pasang iek, hu patrun taong abih di dom gah. Min, urang duas haong bruk me-in jru phil jeng daok srau kadau. Tui Thượng tá Nguyễn Thăng Long, Phaok Jabat Tham mưu - Kong an TP.HCM, dalam 11 bilan tapa, Kong an ban raya hu duah mboh 3.160 mbang ikak pablei jru phil, tagok labaih 50% dut haong tukvak ini thun dahlau.

Tinh Ca Mau hu taneh glai praong labaih 94.300ha, hu dua he sinh thai di glai dauk ia mbak tapen tasik saong glai tram njom lakhun. Dalam nan, glai tràm U Minh Hạ hu taneh praong yaom 35.000ha saong dom makna praong glaong di sinh hoc, saong ralo pajaih anek athur yau lasa, pabui glai, kra, lathuh, klain, ula, kara nduk, te te…saong 60 pajaih ikan ia taba, ia mamih diuk rai. Tapa nan, bruk khik caga anek athur glai pak ni biak praong, Tukvak tapa, jabat chuc nang tinh Ca Mau hu pasang maong iek khik caga anek athur glai ni.

Tapa roh duah saong brei hatai caong khin di Nyaom biai taong abih Mban Chap hanh trung uong Ndang mbang ka 9 mbang XI, Trung uong Dang rahra cach mang Lào hu brei panuac ndom saong pato tacei dalam bruk salih Hukum negar thun 2015. Bruk salih ini brei pasiam veik dom pakat karja Taneh ia khik kajap hu siam lagaih glaong, ngak jeng hadah krah bahrau dalam bruk pacang khik saong padang negar, pambuak ngak mbang kinh te haong dom negar dalam labik saong dunya, jeng yau padang hukum saong dom asal kadha hukum, piah khik kajap jalan chinh tri di Ndang, bruk pasang iek, dui ba di Karja Taneh ia dalam jaman bahrau.

Tong thu ky Liên Hợp Quốc cati catang kakei bruk daong iek manuac sia biak samar ka bhap bini pak Syri saong gilac veik mai ngak bruk chính trị ala tacei ba daong di Lien Hop Quoc piah pa-abih bruk methuh metak sre darah matai lihik. Ong ieu “Taong abih gah hu gaok kan kandah nan marat ngak bruk di drei kayua bhap bini Syri daok ciuk rambah rambeip livik paje” saong caong khin  taong abih gah nan brei ngak  bruk daong iek bhap bini.

Yaom sang daok di negar Anh dalam bilan 11 mboh tagok samar drah abih dalam 2 thun. Yaom sang daok tagok samar hu jhul tagok meng bruk kinh te siam lagaih jeng yau takik urang oh hu bruk ngak, patagok jien bilan khang kajap, jien laba hu brei trun biar saong jien sraiy jien mek tame di baoh sang daok di tanut biar abih hu kuhria meng kreh dom thun 2000. Taphia nan bruk Gilang pariak Trung uong Anh dua mbang brei trun jien laba dalam thun ini trun tanut urak ini lac 4,75% hu jhul tagok dom harak mesraiy padang pandap piah blei sang daok hu mbaoh tangin./.