Lien ndoan Lao dong Ban Dĩ An, tinh Binh Duong barau peih ngak danak dak “Tet jum pataom – Xuan dhar phol Ndang”, alin pandap Tet, ve radaih, ve radaih pui, ve kapal ahaok daong ka urang ngak kong mai palei uan raok Tet. Dalam nan alin labaih 80 paok pandap ka dom urang kong ndoan, urang ngak kong ruak kan si dhit saong njauk bala dalam bruk ngak, ruak kayua bruk hit. Alin hadiah 8 ve kapal ahaok, 85 ve radaih pui saong daong ve radaih ka 500 urang kong ndoan, urang ngak bruk rambah mai palei raok Tet. Tui nan, alin 2.500 paok pandap ka dom urang ngak kong kan kandah oh hu jien mai palei.

Di tỉnh Bình Phước, kong ndoan dom pakat kuhria brei mek tabiak meng kadung jien kong ndoan meng 38 tal 40 tỷ ndong piah ngak dom bruk: “ Tet jum pataom - Xuan dhar phol Ndang”; “ Danak Tet kong ndoan thun 2025”; daong 500 harak ve radaih mai gilac veik ka urang ngak kong, urang ngak dalam tỉnh nao palei mbang Tet di dom bhum palei Barak negar; rivang, tadhau ayuh Tet saong alin labaih 12.000 paok pandap ka urang kong ndoan, urang ngak gaok kan kandah…takik abih lac 500 ribau dong sa urang.

Huyen Chau Thanh, tinh Soc Trang hu ralo mikva bangsa takik diuk rai. Hadei 13 thun padak padang palei pala barau, urakni dom baoh sang kathaot saong jaik kathaot hu patrun daok 3%. Jalan mbak nao mai, kraong rabaong, sang bac hu sangka buh jien tame ngak tani tanat, dom jabat ilimo jang hu sangka buh jien tame ngak piah pabak tui hatai caong ma-in, pasram padhih di mikva. Bhap bini bui sambai raok bal pataih barau saong caong lac mbaok mata palei pala hu ngak laneing lanoi, hacih sa-at, rai diuk kaya pandap, sahaneng daok hu veih tagok glaong.

Urak ini ia kraong Mê Công tuh tame  Bhum taneran kraong Cuu Long trun ngak ia mbak tame samar. Tui kuhria bilan 1 ini, ia mbak njom tame dom pabah kraong saong tagok glong dalam bilan 2 tal bilan 4. Tui Rayo kuhria mboh dahlau  langik tasik tinh Sóc Trăng, meng ini tal puac bilan hu dua mbang njom ia mbak samar saong dalam. Ia mbak ralo abih di dom balai glong jang tukvak ini thun dahlau la 0,1- 2,8 angaok sa ribau. Piah caga bruk pandiak bhang tua riya, njom ia mbak thun ini, tinh Sóc Trăng hu caga dahlau jalan ngak, piah khik siam bruk pala drak, ia pandar ka rahra. Dalam nan, peih bruk cakuac ribong 79 labik, padang ngak 13 danak dak pacang ia sre ar binek.

Tui kuhria mboh dahlau di Labik Pasang iek Langik Tasik tinh Ca Mau, ia di kraong rabaong dalam tinh daok tagok tui malam ia bilan bak baoh bilan 12, ia tagok glaong abih lac meng ni tal harei 20/1. Ni lac sa tukvak ia tagok, langiu di angin pur barak daok yuk khang tame gah maraong. Yau nan ye, ia di dom kraong rabaong tagok ngak dauk ralo bhum taneh biar saong jaleih ar kraong, ar tasik…Anak bruk ni, Mban Chi huy pacang caga alam langik, daong bala saong Pacang khik bhap bini tinh Ca Mau pandar dom karja bhum palei pandar tani tanat danak dak braong, banek, kadai mbem…piah khik bruk pala drak, raong glang.

Tui harak mbaok Nation Thailand, dom gilang pariak pablei salih di Thái Lan daok caga yaok ribau tỷ USD jien mbaok piah pabak ka bruk pandar parilo dalam tuk Tet Nguyen ndan jak tal. Jien nan hu pandar piah ba mbuan lagaih ka bhap bini cai pandar jien tapak piah lixi, blei pandap, yulit saong dom bruk karei. Langiu di nan, dom gilang  pachreih urang pandar dom ung dung ky thuat so piah lixi, cai pandar.

Kum manuk ada H5N1 daok kanjah jhak oh ka mboh, daok pambak praong tal dom janih anek athur saong hu pambak tal manuac. Dom urang ilimo hu ghak, dunya daok yam tame sa jaman barau, labik dom jit ruak njom mbak oh tok mboh sa pajaih anek athur bo daok pambak tal ralo anek athur karei. Tui dom urang ilimo, bruk sa janih virus barau mboh saong mbuan ngak tabiak jit ruak praong di dunya oh thau tukvak lei.

Jabat Y te di KHQ brei panuac kakei dom taneh ia dalam bhum negar châu Phi ka mbnag tamuh dom urang ruak dreih yau ruak kayua virus Marburg rah tabiak di Kagera di Tây Bắc Tanzania. Tui mang xa hoi X, Tong Yam ndoc Gah Y te dunya khan lac, kuhria tal ini hu 9 urang ruak medil lac kayua virus nan di Tanzania, dalam nan hu 8 urang metai. Tui Gah Y te dunya kuhria dahlau dalam dom harei anak tal meda hu rilo urang njom ruak ini./.