Ong Lê Tùng Vân dalam sa mbang ngak bruk haong jabat chức năng

Dom bruk ngak suan adat hukum di "Tịnh thất Bồng Lai" (hadei di nan salih angan ieu lac "Thiền am bên bờ vũ trụ") daok di xã Hòa Khánh Tây, huyện Đức Hòa, tỉnh Long An, tukvak tapa ngak pandik hatai menuac sia. Piah khik caga quyền uraniah, peih ngak Hukum Uranaih, Mintri Lao động - Thương binh saong Xã hội hu panuac ieu dom tỉnh ban caik hatai sangka, daong palagaih saong gam gam pasang iek bruk iek glang, raong pato, daong ka uraniah metui medar jeng yau uranaih metui meng jit COVID-19, khik ka uraniah metui hu iek glang, raong pato siam meng rup pabhap tal hatai sahneng, brei sangka dahlau bruk iek glang raong pato di gauk gar uranaih nan tui njauk adat hukum, pasang iek bruk jak ba menuac sia, pandar dom pok jien jak ba di dom labik daong bruk xã hội, kadung jien ngak pahla ka bruk iek glang, raong pato, daong ka uranaih njauk bruk, njauk menuac urang tui bruk ba tabiak di adat hukum.

Di mbang nyaom oh kuhria dahlau kayua Mintri Công thương peih tabiak di bier harei kabroi 12/1 ka bruk kaya nong njauk gar viek di dom pabah mbang negar dalam tukvak tapa, Thứ trưởng Mintri Công thương Đỗ Thắng Hải brei thau lac, sa dalam dom makna ba tal bruk nan lac kayua dom janih kaya nong di taneh ia drei daok pagam pmbak biak rilo tame bruk pablei salih tui jalan tiểu ngạch. Ngan haong dom kaya nong di taneh ia drei, bahrau hu 9 janih baoh kayau hu brei adat pablei tabiak negar langiu tui jalan chính ngạch. Dom pandap hu makna praong bo khol drei daok ngak tabiak rilo, yau ye ralaow pabui bahrau pablei tapa hu dom darak pasa, min jeng ka oh hu cambaih laih pablei tapa darak pasa Trung Quốc.

Yaom lac brei trun takik taneh pala, hu sang oh trun pajaih bilan Tết min yaom njam patam di Bà Rịa – Vũng Tàu jeng daok trun khang. Tui nan: súp lơ 13 rabau đồng sa kg, cải xanh, njam sabei 2.000 đồng sa kg… trun meng 6.000 đồng tal 10 rabau đồng sa kg duk haong yaok thun, dalam tuk yaom khak, yaom jru khik caga phun pala nyu tagok glaong. Daok rau cần tây, dom harei tapa oh hu menuac blei nan ye urang pala brei buac klaak. Sở Ngak nong saong patagok palei pala tỉnh bà Rịa- Vũng Tàu hu panuac kakei lac, piah pablei njam patam hu siam di tuk dahlau saong hadei meng Tết Nguyên đán, urang nong jhui pataom tame pala sa janih bo njauk pala rilo janih njam karei di gauk di angaok sa mblang taneh. Abih di nyu lac, urang nong njauk pala parai tabiak, pala dahlau – hadei piah hu njam pablei hadei di Tết. 

Pambuak tal bruk Tập đoàn Tân Hoàng Minh klaak jien caik cọc blei lô taneh 3-12 labik chức năng ka 3, di labik đô thị bahrau Thủ Thiêm, ong Ngụy Cao Thắng, Giám đốc Pasak Dịch vụ pablei salih to yaom drap ar Ban raya HCM brei thau: tal tukvak ini, pasak ka oh taduan hu harak ka bruk padieh blei lô taneh 3-12 dalam labik Thủ Thiêm meng labik njauk to yaom lac Công ty TNHH đầu tư sang danaok taneh riya Ngôi Sao Việt (di Tập đoàn Tân Hoàng Minh). Tui adat, Pasak meda peih bruk to yaom viek, daok paok jien bo Công ty Ngôi Sao Việt caik cọc blaoh, nyu hu ka gah pablei, nan lac buh tame kadung jien kanja.

Biar harei 12/1/2022, Phòng Cảnh sát kinh tế Công an tỉnh Bạc Liêu bahrau ngak salah bloh harak taong phạt hành chính sa labik pablei salih ka bruk pablei salih labaih 3,7 tấn pandap mbang oh hu harak gar saong oh thau meng halei mai di labik Khóm 2 (Phường 7, ban sit Bạc Liêu, tỉnh Bạc Liêu) kayua ong Trang Hoàng Anh, ndih tapui thun 1978, ngak po. Puac thun lac tukvak pablei pandap pakauk, pablei salih pandap ja biak rilo, nan ye urang blei njauk caik hatai sangka tuk blei pandap.

Kapul gru pato tiểu học France brei thau lac hu 75% gru pato tiểu học di dalam taneh ia France meda peih bruk jak gauk padieh pato di harei ini (13/1) piah brei thau bruk oh njauk hatai adat pacang caga y tế. Tui adat hu pandar meng harei 03/1, dom anek saih taom gaok haong urang dương tính meda njauk dut iek 3 mbang dalam 4 harei, ngak sarau kadhau danak dak bac jeng yau ngak kan kandah tal bruk ngak di dom amaik ame anek saih njauk padieh ngak piah baa nek nao dut iek. Dahlau di nan, harei 11/1, yaok ribau urang y tế dalam dom sang iek ruak công di rilo tinh, bal di France hu trun jalan biểu tình caong ngak pasiam viek labik ngak bruk anak bruk tapa prein ngak dui atah.

Tui yaok pataom harei 12/1 di Mentri Lao động Mỹ brei mboh, chỉ số yaom blei pandar di taneh ia ini tagok 7% dalam thun 2021, tagok glong abih kuhria meng thun 1982. Dom jabat karja Mỹ mboh lac, dom chỉ số tagok yaom ngan saong sang daok, ô tô pandar blaoh saong radaih tải “dom bruk rik daong ralo abih ka bruk tagok yaom taong abih janih pandap hu ramik tui bilan”. Yaom kaya pandap glong jang jeng hu taong yaom dalam harak pathau khan birau abih di Mentri LĐ saong lac sa bruk rik tame njauk caik hatai tame lạm phát.

Njauk kan kandah meng panuac ieu padieh ngak meng manuac sia haong dom urang jakar Anh dak harei dak tagok glaong ngan haong Thủ tướng Anh Boris Johnson hadei di tuk ong taduan lac ong hu mbaok tame mbang taom gaok rilo manuac hu peih tabiak di Jabat Thủ tướng Anh di bilan 05/2020, lac tukvak bo taneh ia daok pacang veik piah pacang caga jit Covid-19. Yaom lac hu panuac lac njauk di nyu brei ngak karei nao, min ong Boris Johnson oh javap jalei panuac tangi sua lac padieh ngak Thủ tướng Anh halei oh saong brei thau lac daok cang panuac puac abih di bruk pasang iek, duah thau./.

Urang lang: Thu Thao – Bhumi – 13/01