Pahadar 78 thun Harei Thuong binh - Liet si, TPHCM birau peih var pataom mbaok urang ngak bruk cach mang naih gheih. TPHCM urak ini sangka daong ka taong abih Amaik Viet Nam Anh hung daok diuk hu don vi taduan raong ba; taong abih xa, phuong di Ban raya ngak siam bruk sangka kuhria ka urang thuong binh, liet si. Tukvak anak tal, Ban raya sanya brei ngak ginup, sumu dom harak gal daong, jien phu cap, sang daok, BHYT, dieu duong, pato megru…ka urang ngak bruk daong taneh ia saong gauk gar di urang.

Bingun ini, tỉnh Vĩnh Long padang dom kapol urang jakar nao rivang, alin pandap ka 600 baoh sang dalam sarak karja, urang ngak bruk daong taneh ia saong gauk gar liet si; gam rivang dom baoh sang dalam sarak karja daok iek ruak di dom sang iek ruak tinh. Mbiah tal ini, dom bhum palei hu salah blaoh bruk alin kaya di Po negar ka 66.266 urang hu ngak bruk saong gauk gar di urang. Njauk ndem tal lac, tinh daok samar ngak salah labaih 200 baoh sang piah alin ka urang ngak bruk daong taneh ia saong gauk gar liet si dahlau harei 27/7 anak tal.

Kayua ribuk ka 3, dom harei tapa, rilo palei di Bhum taneran kraong Cuu Long hu hajan praong gam hagin khang, ngak yaok rituh baoh sang glut jaleih, par tabung, jaleih hun kayau; rilo var ro, bein phun mbang baoh, hamu njam patam di  bhap bini khat lahik. Di tinh Tay Ninh, hangin khang ngak 9 baoh sang di xa Tuyên Thạnh par tabung saong khut tayak trak. Karja bhum palei daok daong bhap bini ramik pasiam veik hadei ribuk, tani tanat raidiuk ka rahra.

Pak di tinh Dong Thap rah tabiak hajan praong gam hangin khang, ngak jhak tal 16 xa, phuong khut tayak 104 baoh sang bhap bini. Patuah oh hu thei njauk hagait. Hangin khang ngak jaleih 108 phun durien, 15 ha padai jaleih ndih, kuhria khat jien labaih 1,3 ti dong. Rilo phun kayau saong taneh pala njam patam di bhap bini jeng jaleih, dauk dalam ia. Kuhria khat jien padai kayua bala meng langik tasik dalam dua harei tapa labaih 2,2 ti dong.

Di tinh Lam Dong, mbiah tal ini, yaom lac dom doanh nghiep pablei baoh thanh long tabiak negar langiu  tapa darak pasar chau Au hu ngak ginup karak gal ho so, harak gal di jabat chuc nang, min quy trinh brei harak chung nhan daok tavak tavaiy oh ka langyah hu, yaok rituh tan baoh thanh long saong rilo janih kaya nong karei daok jaik tuh klak. Tui Hiep hoi Thanh Long Binh Thuan, bruk nan kayua So Khik brei hacih kaya mbang TPHCM daok cang jabat chuc nang brei panuac. 

Karja Tong thong Donald Trump birau khan brei thau labaih 240.000 blah harak gal pambuak tal bruk pametai urang ngak praong di phong trao quyen bhap bini Martin Luther King. Dahlau di nan, akaok thun ini, ong jeng hu ngak brei cambaic laic yaok ribau ho so pambuak tal bruk metai di Tong thong dahlau diah lac John Kennedy thun 1963 saong Thuong nghi si Robert Kennedy thun 1968.

Urang metai kayua eik lipa daok ralo veik samar di Dải Gaza tuk takik abih lac 20 urang metai kayua eik lipa dalam 48 tuk tapa. Bruk lavang lavaih saong metai kayua iek daok ngak metai rilo urang Palestine samar jang tuk halei abih dalam luac 21 bilan mesruh metak meng blaoh. Kuhria dalam 24 tuk jaik ini abih hu 1 kuman hu menek tabiak birau hu 6 adit gam 3 uranaih karei metai kayua eik lapa.

Chau Au daok dang anak bruk pandiak catang abih dalam thun ini, tuk pandiak tagok glong gam gam di dom harei anak tal. Langik pandiak nan oh lac ngak jhak tal dom mac ndien saong mbuan apui khuah glai, bo daok ngak jhal tal prein yawa rahra. Italya ba tabiak panuac kakei pakat bhong meriak - lac pakat glong abih di 16 ban raya di taneh ia ini. Karja iew rahra brei pabah ia ginup saong takik tabiak gah langiu tuk langik pandiak glong piah trun bruk mebuh pandiak./.