Pahadar 78 thun Harei negar Cộng hoà xã hội chủ nghĩa Việt Nam (2/9/1945 – 2/9/2023), dah page ini 31/8, dom urang pan akaok, urang pan akaok Ndang, Kanja dahlau deih gam haong dom mintri, dom gah saong ban ine Hà Nội hu mai caik bingu saong tame Lăng rivang jirah Chủ tịch Hồ Chí Minh. Paok bingu di Kapul hu talei akhar haroh "Miat miat hadar dhar phor di Chủ tịch Hồ Chí Minh praong uranam". Anak rup tau di Chủ tịch Hồ Chí Minh, dom urang pan akaok Ndang, Kanja brei mboh hatai biak thau dhar phol, iek praong, iek glaong, hadar miat miat prein yava di Chủ tịch Hồ Chí Minh ngan haong bruk mesuh metak, peih paha bangsa, yasa taneh ia, dak padang  negar Việt Nam xã hội chủ nghĩa.

Di TPHCM, jeng dalam mesup ini (31/8), urang pan akaok Thành ủy - HĐND - UBND - UBMTTQ Việt Nam TP.HCM hu mai am cuh gilau, pok bingu tagok CT Hồ Chí Minh, CT Tôn Đức Thắng di tuk pahadar 78 thun Harei CM bilan 8 saong Harei negar 2/9. Kapul kayua UV Mintri Chính trị, Bí thư Thành ủy TP.HCM Nguyễn Văn Nên dang akaok. Di Miuyim Hồ Chí Minh – dhar ban raya HCM, kapul hu lambaok ka taong abih urang jakar, urang lin saong bol bhap rahra ban raya hu ngak adat hadar tal CT Hồ Chí Minh – urang caik abih rai ka bruk CM, ka độc lập bangsa.

Jabat akaok negar brei thau, peih bruk ngak, quyen tui adat di Hukum negar saong hukum, tui panuac likau di Chánh án Tòa án bhap bini pakat glaong, akaok Viện Kiểm sát bhap bini pakat glaong saong akaok Jabat akak negar, hadei di tuk pasang iek, sahneng kuhria rilo gah, akaok negar Võ Văn Thưởng  brei patrun duas meng “tử hình” trun daok guk luac rai ka 11 bị án. Tapa nan brei mboh bruk khoan hồng di Đảng, Kanja drei, peih ka dom urang ini hu jalan diuk, hu jalan mai veik haong gauk gar, puk paga.

Hadei di rilo thun padang ngak, 2 gah tatua Mỹ Thuận 2 meda hu pambuak gauk di pak kreh tatua di jhung thun 2023. Tatua Mỹ Thuận 2 atah abih tih 6,61 km, dalam nan tatua praong atah 1,9 km, hu 6 jalan radaih, nduac hu 80 km/h. Abih tih phun jien buh tame ngak lac 5.000 tỷ đồng. Ini lac tatua praong abih kayua dom nhà thầu Việt Nam cih palang saong padang ngak. Nan ye tatua Mỹ Thuận 2 hu Mintri jalan mbak pajeng ba Việt Nam caik hatai sangka praong di abih meng tuk peih tabiak ngak tal tukvak daok padang ngak.

Mbang padeih lễ 2/9 thun ini, rilo labik main di dom tinh, ban gah maraong negar hu rami ramik ngak biak gheih mata, caga duh ka tuai damuai. Min, dom tuai kakei tour trun rilo. Tui dom doanh nghiệp du lịch di tỉnh Kiên Giang,dom tuai kakei tour trun labaih 30% dut saong dom thun dahlau. Rlo labik main di ĐBSCL jeng daok cang maong tuai mai tal main sinh thái. Daok di ban Phan Thiết, tỉnh Bình Thuận tukvak lễ ini rilo labik ma-in meda tabiak mbaok dom labik main bahrau yau ye dom dịch vụ lều bạt langiu langik, nduac asaih, cuh haning, dom drei athur bahrau, ka oh bhian mboh; dom baoh sang lều deih yau pak Bắc Âu; bruk bein athur mini, gam haong dom danak dak parang main daoh tamia di melam.

Mai ravang darak pasar ikan praong abih di Tokyo, Thủ tướng Japon Fumio Kishida khan lac ba tabiak dom jalan ngak piah daong gah taong cap kaya ikan, kayua gaok adat pakauk meng Trung Quốc. Tui nan, rajaei Japon meda ieu pataom rilo phun jien jang, tagok tal dom pluh tỷ Yên, lac yaok ratuh triệu Đôla Mỹ, meng kadung jien khik piah di rajaei piah daong gah taong cap kaya ikan. Thủ tướng Nhật Bản brei thau, dom jalan daong hu gam bruk daong ka bhap bini patagok dom jalan pablei pandap bahrau, peih ginum biai haong Trung Quốc.

Hãng thông tấn negar Triều Tiên (KCNA) brei thau lac Bol lin bhap bini Triều Tiên hu peih sa mbang pasram mesuh hạt nhân di melam 30/8, piah cagar veik bruk pasram mesuh daok hu peih tabiak di Mỹ saong Hàn Quốc. Dalam nan, hu bruk ngak dreih lac taong ralai dom pasak pato tacei saong mblang kapar haok praong di Hàn Quốc. KCNA brei thau lac, bruk pasram mesuh yau panuac cagar veik khang payua tal Mỹ saong Hàn Quốc. Dahlau di nan, urang pan akaok negar Triều Tiên Kim Jong Un hu nao rivang sở pato tacei pasram mesuh di Bộ Tổng tham mưu KPA piah duah thau ka bruk pasram haong bruk hu mbaok di taong abih bol lin negar ini.

Dalam thun ini, Mintri ngak nong Israel meda daong abih tih 15 triệu NIS (lac 4 triệu USD) piah pachreih urang nong taneh ia ini pandar ilamu tame pala tamun, traong ndaiy saong baoh meriak – 3 janih praong brei hu dalam pandap mbang “sa lát” meng kan di urang Do Thái, piah khik ramik sản lượng luac thun, oh pagam pambak tame bilan pala atau langik tasik. Pok jien daong ini piah khik kajap bruk lac dom janih njam patam baoh kraoh that hu mbaok dalam dom siêu thị luac thun, daong khik ramik  hu ginup pandap mbang kayua kein laba di urang blei mbang./.