Tui Mintri Khau tin saong Truyền thông, kuhria tal puac thun 2022, dom urang pandar Internet di Việt Nam labaih 70 triệu urang, meblah labaih 70% rahra; internet hu pabak labaih 99,7% dom puk palei di dalam taneh ia. Min, di bhum bangsa takik saong bhum ceik, bruk daong ka rahra pambuak haong internet, phone par tangin daok gaok rilo kan kandah. Dom baoh sang bangsa takik pandar dịch vụ internet rilo labik daok bier yau ye bhum bangsa La Hủ, Chứt, Mảng... Tui dom urang ilamo, piah langyah dom kan kandah, tavak tavaiy nan, caong hu dom sarak piah daong ka dom doanh nghiệp pabak dịch vụ viễn thông; caong paglaong prein ka urang jakar ngak gah khau tin saong truyền thông di bhum atah biyar; rami ramik padang ngak cụm khau tin điện tử rahra di bhum tapen negar saong pabak khau tin pathau khan di dom xa bhum tapen negar.

UBND tỉnh Bà Rịa-Vũng Tàu bahrau mbaoh tangin tame 17 harak phạt dom thuyền trưởng rilo kapal ikan labaih 700 triệu đồng.  Dalam dom bruk ngak suan, rilo kapal ikan taoh jamriak pasang iek jalan nao caik tapa sa kapal ikan karei plaih di pasang iek, piah ba kapal ikan nao taong cap suan hukum di dom bhum tasik negar langiu. Pandar kapal ikan atah di abih meng 15 mét tal mala 24 mét nao taong cap di labik oh brei taong cap. Hu dom thuyền trưởng oh hu văn bằng atau chứng chỉ tuk nao taong cap di tasik atah.

Tỉnh Đồng Nai brei panduan ba labaih 3.000 labik raong glang piah langyah bruk tachrauk nerak alam môi trường. Đồng Nai hu brei thau lac pasak raong glang di dalam taneh ia ngan haong taong abih tih tapon pabui lac labaih 2 trieu 6 rituh drei saong 26 trieu drei manuk. Dalam rilo thun tapa, gah raong glang hu rik tame biak rilo ka gah kinh te di tinh saong ba jien mek tame, bruk ngak ka rahra pak ini. Min dom baoh sang raong glang jeng daok pathau khan lac kinh te4 gaok kan kandah, bruk raong glang lahik dui atah nan ye oh hu jien piah panduan ba nao daok karei tui jalan ngak di tỉnh.

Urak ini, rilo janih baoh kayau di tỉnh Tiền Giang daok tagok yaom,  baoh durian saong panat tagok glaong di abih, dang akaok 11 janih baoh kayau di tỉnh. Dalam nan panat pajaih Indo meng dom pluh ribau đồng/kg, urak ini tagok 100 nghìn đồng/kg. Tỉnh Tiền Giang urak ini hu labaih 80 ribau ha bein phun mbang baoh, rilo di abih lac durian haong panat. Dua janih baoh kaya ini yaok thun daong ka po bein mek jien tame hu labaih 1 tỷ đồng/ha min karja palei kakei lac, jhui ba gauk pala rilo, plaih bruk baoh rilo, pablei oh abih.

Rilo thun ini mai, dom tỉnh dalam bhum ĐBSCL oh hu ruak cum manuk ada, nan ye rahra takik caik hatai tal. Kayua yau nan ye, akaok UBND tỉnh Cà Mau hu ieu kakei dom jabat hu pambuak tal dalam tỉnh paglaong bruk pasang iek biak catang urang tame negar piah duah mboh biak samar dom urang medil lac njauk ruak halei oh, abih di nyu nan lac urang sik ralaow, pablei salih manuk ada, dom drei manuk ada ndiuk, urang bhian mai meng dom bhum hu jit ruak. Paglaong panuac ieu kakei biak catang ka rahra oh pandar pandap oh hu asal cambaih laih; peih ngak salamat pandap mbang dalam bruk sik ralaow, ngak pandap mbang saong dom pandap di manuk ada; oh mbang darah saong oh mbang ralaow manuk ada njauk ruak kik, metai oh thau makna cambaih laih.

Kinh tế Trung Quốc daok hu salih bharau meng bruk hu siam veik hadei di jit praong saong pandap panda daok tagok rilo. Tui UB salih bahrau saong patagok taneh ia Trung Quốc, patagok GDP di Trung Quốc dalam thun ini lac jaik 5%, lac lagaih haong jalan cakrok urak ini. Urak ini, taneh ia ini daok pasang iek hu jit ruak saong pasiam veik bruk ngak mbang jeng yau dom dịch vụ xã hội. Trung Quốc daok hu rilo tanut patagok dalam quý 1, dalam nan tanut blei pandar meda jeng prein khang patagok dalam thun ini.

Dom urang metai pak Australia di thun 2022 tagok glaong abih, tagok tal jaik 20 ribau urang. Ini lac paka glaong abih kuhria meng mbang mesuh metak dunya mbang ka 2 tal urak ini. Yaom lac jit ruak pasang iek hu siam, min COVID-19 jeng lac makna praong ngak ka 10.300 urang metai dalam thun 2022. Langiu di nan, dom urang metai haong dom makna karei yau ye ruak tim mạch, dom janih ruak di darah glo akaok, ruak ma-ik saradang, ung thư jeng tagok glaong. Bruk ini hu langyah brei thau lac kayua sang iek ruak pataom prein tame pacang caga COVID-19 nan ye ngak kan kandah tal bruk taong ruak dom janih ruak karei.

Takik di abih 10 urang metai saong 6 urang njauk rambus dalam bruk sa sruh radaih buýt haong sa sruh radaih 3 kong pajeng tuai ginuh gauk harei 5/3 di bhum Ancash, atah di ban ine Lima di Peru 370km nao gah brak.. Tuk rah tabiak bala, mangaok radaih pajeng 50 urang. Radaih ginuh gauk di jalan bhian rah tabiak di Peru, labik hu jalan oh siam,kurang gom./.