Meng akaok thun mbiah ini, 20 tỉnh, ban gah Meraong negar hu 19.000 mbang ruak sởi. Urang ruak sởi ralo abih lac nyaom uranaih umo meng 1-10 thun, meblah labaih 60% dalam bih tih urang ruak. Urak ini, jit sởi daok tagok samar di ralo bhum palei pala, 46 sruh jit ruak. Dalam nan, Đồng Nai saong Bình Dương lac dua tỉnh hu urang ruak ralo abih dan haong 200 mbang dalam sa adit. Patui nan lac TPHCM, Cà Mau  saong Bạc Liêu. Tui dom urang ilamo, dom bhum palei  hu urang ruak tagok rilo lac labik hu ralo bhap bini tame tabiak, kan kuhria hu abih uranaih oh ka klauk jru caga ruak.

Dalam tỉnh An Giang urak ini daok labaih 4.300 baoh sang daok dalam sang taik tahak caong khin hu brei ngak pasiam, padang birau. Langiu di nan, hu labaih 24.300 baoh sang kathaot, jiak kathaot hu daong. Piah daong dom baoh sang kan kandah , UB MT negar  Viet Nam tỉnh An Giang hu payua  harak Thư likau di dom kapol nyaom, kong ti, doanh nghiep. Birau hu sa adit  peih bruk jak ba tỉnh An Giang taduan hu 223 tỷ 180 trieu dong. Karja dom bhum palei taduan hu kadung jien nan njauk brei pandar njauk bruk, daong ka njauk manuac, siam lagaih.

Tỉnh Gia Lai kuhria daong padang ngak birau saong ramik pasiam jaik 8.200 baoh sang ka dom urang kathaot. Ngak hadom baoh sang, daong sang daok ka taong abih urang lac 60 trieu dong sa baoh sang  di Danak dak pakat negar patrun kathaot khang kajap saong  Danak dak pakat negar patagok kinh te- xa hoi bhum urang bangsa takik saong bhum ceik, jak ba bhap bini daong jien tame ngak piah hu jien daong sumu hu abih gauk.

Dalam dua harei tapa, Giáo hội Phúc Âm Ngũ Tuần Viet Nam peih ngak Danak dak Thánh nhạc Truyền giảng Roya anit ranam thun 2024 biak praong di Ban Cần Thơ. Danak dak  hu mbaok jiak 10.000 urang lac gru, urang duh bruk agama, bhap bini, tuai damuai mai meng 13 tỉnh, ban dalam bhum ĐBSCL. Cần Thơ urak ini hu 13 agama daok ngak bruk tui njauk hukum karja, hu 330 labik kakuh, 497.000 urang agama. Tuk vak tapa, urang ngak praong di ban tuk halei jeng sangka, ngak brei mbuan lagaih dalam bruk ngak tui ilamo adat hukum siam gheih di dom agama.   

Jalan  Metro ka 1 Bến Thành - Suối Tiên hu ngak salah blaoh taong abih bruk peih ngak. Brei peih ngak iek tui kuhria meng harei 9/12 tal harei 21/12 saong ba tame ngak bruk mek jien di harei harei 22/12. Jalan Metro ka 1 lac danak dak jalan mbak  praong di negar, hu bruk sangka  tacei ba ngak cati catang, sumu di Thu tuong Rajaei, urang ngak praong dom Mentri, dom gah saong urang ngak praong di TPHCM. Yau nan ye,  mbiah tal tukvak ini, danak dak nan hu langa talaih dom bruk kan kandah ralo piah caga ba tame ngak bruk.

Mentri Jalan mbak – Pajeng ba Indonesia hu peih ngak 3 danak dak taduan raok urang mai palei oh abih jien dalam tui padeih Giáng sinh saong thun birau 2025. Tui kuhria hu labaih 38 ribau urang  hu taduan raok oh abih jien. Dalam nan  hu 11 jalan taduan raok urang mai pablei ngan haong  88 radaih buyt saong 2 sruh radaih tải pajeng hu 3.500 tuai damuai. Tong cuc Jalan pasei kuhria caga radaih pui pajeng 5.300 urang saong 2.320 sruh radaih patuh.  Tong cuc Pajeng ba jalan tasik kuhria caga 100 mbang kapal gilai piah pajeng jaik 30 ribau tuai damuai. Rajaei Indonesia hu brei trun jien harak vé haok ka taong abih dom mblang kapal haok.

Jien Yên trun yaom, pandap pandar tagok glong, bala meng langik tasik bhian rah tabiak, pala drak khat lahik, jit ruak…lac dom bruk ba tal ralo baoh sang Nhật Bản tame kan kandah. Tui nan, urang tut angan taduan jien daong di karja taneh ia ini tagok glong oh ka bhian mboh. Dalam bilan 9 meng blaoh, hu tal jaik 22 ribau mbang tut angan likau karja daong jien. Gam haong nan,  urang umo taha tagok tal 36 trieu 250 ribau urang, ngak ndua nong trak gah y te, an sinh xa hoi, bao hiem jien bilan padeih hưu.  

Kapul Pato megru, Khoa hoc saong Ilimo di LHQ (UNESCO) tabiak sarak ba jabon ngak meng tangin danei angan di ban Aleppo, Syri tame harak drap ar ilimo oh oh mboh di meta. Tui UNESCO, thaik thaot langiu mekre, min jabon Aleppo lac sa jabon hacih sa-at siam abih saong hu pachreih brei pandar ka anek kamar. Jabon Aleppo hu ngak tabiak meng manyek oliu, manyek asal nguyệt quế. Mbluak jang, jabon Aleppo lahik biak ralo tuk vak piah ngak tabiak: 3 harei piah rak manyek ngak jeng jabon, min lahik meng 9 tal 12 bilan piah pambu thu./.