Hoi dong Pasang iek danak dak pakat nagar padak padang palei pala barau (NTM) Karja pakat negar hu nyaom biai piah brei ka huyen Định Quán saong huyen Thống Nhất, tinh Dong Nai harak angan palei pala barau paglaong thun 2024. Yau nan, hadei huyen Xuân Lộc, ni lac 2 huyen di tinh Dong Nai taduan hu tanut huyen palei pala barau paglaong. Njauk caik hatai abih lac jien mek tame kuhria rah tapa di mikva daok dom xa palei pala barau paglaong, palei pala barau kieu mau hu glaong kayua hu dom bhum palei pajum prein patagok bruk pala drak raong glang, oh padeih di bruk paglaong jien mek tame ka urang ngak nong.\

Mban Bangsa TPHCM birau peih bruk pataom mbaok saong tadhau ayuh Tet dom baoh sang urang cach mang umo thun praong, baoh sang di labaik ngak bruk cach mang Mban Hoa vận di TPHCM, urang bangsa takik naih gheih dalam dom gah kinh te, ilamo, xa hoi saong baoh sang urang bangsa takik hu raidiuk kan kandah. Var nan, Mban Bangsa  Ban raya  hu jao brei 300 paok pandap ka urang bangsa takik hu raidiuk kan kandah di dom quan, huyen saong 25 paok jien bac yaom 50 trieu ndong kayua Mban iek daong pato bac khar Lo ka sinh vien bangsa takik hu raidiuk kan kandah. 

Tinh Bac Lieu barau peih ngak Harei roya Tet bol lin – bhap bini thun 2025 di xa Định Thành A, huyen Đông Hải. Ni lac sa bhum atah biyah, daok ralo kan kandah, jien mek tame kuhria rah tapa di mikva daok biar…Kayua yau nan, xa daok caong hu ralo phun jien buh tame piah patagok kinh te xa hoi. Di harei ngak bruk, dom kapul hu ngak ralo danak dak siam makre: ngak barau, pasiam veik saong veih glaong 9 jalan mbak nao mai di palei pala; padak padang barau 2 tatua mbe tong; caik 240 gom manyek pasang hadah; daong padak padang sang danaok, alin harak bao hiem y te; iek ruak, paphat jru oh mek jien ka mikva…

Palei Sa Đéc, TP Sa Đéc, tỉnh Đồng Tháp daok tame bilan bingu Tet, tuk tuai damuai  meng TPHCM saong rilo tinh ban daok jiak mai tal bein rivang iek saong blei bingu. Dalam nan, bingu cuc mam xoi rak bingu trah aval di dom bein hu urang blei abih. Tui ong Võ Minh Thông, Pho kaok Jabat Kinh tế Banraya Sa Đéc, bingu Sa Đéc hu ba nao dom tỉnh bhum kreh negar saong Ha Noi, daok dom tỉnh gah Pei negar  hu labaih meng 3 tal 4 harei. Bingu Tet aval pabak ka dom labik ngak jitvu ngak mekre, ngak jalan bingu xuan. Hu labaih 80% bingu chroh nerang hu urang kakei blei saong caik jien takai. Ta-eng bingu cuc mam xoi hu urang kakei blei jiak abih.

So Ilimo, Padhih saong Jirah rivang Đak Lak pok brei 16 baoh chieng, 69 ndan tinh saong dom janih phling ngan haong yaok ratuh blah angui cuk manyim tui adat meng kan di dom bangsa Ê Đê, Lào, Tày, Nùng, Thái, Mường, Thanh Y…ka dom klup, kapul tamia adaoh di dom palei, mbuan bhum mikva bangsa takik dalam tinh. Kayua nan bo dom klup, kapul tamia adaoh hu ralo pandap thiet bi, phling piah duh ka bruk pasram magru, veih glaong rai diuk ilimo, sahaneng ka mikva.

Ong Donald Trump tuyen the tagok rai Tong thong ka 47 di Mỹ di harei 20/1 (vaktu Mỹ) di Washington DC. Bruk nan daok pachreih urang caik hatai di taong abih manuac sia dunya. Adat dieu hanh tagok rai kayua ong Trump ba kaok meda peih ngak labaih 15 mong biar harei pak ini. Kapon dieu hanh  meda nao meng sang Quoc hoi tal Nha Trang,  ini lac bruk hu yaok trieu urang negar My grauk taneh ia cang mbang uan tabuan. Tamat blaoh harei tagok rai meda la dom bruk chiat tamia.

Australia barau buh jien tabiak labaih 100 trieu do la Australia piah jhul catang prein pacang caga bruk taong paoh gauk. Jien ni lac hu pandar piah patagok dom yitvu daong iek, veih glaong ilimo ka bhap bini, ngak siam lagaih bruk nyaom biai, pambuak gauk di dom jabat karja haong dom doanh nghiep, dom bruk mayut ngak mbang  haong dunya. Di Australia, dak harei dak ralo uranaih glaow akaok saneng trak damak, mbuan ba tal bruk taong paoh gauk.

Sa bala apui khuah rah tabiak di sa pasak pablei salih di ban ine Jakaktar harei 15/1 ngak  7 urang lahik. Rilo tuai damuai meda lac dalam dalam pasak pablei salih tuk rah tabiak apui khuah. Sơ daong padam khuah ban ine  hu ba 40 radaih  daong padam khuah saong 200 lin daong padam pui piah pacang apui khuah di pasak pablei salaih. Kuhria tal biar harei 16/1, apui loa mbang sa baoh sang, yaom lac hu padam tame ngak la-ar./.