Tui Danak dak gah ngak nong tinh Dong Thap, padai brah saong ikan pra lac dua janih ba jien tame yaok ty dong ka kadung jien karja tinh, lac 16.000 ty dong saong labaih 8.800 ty dong…Langiu di nan, bingu kieng, pa-ok  sang caraih jeng ba mai yaok ty dong. Urak ini, dom sarak daong ramik gah ngak nong hu peih ngak siam, rik tame paglong bruk ngak di dom kapol nyaom, urang gah ngak nong. Dalam nan, bruk pandar ilamo kong nghe tame pala drak piah abih takik jien, patagok yaom kaom; urang ngak nong di dom HTX, kapol nyaom duah thau sumu ka darak pasar piah hu jalan ngak, pambuak saong pablei salih hu jien tame rilo.

Jaik ini, bruk pala li-u that di tinh Tien Giang patagok khang, haong 22.000 ha bein li-u. Min bruk pablei la-u ini oh ka hu tani tanat, yaom oh glaong. Piah baoh li-u hu siam pahe yamen duh ka bruk pablei tabiak negar langiu, gah ngak nong saong sang bein, labik pablei baoh li-u, daok pataom tame padang bhum taneh pala piah taduan hu ma so bhum pala, ma so labik papaok pandap panda. Urak ini tinh hu pabak 49 bhum pala, ma so labik papaok baoh li-u that piah pablei tabiak negar langiu. Bahrau ini, hu 3 sruh radaih container li-u xiem pablei tapa Trung Quoc, peih tabiak jalan nao biak hu caong takre siam gheih ka baoh li-u di bhum palei.

Bilan amriak lu thun ini, kayua langik oh lagaih, binguk druh ralo yau nan ye brei takik asar, meda khat lahik. Rilo urang ngak nong tinh Ba Ria - Vung Tau haduh hatai kayua yaom amriak lu glong min jien mek tame takik jang thun dahlau. Anak yaom kaom di darak pasar trun tagok, gah ngak nong kakei urang pala pataom tame iek glang bein amriak lu  ka siam, pacang caga halak halin, khik brei phun tamuh praong siam kajap ka thun anak. Urang pala amriak lu njauk duah thau ka darak pasar piah buh jien tame ka lagaih, brei pambuak haong doanh nghiep piah ngak amriak lu hacih sa-at, asar siam, paglong yaom amriak lu di tinh Ba Ria - Vung Tau.

 Piah daong mikva bangsa takik hu tani tanat raidiuk, patagok bruk ngak mbang, Binh Phuoc kham merat daong ngak sang ka 124 baoh sang. Akaok UB Bhap Bini tinh Binh Phuoc Trần Tuệ Hiền brei thau, ngak brei oh daoh baoh sang taik tahak lac sa dalam dom jalan ngak praong di Ndang, Karja, bruk ngak hu makna praong dalam di taong abih pakat chinh tri, piah trun kathaot khang kajap saong padang palei pala bahrau, daong patagok kinh te, xa hoi bhum palei.

Jabat kuhria mboh dahlau langik tasaik di dom taneh ia mboh yau gauk, dalam dom harei anak tal langik di Ban raya HCM saong gah Meraong negar Viet Nam meda hu hajan saong hangin, langik tathak, pandiak meng 24 -33 độ C. Meng bilan 11, TPHCM brei salih meng bilan hajan tapa bilan thu takik hajan saong di harei pandiak 31 độ C, di melam 24 độ C, meda thu lagu.

 Triều Tiên saong Nga mbang camereip peih ngak labik parang iek ka cong nghe thong tin hadei 18 thun, piah jhul bruk klak rabha ka gauk cong nghe thong tin di dua negar. Bruk nan hu peih ngak di Cung Ilamo Rahra di Ban ine Bình Nhưỡng di Triều Tiên. Labik parang iek pataom tame gah cong nghe thong tin saong patagok ky thuat so, yaih khan dom pandap panda cong nghe thong tin birau saong bruk jak jeng khoa hoc kayua dom kapul pato megru, kapul roh duah saong kong ti di dua negar hu ngak tabiak.

Kham merat  padang ngak yaok trieu baoh sang yaom lap ka urang jien mek tame takik, Rajaei birau di Indonesia ba tabiak padang ngak 15 trieu baoh sang dalam tukvak 5 thun di drei. Dalam 3 trieu baoh sang hu 1 trieu baoh sang di thành thị saong 2 trieu boah sang di bhum palei. Bruk padang ngak 2 trieu baoh sang di bhum palei meda hu daong duah bruk ngak. Akok mentri Sang daok công cộng saong Tani tanat labik daok di taneh ia ini khan lac duah “jalan ngak hadah krah” piah daong bhap bini, abih di nyu lac dom urang kathaot, meda taduan hu sang daok.

Labaih 150 urang njauk rambuas biak trak dalam mbang patuh phao bingu, rah tabiak dalam Harei Agama di kalan pak gah Meraong negar ini dalam melam 28/10 tapa. Bilan 7 thun blaoh, sa mbang patuh di sang mac phao bingu di gah Meraong Ấn Độ ngak metai 8 urang. Thun 2018, apui khuah praong di sang mac phao bingu di New Delhi ngak 17 urang ngak dalam nan metai. Phao bingu hu brei pandar dalam dom Harei adat Agama saong ndam likhah di Ấn Độ. Dom mbang patuh phao bingu ngak njauk rambuas saong metai jaik yau thun halei jeng hu, rilo meng lac kayua ngak oh njauk tui dom bruk ba tabiak  pacang caga apui khuah, patuh hu salamat.