Sở Du lịch TP.HCM brei thau, kuhria dalam tuk pacit daa po Hung saong mbang padeih 30/4 – 1/5, dom tuai mai rivang main di dom labik main tui kuhria lac labaih 950.000 urang, tagok 126,2% dut saong tukvak ini thun 2022. Tukvak padeih thun ini, TP.HCM hu rilo bruk ngak hu makna pachreih hu rilo tuai damuai. Taphia di nan, 60 pandap main hu dom doanh nghiệp peih ngak pachreih hu tuai damuai, danak dak rivang ma-in jirah Labik inem krung ilamo pakat negar jabat HĐND saong UBND TP.HCM – sa bruk ngak hu makna, mbang camriep hu peih ngak. Bruk ngak du lịch bahrau ini hu rik tame bruk padang ngak thaot binguk kanja TP.HCM biak siam makre, bui siam bai, chreih chrai.

Du lịch tasik di tỉnh Bình Thuận saong Ninh Thuận dui pachreih hu rilo tuai damuai mai rivang ma-in, manei tasik dalam mbang padeih lễ bahrau blaoh. Tui Sở Ilamo - Thể thao saong Du lịch tỉnh Bình Thuận, dalam tuk padeih lễ dalam tinh rok hu labaih 160.000 mbang tuai mai ma-in daok veik, jien mek tame tui kuhria lac labaih 230 tỷ đồng. Daok di Ninh Thuận, taong abih tih tuai mai rivang ma-in, padeih padai tui kuhria lac 90.000 mbang tuai, tagok 49,5% dut saong tukvak ini di thun blaoh. Jien mek tame tui kuhria lac 76 tỷ đồng. Dom labik tapen tasik, yau ye Bình Sơn - Ninh Chữ, Vĩnh Hy, Cà Ná... pachreih hu rilo tuai damuai. Bilik daok di dom labik tapen tasik mek hu 95-100%.

Hadei di 5 harei padeih lễ, dalam taneh ia rahtabiak 129 bala jalan mbak, ngak ka 67 urang metai, 90 urang njauk rambuac. Dalam tuk pasang iek, gah Cảnh sát jalan mbak dalam taneh ia hu langyah jaik 50 ribau urang ngak suan, phat jien labaih 107 tỷ đồng, cap khik 847 radaih ô tô, labaih 20 ribau radaih mô tô; mek veik labaih 11 ribau harak adat peih radaih. Bruk salamat jalan mbak di dalam taneh ia tui kuhria lac hu tani tanat. Gah Cảnh sát jalan mbak Công an dom kapul, bhum palei hu peih bruk pambuak gauk, parabha, rami ramik jalan mbak tui njauk dom jalan ngak hu ba tabiak.

Sở Tài nguyên saong Môi trường (TN-MT) tỉnh Đồng Nai bahrau hu harak ieu Tổng Công ty Mblang kapar haok Việt Nam (ACV) samar drah payua harak pathau khan jalan langyah piah trun manieng bruk tachrauk nerak alam thur mur tuk ngak danak dak mblang kapar haok Long Thành ka Sở TN-MT; gam tui di nan jeng pathau khan dom bruk ngak hu di dom jalan ngak trun manieng thur mur ka Sở TN-MT tui yaok bilan piah Sở ini pasang iek. Dahlau di nan, Thanh tra Mintri TN-MT hu taong phat bruk ngak suan hành chính ACV 270 triệu đồng ngan haong 2 bruk ngak lac peih ngak oh njauk saong oh ginup tui harak adat brei peih ngak bruk taong yaom pathau khan lac bruk kanjak di alam môi trường saong ieu ACV peih ngak dom jalan ngak pasiam veik bruk tachrauk nerak alam biak trak damak kayua thur mur meng bruk peih ngak di danak dak mblang kapar haok Long Thành.

Thun ini, sang bein pala pa-aok di tỉnh Tiền Giang takik bui sambai kayua bilan pa-aok cuah Hòa Lộc takik baoh, laik yaom. Bilan pa-aok cuah Hòa Lộc thun ini, po bein pablei yaom meng 40-55 ribau đồng/kg, trun labaih 20 ribau đồng/kg dut saong tukvak ini thun blaoh saong trun 100 ribau đồng/kg dut saong tukvak tết Quý Mão. Oh lac yaom trun bier bo năng suất pa-aok thun ini jeng trun rilo dut saong thun dahlau. Dalam tuk nan, khak drak, jru khik caga phun pala daok di tanut biak glaong, nan je bilan pa-aok thun ini, po bein di tỉnh Tiền Giang oh hu laba.

13.000 urang tame negar suan hukum hu tabiak truh Hàn Quốc hadei di tuk taneh ia ini peih mbang pagui mek pambuak haong danak dak xuất cảnh halain hatain dalam 2 bilan tapa. Bruk pagui mek urang tame negar suan hukum di Hàn Quốc hu peih ngak veik meng bilan 10 thun dahlau hadei di tukvak suai lavik brei padeih kayua jit praong COVID-19. Dom urang tame negar suan hukum di Hàn Quốc daok patagok biak samar dalam dom thun jaik di ini, tui kuhria dalam yaok 5 urang negar langiu daok di Hàn Quốc lac hu 1 urang daok suan adat hukum.

Meng harei 23 tal harei 29/4, Thái Lan hu labaih 1.800 urang njom ruak COVID-19 bahrau saong 10 urang metai, tagok jaik dua mbang dut saong adit dahlau. Mintri Y tế Thái Lan brei thau, dom urang njom ruak bahrau saong metai kayua jit ruak COVID-19 meda daok tagok glaong jang veik tuk thun bac bahrau saong bilan hajan lac meng dalam bilan ini. Di Indonesia, biến thể XBB.1.16 gam haong bruk nao mai rilo dalam tuk Roya Aidil Fitri di urang Islam lac makna ba tal dom mbang njom ruak tagok glaong. Dalam dom adit jaik di ini, yaok harei taneh ia ini hu labaih 1.000 urang ruak. Jabat y tế negar ini hu kakei rahra njauk caik hatai saong cuk pataik pacang mbaok di dom labik hu rilo manuac. Min, Indonesia brei thau lac, jit ruak jeng daok dalam pasang iek hu.

Liên hợp quốc (LHQ) brei thau ka bruk El Nino meda rahtabiak dalam dom bilan anak tal. Dalam nan, tui kuhria mboh, El Nino rahtabiak di puac bilan 7 lac 60% saong puac bilan 9 lac 80%. Tui LHQ, bruk ini ngak ka nhiệt độ di baoh taneh tagok glaong saong meda ba tal dom bruk langik tasik biak trak damak, kan kandah jang, nan ye dom taneh ia njauk caga dom bruk brei thau dahlau aval jang siam lagaih piah khik kajap bruk salamat ka rahra.