Thủ tướng Rajaei birau taduan  brei angan ka dua huyen Cầu Ngang saong Duyên Hải (tỉnh Trà Vinh) mek hu tanut chuan palei pala birau. Tal urak ini, tỉnh Trà Vinh hu 8 dalam 9 huyen mek hu tanut chuan saong ngak salah bruk padang ngak palei pala birau. Trà Vinh daok pataom tame rilo jalan ngak piah ngak salah bruk padang ngak palei pala birau dahlau di thun 2025. Urak ini, tỉnh ngak salah 5 dalam 8 tanut ka bruk nan. Dalam thun ini, tỉnh kham merat ngak hu  veik 10 xã  hu tanut chuan palei pala birau paglong; yaok đơn vị pakat huyen hu sa xã palei pala birau kieu mau.

Ginum biai ka danak dak Hukum Căn cước công dân (pasiam veik) dalam biar harei 22/6, rilo urang QH hu panuac ieu oh salih angan thẻ căn cước công dân jeng thẻ căn cước. Urang QH Lê Hoàng Anh (kapul Gia Lai) ndom lac, baoh panuac "công dân" hu tacei cambaih lac anek menuac. Meyah kol drei pandar baoh panuac "căn cước" ye oh tacei cambaih anek menuac hu. Urang lac dom menuac asal Việt daok diukrai di  Việt Nam min oh ka hu quốc tịch ye oh lac rahra Việt Nam, nan ye meda sahneng kuhria piah ngak brei janih harak karei  piah khik ramik, oh njauk lac brei ngak ka pahu thẻ căn cước. Dom urang QH karei jeng oh njauk hatai haong bruk salih angan thẻ căn cước công dân jeng thẻ căn cước.

Hội đồng taong yaom, dak angan pandap OCOP (Danak dak yaok sa xã sa pandap) pakat negar thun 2023 hu taduan brei angan  19 pandap OCOP 5 patuh. Dalam nan, Bến Tre hu 4 pandap OCOP 5 patuh lac keo li-u ca cao, keo li-u durian hala dứa, keo laya, keo la-u durian  di Kong ty TNHH Ngak tabiak pablei salih tổng hợp Đông Á. Dalam taong yaom mbang ini hu 85 hồ sơ  di nyaom pandap dalam taneh ia payua, hội đồng OCOP pakat Trung ương hu langyah, taduan 19 pamdap OCOP 5 patuh. Dom tỉnh bhum taneran kraong Cuu Long hu 11 pandap hu taduan brei.

Tukvak tapa hu urang mek angan lac menuac di điện lực, ieu phone da-a tuai pambuak gauk ngak ayut Zalo piah like, piah klah rabha khau tin pambuak tal bruk kurang điện biak trak damak. Yaok mbang klah rabha taduan hu 150 rabau đồng. Hadei di tuk ieu phone blaoh, urang nan payua jalan link da-a iek video clip meng 30 giây tal 1 minit saong ngak dom jalan ngak karei piah pachot. Kayua yau nan ye, Tổng công ty Điện lực miền Nam kakei tuai damuai oh khan brei thau hagiat pambuak tal rup drei, oh tame jalan link halei mboh medil, oh payua jien ka menuac urang, kapul nyaom yaih khan lac ngak gah điện.

 Meng biar harei 21/6, dom anek saih di Ban raya HCM taduan hu tin nhắn brei thau hu gam tame  tal bac 10 Trung học Phổ thông negar, nan lac  sang bac Trung học Phổ thông Tân Bình. Tin nhắn brei thau anek saih pakacah gam tame nguyen vong 2 saong iew anek saih  tame sang bac ngak harak gar. Tui pathau khan di blah web di sang bac, Sang bac THPT Tân Bình brei mboh, oh hu payua tin nhắn gam tame halei tal amaik ame anek saih jeng yau anek saih, dom tin nhắn yau payau ka dom  anek saih. Hadei di tuk Sở Pato megru  Ban raya brei thau, hu tanut chuan Sang bac meng khan brei thau ka bruk ngak hồ sơ tame bac gan haong anek saih pakacah gam tame.

 Di darak pasar ngoại hối Mỹ, jien Yên Japon trun tal tanut biar di abih tuk 1 đô-la salih hu 143 Yên. Ini lac yaom biar di abih dalam 7 bilan tapa kuhria meng bilan 11 thun bloh. Bruk jien Yên trun yaom saong ka oh hu hagait brei mboh lac siam veik, daok ngak ka urang blei pandar di Japon gaok rilo kan kandah tuk pandap panda dak harei dak tagok yaom, jien điện, jien ia jeng tagok. Abih di nyu lac bruk pandar cai di urang negar langiu daok di Japon jeng gaok kan kandah rilo saong bruk dui pachreih urang ngak jeng gaok kan kandah.

Ban ine  Bắc Kinh di Trung Quốc paglong bruk khan brei thau dahlau ka langik pandiak  tagok sambo bong meriak, tanut glong abih dalam dom pakat tanut hu 4 sambo, tuk ralo labik dalam bhum ini meda hu nhiệt do tagok tal 40 độ C. Dalam harei 22/6, nhiệt độ glong abih yam tapa 41 độ C saong lac harei pandiak glong abih dalam bilan 6. Trung Quoc  hu he thong brei thau ka langik pandiak pakat 4, hu kuhria tui sambo mau, dalam nan sambo bhong meriak  lac trak abih, patui nan lac kanyiak katam saong hijao.

Jabat  thú y pakat negar di Thụy Điển (SVA) khan lac labaih 1.000 drei mòng biển akaok jhuk metai di ban Kalmar di taneh ia ini, lac kayua njaom ruak cúm gia cầm.  Tapa pasang iek hadei di nan brei mboh lac dom drei cim ini njauk ruak cúm gia cầm H5N1. Gah thú y hu panuac ieu urang raong glang cim mbrim menuk ada caik hatai sangka, kayua jit ruak mbuan mbak praong tapa dom labik karei. Jabat iek gah y tế cộng đồng di Thụy Điển brei thau, cúm gia cầm takik njaom tapa menuac, min karja kakei bhap bini plaih taom gaok dom drei cim metai atau dom drei cim mboh yau njauk ruak./.