Yaom dom janih menyek jeng trun khang, meng labaih 1.000 tal 1.700 đồng/sa lít (atau sa kg) tui janih

Dalam dah page harei 21/7, Nyaom biai bac megru, thau cambaih Sarak Trung ương 5 mbang XIII hu pang Thủ tướng Phạm Minh Chính pathau khan kadha: “Patui bruk salih bahrau, pasiam sarak, paglaong siam lagaih dalam bruk khik ramik saong pandar taneh riya, ngak jeng prein khang ba taneh ia drei cak rok hu jien mek tame glaong”. Thủ tướng brei thau lac, meng bruk khik ramik saong pandar taneh riya di taneh ia drei, njauk samar drah salih bahrau, pasiam sarak, samar drah lang talaih dom bruk daok tavak tavaiy dalam khik ramik saong pandar taneh riya, khik tani tanat dom kein laba di kanja, bhap bini saong doanh nghiệp; paglaong prein meriak gauk, pandar hu kein laba taneh riya, ngak jeng prein khang bahrau piah kham marat tal thun 2030 taneh ia drei jeng taneh ia ngak kong bahrau, hu jien mek tame glaong.

Dua Mintri Công Thương – Jien padai bahrau brei thau bruk ramik veik yaom xăng menyek di mbang tacei pato mbang ni, meng mon 3 bier harei 21/7/2022. Tui nan, yaom lac daok khik tanut trích lập glong – tagok tal 950 đồng/sa lít, yaom xăng jeng dok trun khang , meng labaih 2.700- 3.600 đồng/sa lít tui janih. Yaom dom janih menyek jeng trun khang, meng labaih 1.000 tal 1.700 đồng/sa lít (atau sa kg) tui janih.

6 bilan akaok thun ini, yaom jien mek tame meng pablei tabiak negar langiu di gah jhik manyim hu labaih 22 tỷ USD, tagok 17,7% dut saong tukvak ini thun blaoh. Dalam 22 tỷ USD pablei tabiak negar langiu, dom pandap praong lac gah jhik manyim mek hu jaik 17 tỷ USD; pataih hu labaih 1 tỷ USD; pandap piah jhik menyim mek hu 734 triệu USD. Abih tih yaom jien blei pandap meng negar langiu gah jhik, menyim 6 bilan akaok thun lac labaih 13 tỷ USD. Kayua yau nan ye, gah jhik menyim pablei tabiak hu rilo jang 9 tỷ USD, ini meda hu maong lac sa bruk kham marat di dom doanh nghiệp jhik manyim dalam tuk kinh tế dunya daok gaok rilo kan kandah.

Ủy ban bhap bini tỉnh Tiền Giang bahrau tabiak sarak brei angan 21 pandap lac OCOP pakat tỉnh, dalam nan hu 6 pandap 4 patuk song 15 pandap 3 patuk di 9 doanh nghiệp, labik ngak dalam tỉnh. Dalam dom pandap ni, Cty TNHH Một thành viên Trí Sơn hu 6 pandap 4 patuh; Labik ngak pandap Quốc tế Dược Vương Cung hu 3 pandap 3 patuk…  Urak ni, tỉnh Tiền Giang hu padang ngak song brei angan 119 pandap lac OCOP, dalam nan hu 75 pandap 4 patuh song 44 pandap 3 patuhk

Công an tỉnh Lào Cai pambuak haong Cục An ninh mạng saong Pacang caga tội phạm pandar công nghệ glaong, Cục Cảnh sát Hình sự - Mintri Công an bahrau taong tayah jalan brei masaiy jien laba glaong, brei masaiy laba biak trak tapa phone par tangin ngak bruk meng negar Lao tapa Việt Nam. Tapa pasang iek tuk camriep mboh lac, dom urang dalam jalan brei masraiy hu padang tabiak Công ty TNHH công nghệ Funmobi, pandar jaik 300 ứng dụng brei masaiy jien di mangaok phone par tangin, pambuak haong jaik 200 công ty padang pandap panda, công ty jien padai fintech piah pabak dom paok jien brei masaiy yaom meng 2 tal 7 triệu đồng, tukvak masaiy lac 7 harei ngan haong jien laba labaih 2.090% sa thun. Kuhria tal urak ini, hu labaih 159.000 urang masaiy jien tapa dom ứng dụng Vndong, Hitien, Zdong, Hvay ngan haong yaom jien masaiy abih tih lac 1.802,1 tỷ đồng, paok jien bo tuai hu biyar saiy lac 830,1 tỷ đồng, dom jien hu mbang lac 322,6 tỷ đồng.

Harei 21/7/2022, hadei di tuk taduan bruk likau padeih di Thủ tướng Italy Mario Draghi, Tổng thống Sergio Mattarella hu mbaoh tangin tame sarak giải tán Thượng viện song Hạ viện, caga ka bruk palih ruah dahlau tuk vak, tui kuhria rah tabiak di harei 25/9. Dalam sa pathau khan, Tổng thống Mattarella brei thau: “Bruk ginum biai, buh phiếu song dom jalan ngak, bo bruk buh phiếu rah tabiak di Thượng viện, harei 20/7, brei mboh cambaih bruk kurang pachreih tui di Quốc hội ngan song rajaei song oh meda ngak jeng bruk bahrau. Kayua yau nan ye, kan plaih hu bruk samar giải tán Thượng viện song Hạ viện.”

Mintri Y tế Lào harei 21/07 brei thau, taong abih dom urang njauk ruak pandiak tabiak darah di taneh ia ini tal urak ini lac 10.469 urang, dalam nan hu 12 urang metai. Ban ine Viêng Chăn lac labik hu dom urang metai rilo abih lac 5 urang. Gah Y tế dunya hu dak ruak pandiak tabiak darah tame janih ruak njauk hu caik hatai di abih kayua jamaok pambak tapa, njom pambak ruak biak samar drah. Dalam 50 thun tapa, dom urang ruak pandiak tabiak darah tagok labaih 30 mbang di dunya.

Ayman al-Zawahiri – urang pan akaok di kol khủng bố al Qaeda urak ni jeng dok duik song dok ‘tự do liên lạc’ di Afganistan. Ni lac panuac ndom dalam sa pathau khan bahrau abih di Liên hợp quốc ka bruk sron mbon di Afganistan. Tui nan, LHQ jeng brei thau ka pren khang dak harei dak tagok di dom kapul khủng bố dalam nan hu al Qaeda song kol IS dok jeng bruk duh hatai ka dunya./.

Urang lang: Thu Thảo & Hani Pha – 22/07