Tỉnh Đồng Nai daok kham merat buh jien tame padang ngak labik daok birau  hu ginup ha tang ky thuat saong ha tang xa hoi piah tani tanat raidiuk  ka bhap bini caik veik taneh ka danak dak mblang kapal haok dunya Long Thành. Dom jalan ngak nan iek praong bruk pato bruk ngak saong duah bruk ngak, piah hu jien mek tame ka bhap bini lac dom jalan hu peih ngak. Ong Võ Tấn Đức, Akok UBND tỉnh Đồng Nai mboh lac: urak ini tỉnh daok patui bruk padang ngak dom jalan pato pakai oh lac ka urang umo ngak bruk bo ka dom urang umo thun prong, ngak bruk mbuan mbiah, piah rahra hu bruk ngak aval tani tanat raidiuk.

TPHCM caik tabiak 1,22% meng kadung jien tame gah kong nghe thong tin, salih pandar taka so, glong jang bruk caong hu di taneh ia takik abih lac 1%. TPHCM hu brei tabiak rilo sarak karei, yau danak dak kong nghe AI, ha tang vien thong, daong dom doanh nghiep salih tapa pandar taka so saong patagok kong nghe thong tin. Yaom lac TPHCM hu buh jien tame ngak min daok brai rai. Langiu di nan, bruk kan kandah lac urang jakar, kong chuc, vien chuc thau ngak tui ilamo kong nghe oh ka glong, kurang ralo. Yau di quan Bình Thạnh hu 550.000 bhap bini, min tok hu 2 urang ngak bruk tui ilamo kong nghe.  

Di tỉnh Bạc Liêu, mbang hajan ribuk gam haong ia ndik dalam 2 harei tapa ngak ia hajan tagok 224mm, glong abih kuhria meng 40 thun ini mai. Hajan praong ngak labaih 570 ha padai anek di dom labik dauk dalam ia, rilo taneh pala njam patam khut khat. So Ngak nong saong Patagok palei pala tỉnh hu padang dom kapol nao ngak bruk pasang iek, tacei pato peih kareik ia saong pasang iek dom labik ia dauk di 7 bhum palei; tacei ba jalan kadom bhum palei kuhria bruk khut khat athur raong, phun pala; Padang jalan peih kareik pabah ribaong ia saong tuk vak ba ia ka bruk pala drak lagiah haong langik tasik…

Hadei labaih 10 bilan padang ngak ar pacang palei Vĩnh Tiến, xã Vĩnh Tân, huyện Tuy Phong, tỉnh Bình Thuận tal ini daok jaik blaoh salah. Danak dak nan hu UB bhap bini tỉnh Bình Thuận mbaoh tangin 2021, kuhria abih tih jien buh tame jaik 196 tỷ đồng. Tui bruk ba tabiak nan, kuhria mboh dahlau danak dak meda ngak salah di bilan 6 thun 2025. Danak dak ini meda pasiam bruk jaleih ar tasik, pacang khik drap ar jeng yau manuac urang  ka labaih 530 baoh sang bhap bini saong 67 doanh nghiep ngak mbang, pablei salih hadang pajaih tapen ar tasik di palei Vĩnh Tiến, xã Vĩnh Tân, huyện Tuy Phong.

Adat ngak yang Óoc Om Bóc – Pakacah vah ghe Ngo Sóc Trăng, Di bhum taneran kraong Cửu Long mbang ka 6 peih ngak meng harei 9 tal harei 15/11. Sa dalam dom bruk ngak praong di harei pakacah vah ghe Ngo di urang bangsa Khmer. Mbang pakacah thun ini meda peih ngak dalam 2 harei 14 saong 15 bilan 11, pachreih labaih 60 kapol vah ghe Ngo dalam bhum. Urak ini, dom bhum palei  daok kham merat ramik caga saong pasram caluai ia pakacah caong takre mek rilo siam mekre ba mai ka baha saong bhum soc. Mbang pakacag vah ghe Ngo  lac bruk padhih, oh lac brei mboh prein khang pataom bhap bini bo daok hu makna ilamo, akaok sahaneng di urang bangsa Khmer.

Labaih 170 trieu cu tri My harei ini brei buh phieu palih ruah Tổng thống dahlau diah lac Donald Trump di Đảng Cộng hòa saong Phó Tổng thống urak ini lac Kamala Harris di Đảng Dân chủ piah palih ruah pok ngak tổng thống ka 47 di Mỹ. Mỹ hu labaih 244 trieu cu tri hu ginup bruk ba tabiak  brei buh phieu, dalam nan  hu labaih 80 trieu urang hu buh phieu dahlau aval. Dom mbang duah thau hatai sahaneng dalam negar saong dom bang meriak gauk praong hu mboh urang pachreih tui ong Donald Trump, umo 78 thun saong Kamala Harris, umo 60 thun jiak sumu gauk saong oh ka mboh urang halei yam tapa gauk.

Takik di nyu 24 urang metai saong yaok pluh urang karei njauk rambuac tuk sa sruh radaih buyt pajeng dom urang nan laih tame plaik tame la-on ceik di bang Uttarakhand, gah Barak  Ấn Độ. Urak ini, bruk duah thau angan je di dom urang gaok bala jak vak nan daok hu peih ngak. Dom mbang bala angaok jalan mbak ngak metai ralo rah tabiak di Ấn Độ, lac kayua pajeng trak tapa prein, jalan mbak jhak saong urang peih radaih oh tui hukum salamat. Yaok thun Ấn Độ hu labaih 500.000 bala jalan mbak, ba tal 150.000 urang metai.

Jabat an ninh y te di Anh duah mboh dua urang njom ruak biến thể đậu mùa khỉ birau Ib di dom urang hu taom gaok urang dalam sang, kuhria abih tih urang njom ruak birau tagok 3 urang di negar ini. Ini lac dom urang akok meti njom ruak đậu mùa khỉ Ib di dom urang hu taom gaok manuac dalam sang  di Anh. Biến thể đậu mùa khỉ lac sa virut birau meda ngak jhak tal prein yawa manuac urang di dunya kayua Gah Y te dunya ba tabiak  di bilan 8 meng blaoh./.