Ban raya HCM daok duah thau hatai caong takre di cu tri ka bruk ramik pataom tame taong abih taneh praong saong bhap bini  tame haong dua tinh Bình Dương saong Bà Rịa - Vũng Tàu piah padang  jeng sa Ban raya HCM birau. Ban raya HCM birau kuhria mboh dahlau praong labaih 6.772 km2, ngan haong 13 trieu 7 rituh ribau bhap bini, 190 don vi karja. Pasak ngak bruk di karja kuhria caik di kabik 86 Lê Thánh Tôn, Quận 1. Dom pasak di karja urak ini di tinh Binh Duong labik Ban Thủ Dầu Một saong tinh Bà Rịa - Vũng Tàu di Ban Bà Rịa meda hu pandar ngak co so 2 saong co so 3.

Urak ini, labaih 24.500 ha bein phun durian lac janih phun mbuan metai kayua ia mbak di tinh Tien Giang hu “ tapa truh” bilan pandiak bhang. Jaik abih dom labik hu gaok hajan karei bilan, halau ia taba di ribong dalam bein daok ginup hu yau nan phun tamuh siam, tabiak baoh lac thun. Jaik ini, yaom durian pajaih Ri6 yaom meng 40 tal 50 ribau dong sa kilo, pajaih Monthong yaom meng 70-90 ribau dong sa kilo tui baoh praong atau sit. 

Dalam 3 bilan akok thun ini, laba meng langik ngak 5 urang metai, lahik; 6 urang njauk rambuac labaih 15.000 baoh sang khut tayak; kuhria khat lahik abih tih labaih 14 ti dong. Dalam tukvak anak tal, Mentri Ngak nong saong Moi truong  ngak bruk kuhria dut iek langik tasik tani tanat, halau ia, njom ia mbak; brei hu mbaok luac harei melam piah kuhria caga ba tabiak jalan ngak bruk, daong dom pakat karja  saong bhap bini pacang caga bala jeng yau ramik pasiam hadei bala rah tabiak  samar hu siam gilac.

Tinh Kien Giang tacei ba gah chuc nang saong don vi pasang iek veik, tavak angan gilai  oh hu ginup harak gal mac moc saong bruk ba tabiak di bhum palei tui iek, khik iek labik pataok gilai taong ikan, oh brei tabiak tasik. Tinh caong khin Bol lin Bien phong Kien Giang, pasang iek taong abih gilai ikan  tabiak ngak mbang di tasik njauk brei hu ginup dom bruk ba tabiak, abih di nyu lac mac jaraih  tui iek. Urak ini tinh daok 33 gilai taong ikan ndik di tapen tasik kayua oh pagam jamraih tui iek bruk nao ngak mbang di tasik.

Yaom lac Nam Bộ hu hajan karei bilan min tok mboh di dom labik biar harei mai, yau nan ye mbuan ba tal apui khuah glai. Tui Cục Lâm nghiệp saong khik iek glai, langiu di Binh Duong saong Can Tho, daok veik lac dom tinh, ban karei mbuan apui khuah glai pakat 4, pakat 5, pakat biak mbuan rah tabiak bala. Dalam 70 labik glai  hu kakei dahlau ka apui khuah glai, glai tràm meblah 60% taneh glai. Yau nan ye  piah khik caga glai, bhap bini juai ba apui tame glai  saong jiak glai tuk ini, meyah mboh apui khuah khan brei ka gah khi iek glai samar chip.

Tong thong My dui atah tukvak taong phat Nga sa thun veik, meyah lac  Moscow daok ngak sraw kadau ba tal kan kandah trak ka bruk khik brei salamat taneh ia di Washington. Hukum taong phạt  birau ralo lac ndem tal Sac lenh hukum 14024 kayua Tong thong Joe Biden hu mbaoh tangin di bilan 4 thun 2021 piah caga bruk cagar gauk oh thau dahlau saong njauk ndem tal  bruk salamat di taneh ia, sarak pambuak talei rohim negar langiu saong bruk ngak kinh te di Hoa Ky lac kayua Nga ngak tabiak.

Nhat Ban birau ba tabiak bruk yaok kuhria taong abih mbang camereip pakat negar ka bruk  “ metai jua”, hu mboh, thun 2023 hu labaih 76.000 urang umo taha di taneh ia ini plang taha abih umo tuk daok sang jua metui. Njauk ndem tal, dalam yaok pluh ribau urang nan hu 14.000 urang umo 85 thun. Bruk nan oh lac brei mboh bruk rahra takik di Nhat Ban, bo daok lac yau brei thau dahlau bruk daok eng, kurang pambuak haong urang karei di manuac taha umo dalam bhap bini dak harei dak hu rilo urang taha.

Bein athur Berlin, Đức birau peih bruk uan 68 thun harei menek di Fatou – tra binai taha abih di dunya ini daok diuk hu raong kareik. Fatou menek tabiak di thun 1957 saong ba mai Berlin di thun 1959. Piah uan harei menek, dom urang ngak bruk pak ini hu caga sa yo baoh kayau saong njam patam laman, lagaih haong umo thun  di tra taha, kayua Fatou oh daok tagei. Bruk uan harei menek Fatou nan lac bruk raong ba athur kajap karo di dom bein athur salih birau./.