Kayua ia thủy điện trun biar, bruk pandar điện glong yau nan ye Tập đoàn Điện lực Việt Nam (EVN) hu payua harak  tal dom tỉnh, ban pandar patak pataom điện. EVN ieu dom jabat hành chính sự nghiệp brei pandar patak pataom điện yaok bilan trun 10% dut saong tukvak ini, dom sang bac, sang iek ruak, balai iek ruak, labik padeih padai brei pandar patak pataom điện yaok bilan trun 5%. Dom labik pandar điện truac hadah labik công cộng brei hu jalan  patak pataom điện yaok bilan 5%. Dom nhà hàng, khách sạn, labik pablei salih, dom bilik ngak bruk saong  sang glong rilo tal trun 50% prein truac hadah piah yaih khan langiu langik tuk melam, caga blaoh tuk brei padam gom tuk thau lac kurang điện.

Tui panuac khan di Cty Thủy điện Đại Ninh, lac labik khik iek ba pandar danao ia thủy điện Đại Ninh praong 320 triệu m3, tal tukvak ini, mbaok ia dalam danao dak harei dak trun biar tal tanut yau Yuan lac mực nước "chết". Danao ia thủy điện Đại Ninh daok dalam tỉnh Lâm Đồng saong sang mac daok dalam tỉnh Bình Thuận, langiu di bruk peih điện, sang mac daok hu bruk ngak karei nan lac pabak ia pala drak saong ia pandar ka bhum gah ala dalam tỉnh Bình Thuận. Min bilan pandiak thun ini mai tal aval jang, dalam bilan 4 saong akaok bilan 5, pandiak thu rah tabiak di rilo labik praong. Kuhria tal harei 15/5/2023, ia dalam danao thủy điện Đại Ninh tok daok labaih 16 triệu m3 dalam abih tih prein padang ia di danao ini, lac 320 triệu m3

UB bhap bini Ban raya HCM birau hu harak samar chip tacei pato dom sở saong UB bhap bini quận, huyen, ban Thủ Đức brei pabak dom jalan ngak samar drah pacang caga ruak meruai di Ban. Dalam 5 thun tapa, dalam negar, ruak meruai ngak brei  410 urang metai. Urak ini, ruak meruai daok rah tabiak saong ngak metai biak glong di manuac sia. Yau nan ye, UB bhap bini Ban raya jao ka Sở Y tế tacei pato jabat y tế pambuak  saong jabat thú y samar khan brei thau chip tuk duah mboh  atau taduan hu khaw tin ka dom urang njauk asaw kaik, meyao  ruak meruai atau medik ruak meruai. Langiu di nan, brei taduan vaccine pacang caga ruak meruai ka bhap bini saong pathau khan tacei ba urang njauk asaw, meyao kaik njauk nao tal labik y tế piah taong ruak sumu.

Sở jalan mbak Pajeng ba tỉnh Đồng Nai bahrau tabiak harak ka bruk brei padeih dom mbang pakacah piah mek harak adat nduac peih radaih ô tô dalam bilan 5/2023. Tui Sở Jalan mbak Pajeng ba tỉnh Đồng Nai, bruk brei padeih ini, lac meng harei18/5. Makna lac ngak tui Sarak di Mintri Jalan mbak Pajeng ba ka salih bahrau, patagok khik iek, pacang caga tiêu cực, paglaong chất lượng pato pakai, bruk pakacah, brei harak adat peih nduac radaih.

Jabat  Cảnh sát môi trường Công an tỉnh Bạc Liêu pambuak haong Thanh tra Sở Ngak nong saong Patagok palei pala tỉnh Bạc Liêu birau peih bruk am cuh labaih 230 kilo pandap đông lạnh blei dauk chap hu tuk pajeng ba nao pablei. Dahlau di nan, labaih 15 mong harei 10/5, Jabat Cảnh sát môi trường Công an tỉnh Bạc Liêu pambuak saong Jabat Cảnh sát Jalan mbak Công an tỉnh Bạc Liêu brei padeih saong pasang iek ôtô tải hu biển số kiểm soát 69C-048.67 peih radaih di jalan QL1 tapa puk palei 14, xã Vĩnh Mỹ B, huyện Hòa Bình. Tapa pasang eik, gah chức năng duah mboh radaih nan pajeng 20 thùng carton hu dom janih thực phẩm la-ar oh thau meng halei mai.

Thủ tướng Thái Lan Prayuth Chan-o-cha harei kabroi (16/5) hu panuac tadhau ayuh dom đảng hu tame dalam Hạ viện; saong hu panuac ieu dom đảng saong urang Thái Lan jum pataom gauk, pambuak gauk ngak bruk kayua harei hadei di taneh ia. Thủ tướng Thái Lan jeng brei thau lac Rajaei kayua ong pan akaok jeng daok pan bruk taneh ia mbiah tal tuk Rajaei bahrau hu padang tagok. Langiu di nan, ong oh brei thau ka bruk chính trị di drei di anak tal.

Bruk sa dit ngak bruk 4 harei daok hu dom taneh ia châu Âu ngak iek roh duah dalam dom thun jaik ini piah patagok năng suất urang ngak bruk, ba mbuan lagaih piah urang ngak hu padeih padei rilo jang. Di negar Anh 61 doanh nghiep sit hu tame ngak iek bruk nan 1 thun tapa brei mboh biak siam lagaih tuk camereip. Tame ngak iek bruk nan hu urang ngak bruk di kong ty ini ngak bruk 4 harei dalam sa adit kuhria abih tih 34 tuk dalam tuk mbang jien bilan yau bhian.

Tổng thống Philippines Ferdinand Marcos bahrau mbaoh tangin brei tapa danak dak patagok du lịch taneh ia tukvak 2023 - 2028 kayua Mintri Du lịch Philippines pok tagok. Danak dak ini piah langyah dom cuang kandah piah patgaok gah du lịch Philippines, pamaong tal bruk ba Philippines jeng sa taneh ia khang gah du lịch di châu Á. Akaok Mintri Du lịch Philippines, amuk Christina Garcia Frasco brei thau, danak dak hu daong padang du lịch Philippines  pambak tame inem krung saong ilamu di urang Philippines; gah du lịch tui jalan khang kajap, sami samar, hu prein tagok veik saong meriak gauk di dunya piah ba taneh ia Đông Nam Á ni jeng taneh ia khang gah du lịch di châu Á. ./.