Gilang Pariak Karja Viet Nam birau alin brei UBTƯMT negar Viet Nam 82 ti dong buh tame ngak Danak dak abih baoh sang oh daok taik hatak, sumu jien padang ngak birau 1.366 baoh sang  ( jien daong ngak sang birau lac 60 trieu dong sa baoh, ngak hu 37% dut saong bruk kuhria dahlau. Muk Nguyễn Thị Hồng, Thong doc Gilang pariak Karja Viet Nam mboh lac: Ini lac piah urang ndoan, urang ngak gah Gilang pariak patui bruk brei mboh hatai anit ranam, jalan diukrai “ Menyum ia hadar tal halau ia”, “hala siam papaok hala tahak” pachreih tagok hatai anit ranam jum pataom bangsa.

Ong Trần Văn Lâu -Akok UBND Ban Can Tho birau likau Thu tuong Rajaei brei adat  ka ban ini peih ngak danak dak padang veik labik daok bhap bini labaih 3.000 ti dong meng phun jien daok labaih di Danak dak ramik pasiam, peih praong 7km Jalan patao raya 91. Akok UBND Ban Can Tho jeng hu likau Thu tuong Rajaei brei adat  ka ban padang ngak rilo danak dak hu makna praong, ngak kan kandah tal rilo baoh sang ginup brei nao daok labik birau, min ban kuhria oh ka ginup. Langiu di nan, Rajaei  meda brei adat ka ban padang dom danak dak piah ngak brei patagok Ban Can Tho.

Di tinh Tay Ninh, bruk peih mbaok taneh ngak jalan Vanh dai 3 TPHCM ngak hu salah abih ka dom baoh sang, ngak blaoh labik daok birau ka bhap bini saong brei taneh ka urang padang sang. Tui nan, 3 paok thau padang ngak praong di danak dak hu dom po thau pataom tame ngak hu jaik 78%, ginup tui dom bruk ba tabiak. Langiu di nan, jalan Vanh dai 3 pambuak TPHCM – Trung Luong saong Ben Luc – Long Thành urak ini ngak salah blaoh tatua tapa jalan, tuh menyek, pagam gom khik brei jalan hu salamat saong jalan peih praong pambuak haong jalan peih drak samar Ben Luc - Long Thanh.

Kong an TP.HCM, pambuak haong UBND dom phuong, xã di ban raya ngak bruk pathau khan jak ba bhap bini yak klak dom paga pacang sang meng pathei di dom chung cu. Tukvak tapa, bruk apui khuah dom chung cu, sang tro ngak khat lahik trak ka manuac saong drap ar. Yau nan ye, Kong an TPHCM tacei ba dom don vi  pambuak tal jak ba bhap bini yak klak dom paga pacang sang meng pathei, dom kapal yaih khan, paoh trun talaoh tuan  labik nao mai, abaih di nyu nan lac di ban kong tapen sang piah  mbuan nduac tabiak tuk hu bala rah tabiak.

Ar tasik gah Pei tinh Ca Mau atah labaih 108km, piah pacang bala khik bruk pala drak jeng yau raidiuk di bhap bini, abih di nyu lac bhum ngak pataba ia mbak piah ngak padai hu dua mbang, raong ikan kuah saong pala glai tràm, abih di nyu lac Bein pakat negar U Minh Hạ… Yau nan min, urak ini jalan ar tasik  nan daok ciew di rilo mbang riyak khang paoh tame, bhian ia ndik ngak jaleih yaok mbang hu ribuk. Tinh Ca Mau pok tagok pakat hu tham quyen piah paga pacang ar tasik meng gah Pei tapa gah Timur piah khik pacang caga, tui nan patagok bruk pala drak.  

Dom tinh gah Barak saong Dong Bac Thái Lan daok gaok rilo kan kandah  trak kayua ribuk ia sua hadei rilo mbamg hajan praong dalam adit blaoh. Njauk caik hatai lac, di tinh Nam, 2 jalan raya oh nao mai hu kayua tatua jaoh saong glut jaleih taneh. Bruk glut jaleih taneh daok ngak jhak biak trak tal yaok rituh baoh sang di labik ini. Cuc Kuhria dut iek langik tasik Thai Lan hu kakei dahlau ka hajan praong saong ribuk meda rah tabiak di rilo labik dalam negar Thai Lan mbiah harei 24 bilan 7 anak tal.

Mentri An ninh Negar My daok ginum biai haong karja di 5 bang ka bruk padang ngak dom pasak khik urang tame negar suan hukum tui jalan peih ngak di bang Florida. Dom mbang ginum biai peih tabiak dalam tuk karja Tong thong Donald Trump daok ngak catang sarak patrauk urang negar langiu tabiak. Dahlau di nan, Thong doc Florida, ong Ron DeSantis, ini lac jalan ngak anak meta piah trun dom takik bruk ka dom sang guk tieu bang saong kaya mbang piah ngak tui hukum dalam tuk urang negar karei panduan mai biak ralo.

Urang jakar Mexico birau duah mboh labaih 700 urang di sa trang trai di bang Guanajuato, bhum kreh negar ini, dreih bruk pablei pagat manuac. Dom urang nan daok dalam nan saong ngak bruk biak trak: oh hu harak ngak  bruk, oh hu bayar jien bilan ginup saong oh taduan jitvu y te. Ini lac sa dalam dom bruk jhak abih pambuak tao bruk pablei pagat manuac dalam dom thun jiak ini di Mexico./.