Rilo tỉnh ban, hu peih ngak bruk ni 

Hadei di 2 thun klaik klaoh kayua jit Covid-19, Bruk peih ngak "Abih taneh ia jum pataom gauk kayua urang kathaot " thun  2022 rah tabiak di mon 8 melam ni (17/10) di  Hà Nội. Danak dak kayua  Ủy ban Trung ương MTTQ Việt Nam peih ngak hu angan ieu lac “Jalan ngak di hatai caong”, jalan ngak piah daong, piah klah rabha hatsai ranam, dong urang kathaot hu jalan yam tagok , ngak po rai duik, piah“oh urang halei njauk klak veik gah likuh”. Jiak 3 thun tapa,dalam taneh ia njauk kan kandah di jit prong  Covid-19, min meng hatai  “anit ranam gauk”, rilo kapul nyaom, menuac urang, doanh nghiệp hu dong labaih  19 ribau tỷ đồng. Meng kadung jien dong ni, dom boh sang prong jum pataom  hu padang ngak , anek bhik sang kan hu nao bac daa song yaok ribau danak dak brei ka rahra hu padang ngak.

UBND tỉnh Long An bahrau brei thau sarak di Thủ tướng Rajaei taduan lac huyện Tân Trụ mek hu chuẩn palei pala bahrau. Hadei di labaih 10 thun peih ngak danak dak bruk ngak negar ka padang ngak palei pala bahrau, taong abih dom jalan xã, jalan palei hu tuh nhựa, tuh bê tông abih, 28/29 sang bac dom pakat mek hu tanuh chuẩn pakat negar; taong abih sang bhap bini hu sang daok khang kajap atau meteh khang kajap. Meng jhul khang bruk pandar jamriak samu gauk, pandar hu siam ilamu công nghệ dalam bruk ngak nong hu daong paglaong jien mek tame kuhria tui akaok menuac di Tân Trụ tagok labaih 53 triệu đồng sa thun.

Urak ni, ribuk ka  6 daok atah di palao  Hoàng Sa labaih 720km nao gah Đông Bắc, dok nao tui gah pai  song hangin khang bhum jiak pasak ribuk  pakat  11-12, handoh pakat  14. Mban tacei jalan pakat negar pacang caga bala  meng langik tasik– Ủy ban pakat negar pacang caga bala meng langik tasik song dong duah urang gaok bala  bahrau hu harak  samar payua ka Mban chỉ huy pacang caga bala meng langik tasik song dong duah urang gaok bala dom  tỉnh, ban tapen tasik  meng  Quảng Ninh tal Khánh Hoà pandar  peih bruk pasang iek, yaok pataom kapan gaiy, dok ngak bruk dalam bhum di ribuk ; khik iek catang dom kapan gaiy tabiak tasik; khik khaw tin pambuak bruk song dom po kapan gaiy piah langyah chip dom bruk kanyah jhak  meda rah tabiak; caga dom jalan khik kajap  siam mekre ka menuac urang, drap ar di mangaok dom lồng bè, sang rong pala kaya ikan. Caga menuac, pandap dong duah piah samar langyah tuk hu bruk rah tabiak.

Urak ini, rilo bein durian di tỉnh Tiền Giang daok paik baoh aval biar rilo saong pablei hu yaom glaong. Urang blei salih mai tal bein blei baoh durian haong yaom meng 70-75 rabau đồng sa kg, glaong jang bilan dahlau 10 ribau đồng/kg. Thun ini, yaom lac jien khak, jien jru khik caga phun pala abih rilo jang thun bloh min urang pala durian jeng daok hu laba labaih 300 triệu đồng/ha. Tiền Giang lac labik hu taneh pala durian rilo abih dalam bhum ĐBSCL - labaih 16.000 ha. Ini lac janih phun mbang baoh hu kein laba glaong abih dalam 11 janih baoh kayau di tỉnh. 

Tal abih bilan 10 ni, gah du lịch tỉnh Bà Rịa Vũng Tàu meda ngak salah bruk pasang iek  labaih 60 labik rivang main bahrau  atau labik ngak pandap palei ngak, bruk pablei salih cong khin ba tame ngak  du lịch. Dalam nan, gah du lịch hu pabak labik rivang main bahrau, rami ramik ba dom tour, jalan hu pathau khan dahlau di nan tame  cơ sở dữ liệu du lịch, gam song nan hu panuac cong, brei thau dom kan kandah bo dom labik tal ni dok gaok, piah dom jabat pambuak tal lang talaih, palagaih ka labik rivang main hu peih ngak, dong patagok jien mek tame ka bhap bini pak ni.

Singapore daok dang anak mbang njaom mbak COVID-19 bahrau kayua biến thể phụ XBB (daok hu ieu lac BA.2.10). Akaok Mintri Y tế Singapore brei thau lac, mbang njaom mbak bahrau meda khang di abih di kreh bilan 11 tal, yaok harei meda hu 15.000 urang njaom ruak. Biến thể phụ XBB njaom mbak samar jang min takik kan kandah jang saong tal urak ini oh ka hu urang halei metai kayua biến thể ini. Biến thể phụ XBB di Omicron hu mboh meng bilan 8, tal harei ini nyu hu mbaok di labaih 17 taneh ia.

Dalam bruk pataom chap dom labik  main mbia suan hukum dui atah jiak sa bilan ni mai, Jabat chức năng Campuchia hu pasang iek labaih 10.000 labik medhi lac peih bruk main mbia  suan hukum dalam negar  song ba 273 urang tabiak tòa, dalam nan hu 56 urang negar langiu. Dahlau di nan, harei 16/09/2022, Thủ tướng Campuchia Hun Sen brei padang  kapul  cap mek dom labik main mbia suan hukum. Meng di tuk peih ngak, kapul  hu mboh rilo labik  main mbia suan hukum  song tong tayah dom jalan pablei salih menua, kateik greik chap ngak bruk.

Rajaei Mexico bahrau tabiak panuac lac dom urang di cư Venezuela jhui ngak jeng dom kapul nyaom saong urang halei hu mbaok tame dom kapul nyaom yau nan, oh hu tame Mỹ tui danak dak daong ngak pahla  bahrau hu khan brei thau. Dahlau di nan, harei 12/10 meng bloh, Rajaei Mỹ haong Mexico njauk gauk lac Mỹ meda taduan 24.000 urang Venezuela tame meng jalan kapal haoh, tapa 1 sarak njauk adat hukum dreih yau danak dak hu pandar ka urang di cư Ukraine, saong brei pateok tabiak dom urang tame suan hukum tapa jalan tapen negar./.

Urang lang: Mousaphuong -Hanipha- 17/10