Rilo bruk hu peih ngak dalam harei 8/3

Di var taom mbaok lambaok urang kumei ngak praong, pan kaok, urang kumei trí thức, văn nghệ sĩ hu angan je di tuk uan Harei Dunya urang kumei 8/3, peih tabiak di harei kabroi 7/3, Thủ tướng Phạm Minh Chính lac, dom bruk rik daong khang kajap, hu makna praong di dom rairah urang kumei patui gauk dak harei dak pabak ilamu siam gheih meng kan mai di urang kumei Viet Nam. Thủ tướng jeng ndem lac daok rilo bruk njauk ngak piah ba mai raidiuk dak harei dak siam jang ka bhap bini drei, piah ka urang kumei hu lagiah ngak bruk daong ka XH, ka taneh ia. Gam haong nan, dom mentri brei pasang iek veik taong abih sarak daong urang kumei piah daong ka Rajaei, dom sarak ngak brei raidiuk siam jang ka urang ngak di KCN, abih di nyu lac sang daok, sang payua uranaih, sang bac piah urang kumei sahanang hatai ngak bruk.

Hadei di 5 thun, tabiak bruk urang kamei padang mbang ngui, tal harei ni di dom pakat  kapul urang kamei di  Đồng Tháp hu labaih  1.630 pandap padang mbang ngui  hu tut angan, dalam nan hu taong yaom bloh  740 pandap padang mbang ngui  song peih bruk ngak mbang pablei salih. Saai Nguyễn Thanh Hoa, Paok akaok Kapul  Liên hiệp urag kamei  tỉnh Đồng Tháp brei thau, bruk urang kamei padang mbang ngui  hu rik dong paglong rai duik bruk ngak mbang ngak huak song ngak jeng bruk salih bahrau biak siam ka urang kumei dalam kapul. Meng nan, rai duik di adei saai hu salih bahrau, yam tagok tabiak truh kathaot, rik pren tame padang ngak palei pala bahrau di labik drei daok.

Piah pasiam veik darak pasar tuai dunya mai ravang me-in di Bình Thuận, pasiam veik dom bruk ngak di gah du lịch tui jalan adat ba tabiak di Rajaei, meng ini tal harei 14/3, Bình Thuận meda peih bruk raok tuai mai ravang me-in lac urang negar langiu, urang Việt Nam daok di negar langiu, rahra Việt Nam hu mbaok tame danak dak ngak iek bruk raok tuai du lịch dunya, min brei pabak ginup dom kadha ba tabiak ka bruk raok saong duh tuai dunya mai ravang me-in Bình Thuận. Hadei di harei 15/3, Bình Thuận meda brei peih pabah mbang veik taong abih gah ngan saong darak pasar tuai du lịch dunya tui tacei pato di Mintri Ilamu, Thể thao saong Du lịch.

PGS-TS Tăng Chí Thượng, Yam ndoc Sở Y tế TPHCM, brei thau, hadei di tuk uranaih di ban raya nao bac tapak gilac veik, dom urang njom Covid-19 tagok glong , dalam nan hu  90% lac uranaih ala  12 thun . Tui kuhria, yaok 100 uranaih nao bac  ye hu meng  2-3 uranaih njom Covid-19. Piah diuikrai siam mekre, salamat, lagaih haong jit praong, TPHCM daok ba tabiak bruk klauk vaccine ka dom uraniah umo meng 5 tal 11 thun. Tal urak ini, bruk kuhria caga hu ngak salah bloh, cang tuk Mintri Y tế brei ngak ye peih ngak chip.

Huyện ủy Châu Đức, tỉnh Bà Rịa - Vũng Tàu brei padeih pan bruk ngan haong ong Nguyễn Đức, Bí thư Đảng ủy haong amuk Trần Thị Huệ, akaok UB bhap bini xã Bình Trung, huyện Châu Đức piah ngak brei cambaih laih bruk ngak dalam pan akaok, ba jalan tacei pato dalam xã pambuak tal bruk caik rah tabiak labik ngak veik dầu nhớt suan adat dalam xã. Dahlau di nan, yau Rayo sap ndom VN brei thau, dalam harei 24/12/2021 UB bhap bini xã Bình Trung hu peih bruk pasang iek saong ngak harak biên bản bruk ong Trần Thiện Minh (daok di phường Phước Nguyên, ban Bà Rịa) padang labik ngak veik nhớt thải suan hukum di palei 5. Min Karja xã tok ieu ong Minh padeih dom bruk ngak di labik ngak veik nhớt bo oh pathau khan bruk nan ka dom jabat karja pambuak tal piah langyah, ngak brei menuac sia mboh pandik hatai.

Mbang ginum biai ka 3 Nga-Ucraina hu rah tabiak di melam 7.3 (tui tuk vak Việt Nam) di Belarus song dui atah labaih 3 tuk. Tui urang daong bruk Chánh văn phòng Tổng thống Ucraina, Mi-kha-in Pô-đô-li-ắc (Mikhail Podolyak), mbang ka 3 hu  “dom dom siam lagaih”. Urang caik hatai tal bruk pasiam dom jalan ngak pahla. Dok tui  akaok kapul negar Nga, trợ lý tổng thống Nga, bruk ginum biai ka dom jalan  chính trị song quân sự, min, nyu rah tabiak oh mbuan . Dom mbang ginum biai di 2 taneh ia piah langyah bruk di  Ucraina jeng dok hu rah tabiak

Hội đồng Bảo an Liên hợp quốc harei kabroi (7/3) hu pataom gauk ginum biai ka dom bruk cuh iek tên lửa bahrau ini di Triều Tiên. Min mbang ginum biai sa mbang tra oh ba tabiak hu panuac ndom haong gauk. Salih tame nan, Mỹ haong 10 taneh ia karei, dalam nan hu Pháp, Anh, Nhật Bản, Na Uy, Hàn Quốc tabiak panuac di drei brei mboh hatai suh saha ka dom bruk cuh iek tên lửa di Triều Tiên. Dalam adit bloh, Triều Tiên hu 2 mbang cuh iek tên lửa. Gah Triều Tiên brei thau, bruk cuh iek lửa bahrau ini, lac bruk ngak iek praong ngan haong dom vệ tinh do thám di taneh ia ini.

Hajan khang dui atah ngak dauk ia khang di rilo jalan prong di ban ine Kuala Lumpur di  Malaysia. Tapa rayo papar binguk mboh lac, rilo boh sang song radaih dauh dalam ia sua. Gah cứu hộ njauk pandar gaiy cao su piah ba urng dok gar tabiak gah langiu. Tui kuhria mboh dahlau, ban ine Kuala Lumpur daok hu hajan praong, hangin khang dalam dom harei anak tal. Mbang hajan ia sua mbang ni  rah tabiak dom adit hadei di mbang ia sua trak  dalam  8 bang di taneh ia ni di puac bilan  12/2021 song akaok thun ni  ngak ka 20 ribau urang lahik sang dok./.

Urang lang: Hanipha- Ái Nghiêm -8/3