Hadei dom harei padeih Tet, urang ngak  di TPHCM mboh gilac veik duah bruk. Tui kuhria mboh dahlau, dalam thun 2026, ban raya hu labaih 313.000 urang ngak. Kuhria akaok thun, bruk palih ruah labaih 55.000 bruk ngak, pataom tame dom gah ngak bruk ngak kaya kan, cơ khi, nduac mac, logistics, cong nghe thong tin, pablei salih, jitvu saong jitvu duh ka tuai damuai. Ralo bruk ka urang ngak meng tangin takai hu bac pasram blaoh saong urang ngak hu ilamo. Ini lac bruk siam lagaih di darak pasar, peih tabiak jalan ngak bruk praong ka rilo hadei gilac veik mai ban raya ngak bruk.

Di tỉnh Dong Nai, dom khu kong nghiep jeng mboh chreih chrai gilac veik ngak bruk. Urang ngak gilac veik mai ngak bruk, dalam hatai caong khin kham merat sa thun mek hu rilo jak jeng siam mekre. Ong Đinh Sỹ Phúc, Chu tich Công đoàn công ty TKG TaeKwang Vina di phuong Trấn Biên, tỉnh Đồng Nai khan lac, don vi taduan hu labaih 98% dalam taong abih tih 35.000 urang ngak kong gilac veik mai ngak bruk. Piah pachreih urang ngak bruk, urang ngak praong di kong ty saong kong ndoan tame tal labik ngak bruk piah rivang saong alin jien lixi tal tangin yaok urang ngak 200.000 dong.

Tet nethak Athaik Waw, gah yulit TPHCM kuhria hu labaih 4 trieu 300 ribau mbang tuai damuai, tagok 35% dut saong thun dahlau. Di pasak ban raya, Jalan bingu Nguyễn Huệ lac labik pachreih hu rilo tuai damuai mai sirah rivang ma-in, thaot binguk. Langiu di nan, Nyaom Bingu Xuan di Bein bingu Tao Đàn, darak bingu Xuan “Tapen kraong, ala gilai” di Bình Đông saong Harei roya Jalan Tapuk di jalan Lê Lợi biak chreih chrai, pambak praong thaik binguk siam mekre pachreih urang di dom harei akaok thun birau.

Rilo bruk ngak ilamo, the thao uan raok thun birau nethak Athaik waw 2026 di bhum Lam Dong pachreih yaok ribau bhap bini pak ini saong tuai damuai mai rivang. Bruk pakacah gaiy gilai  di kraong Ca Ty, phuong Phan Thiet meng lavik mai hu jeng labik peih ngak ilamo akaok thun birau. Tui gah yulit tinh Lam Dong, bruk sirah ma-in yulit tapen tathik gam haong rilo bruk ngak ilamo, padhih the thao hu tuai damuai anit ranam. Thun 2026, tinh Lam Dong kham merat taduan raok labaih 25 trieu mbang tuai damuai; dalam nan taduan raok 1 trieu 800 ribau mbang tuai negar langiu.

Di tinh An Giang, tapa pasang iek taneh pala drak, hu labaih 12.000 ha taneh pala phun njom ruak, ralo lac ruak haluk hala, halak bilik hala, rầy nâu, rầy phấn patih, tikuk kaik padai. Ta-eng njam patam saong phun mbang baoh njom ruak halak halin labaih 1.300 ha. Anak bruk nan, gah chuc nang kakei urang ngak nong padeih padei Tet ma-in juai var rivang iek hamu puh, bein phun. Bruk tui iek hamu padai brei bhian yaok harei, oh caik jit ruak tamuh hadei Tet.

          Bhap bini ban Mexico City, Mexico daok ngak samar ba kaya mbang saong kaya y te pataom daong ka bruk dui atah sa adit piah ngak pahala tal Cuba. Dom janih kaya hu pataom ralo lac ikan ya buh pa-op, menyek mbang saong dom janih jru cavao. Bruk jak ba urang rik daong rah tabiak dalam tuk Mexico sanya daong ka Cuba hadei tuk padeih pablei menyek tapa taneh ia kaoh pulao ini  kayua tavak tame dom jalan jien je kayua Mỹ pandar ka dom taneh ia  pablei menyek ka Cuba.

       Patui dom bruk pakacah ngak samar  piah ba dom kaya daong ngak pahala tal Gaza, jabat daong ngak pahala Ai Cập hu payua kaya kan daong pahala birau hu labaih 6.000 tấn  kaya mbang saong ndap nda karei tal Gaza. Dahlau di nan, Kapol Trăng lưỡi liềm đỏ Ai Cập hu pajeng kaya daong jaik 7.000 tấn kaya kan tal Gaza, rik tame daong ka bhap bini bhum taneh ini yam tapa kan kandah.

          Dom urang ilamo Trung Quoc yaih khan AI hu angan DeepRare, iew angan “ bac si thong minh” akaok meti dut iek dom ruak takik gaok. Gru Tôn Khôn, akaok nyaom roh duah khan lac, daok kuhria ba tabiak bruk padang dom kapol nyaom dut iek ruak takik mboh di dunya saong duah thau veik AI ini tapa 20.000 mbang urang ruak dalam 6 bilan anak tal.