Dang akaok mbang nyaom biai ka 6 di Mban Pato tacei Trung uong ka sarak saong darak pasar taneh riya sang danaok, Thu tuong Phạm Minh Chính ndom meyai lac, thun 2025, Rajaei hu pato tacei biak catang, ba tabiak dom sarak, taoh talaih kan kandah, rilo meng lac sang daok rahra. Tui nan, hu salah blaoh labaih 100 ribau sang daok rahra. Ngan haong nen tang daok hu brei salah blaoh 1 trieu sang daok xa hoi dalam thun 2028, aval jang kuhria 2 thun. Thu tuong pandar biai ka jalan langyah ka rabha sang daok ka urang hu jien mek tame kuhria rah tapa, patagok pabak sang daok ka rilo tal pakat karei gauk, khik kajap bruk samu gauk quyen hu sang daok di yaok rahra.

Harei 2/3 anak tal Mban Thuong truc UB MTTQ Viet Nam tinh Vĩnh Long peih nyaom biai taom cu tri piah urang hu angan palih ruah tame Quoc hoi saong urang Hoi dong bhap bini tinh jak ba buh phieu ka drei. Nyaom biai taom gaok cu tri piah ba mbuan lagaih ka urang ung cu hu taom gaok cu tri njauk tui hukum ba tabiak; pathau khan tal cu tri saong Bhap bini ka danak dak bruk ngak di drei meyah hu palih lambaok ka Quoc hoi saong HĐ Bhap bini; gam pang saong taduan panuac brei thau ka bruk sahaneng, hatai caong khin bo cu tri hu payua.

Di var pataom mbaok di urang ngak praong dalam tinh haong dom jabat ngoai giao, pambuak kapul, kapul saong bhap bini gah ngak mbang pablei salih di bingun bal Pataih Asaih Waw 2026, Bi thu Tinh uy Tay Ninh Nguyễn Văn Quyết brei thau, thun 2026, Tay Ninh brei pataom tame bruk mek rahra, gah ngak mbang pablei salih ngak pasak, padang labik buh jien tame tantu cambaih laih, lagaih. Gam haong nan sanya taoh talaih kan kandah, langyah patruh bruk gar tavak ka harak gar ka bruk buh jien tame, taneh riya, jien padai, brei kein lagaih siam abih ka gah ngak mbang pablei salih, kham merat ba Tay Ninh tame kapul bhum palei hu labik pablei salih dang akaok dalam labik saong dalam neger.

Di Ban raya Ho Chi Minh ruak pandiak tabiak darah saong ruak tangin takai urak ini trun. Dalam adit padeih Tet Nguyen dan hu 452 mbang urang ruak pandiak tabiak darah saong 281 mbang urang ruak tangin takai tangin. Muk Lê Hồng Nga, Pho Yam ndoc Pasak Khik iek ruak kik TP.HCM khan lac, yaok thun, ruak tangin takai cambuai ralo di puac bilan 3, akaok bilan 4 saong mbang ka 2 di bilan 9 tuk tame thun bac birau. Ngan haong ruak pandiak tabiak darah, gah y te iew dom bhum palei pasang duah, langyah aval dahlau bruk ba tal ruak, brei ramik pametai anek raok lang quang saong pambuak dom urang ngak bruk dakwak pathau khan saong daong pacang jit ruak di bhum palei.

Bo Tu lenh Bhum Canh sat tasik 4 peih pakak tal bac pabak sap Khmer ka urang jakar, urang ngak bruk dalam Bhum. Tal bac kuhria hu peih dalam 6 bilan, tui 2 jalan lac bac online saong bac tapk, dom urang bac hu bac megru sap Khmer di 4 banah: pang, ndom, puac, vak saong sap Khmer ka ilamo Canh sat tasik. Meng nan, daong paglaong asar siam luac jalan ngak bruk pasang iek saong taong bhat kol duas, ngak suan angaok tasik, jeng yau paglaong asar siam dom bruk pambuak haong gah langiu di labik saong canh sat tasik Viet Nam.

Chu tich Cuba Miguel Díaz Canel khan brei thau taneh ia ini khik caga dahlau “ bruk mesruh metak di kol khung bo saong lin taong pah”, sa harei hadei tuk Havana brei thau pametai 4 urang di gilai peih dreh samar tut angan di bang Florida (Mỹ) tame bhum tathik  saong patuh phao tame gilai pasang khik. Rajaei Cuba khan lac dom urang angaok gilai lac bhap bini Cuba daok di Mỹ sahaneng cagar veik rajaei.

Uy mban Pacang khik dom Nha bao (1 kapul oh kein laba hu jabat di My) brei thau, thun 2025 hu rilo abih 129 urang nha bao saong urang ngak truyen thong metai dalam tuk ngak bruk. Phao siu di Israel ngak 86 urang nha bao metai, rilo meng lac urang Palestine di Gaza saong 31 urang ngak bruk dalam mbang taong tame pasak truyen thong di kapul Hu-thi di Yemen. Israel oh brei ka urang nha bao negar langiu tame Gaza, kayua nan taong abih dom urang nha bao metai di Gaza rilo meng lac urang di Palestine.

Kadung jien Dunya ( IMF) mbaoh harak brei ka Ucraina mesre 8,1 ri dola tui danak dak dui atah 4 thun, dalam nan hu 1,5 ti dola brei samar dahlau. IMF khan lac kadung jien nan daong ka Ucraina khik tani tanat bruk ngak kinh te vi mo, piah kuhria jien ngak bruk karja jeng yau caga bruk mesruh metak daok rah tabiak yau urak ini./.