Page harei 26-2, urang cử tri di dom phuong Tam Thắng, Phước Thắng saong xa Long Sơn di Ban raya Ho Chi Minh nao buh phieu palih ruah aval. Tui Uy Mban Palih ruah Ban raya Ho Chi Minh ini lac dom labik peih bruk palih ruah aval ka labaih 4.500 urang buh phieu lac daok dalam dom kapul, labik daok ngak bruk angaok tasik, oh meda palih ruah dalam harei palih ruah urang ka Quoc hoi mbang ka XVI saong urang ka HĐ Bhap bini dom pakat, tukvak 2026 - 2031 rah tabiak di harei 15-3 anak tal. Dahlau tuk rah tabiak bruk palih ruah aval, kapul ngak bruk di uy mban Palih ruah Ban raya Ho Chi Minh hu nao pasang iek, taong yaom dom bhum palei hu srap gap, salah blaoh dom bruk caga tui njauk adat di hukum.

HĐ Bhap bini tinh Ca Mau mbang ka X tukvak 2021-2026, khan tapa Sarak pasiam quy hoach tinh Ca Mau tukvak 2021 - 2030, kuhria pamaong tal thun 2050. Tui asal kadha quy hoach, tinh Ca Mau brei mboh jalan ngak kuhria tal thun 2030 brei jeng pasak nang luong tai tao saong ngak kaya hadang di dalam negar, gam haong nan lac pabah bambang pajeng ba hu makna di bhum taneran kraong Cuu Long. Labik patagok di tinh Ca Mau brei hu peih ngak tui jalan "1-2-3-4-5", dalam nan hu: 1 got padang bruk , 2 pasak, 3 gah cakrok patagok, 4 bhum saong 5 jalan pambuak dom rilo bhum.

Tinh Vinh Long peih praong prang Harei pathau khan drap ar ilamo oh mboh di meta pakat negar ka “Raya adat Nguyên tiêu”, pagam haong peih pakak Adit Ilamo saong Jirah rivang xa Đại An. Adit peih raya hu peih meng ini tal harei 3/3 hu rilo danak dak yau rây adat bhap bini, nyaom darak pablei salih, labik parang palei kaya mbang, me-in don ca tai tu…ngak jeng arthak ilamo gheih karei, daong yaih khan thaik thaot bhum palei. Bruk ba tame harak angan drap ar ilamo oh mboh di meta pakat negar lac kein lagaih piah bhum palei patui veik khik ramik, patagok bruk siam gheih di raya adat pagam haong patagok jirah rivang karo kajap.

Mban Pato tacei Bol lin Bien phong tinh Dong Thap pambuak haong kongti PETROLIMEX Dong Thap bahrau peih bruk pathau khan ka bruk pacang kacak taong mek kaya tasik suan hukum, oh pathau khan tui adat hukum IUU ka dom gilai ikan srap gap tabiak tasik di akaok thun. Di bingun ini, Kongti  PETROLIMEX Dong Thap daong alin 1.000 hala dok Negar ka dom gilai taong mek angaok tasik piah ka mikva khang hatai tabiak tasik. Hadei pagam, tinh Dong Thap hu labaih 1.520 gilai ikan.

Di rilo tinh di Bhum taneran kraong Cuu Long, bruk pandar xung ndien, janih hoa chat, mata hanyol sit…mek ikan, hadang jeng rah tabiak. Bruk pandar biak rilo, rilo meng lac bruk taong mek si abih, ngak ka kaya dalam ia kurang jaik abih. Gaok mai rilo urang ngak nong khin palao raong, pasiam ikan ia taba min gilac duh hatai ka bruk co klaik, rilo meng lac bruk pandar xung ndien mek ikan amaik saong ikan anek.

Gilang pariak Trung ương Thai Lan brei trun jien je di mbang nyaom biai ka sarak jien padai akaok thun 2026, piah daong bruk kinh te anak dom kan kandah meng bruk pablei salih haong Mỹ saong jien pariak Baht catang. Ini lac mbang trun jien je  ka 6  kuhria meng bilan 10 thun 2024, kuhria abih tih jien di gilang Trung uong Thai Lan trun 150 tanut piah pachreih bruk ngak mbang kinh te di taneh ia praong ka dua Dong Nam A. Jien laba hu kuhria brei trun di var ginum biai bilan 12 meng blaoh.

Rajaei Han Quoc hu ba tabiak rilo jalan ngak piah ramik pasiam veik bruk tagok yaom saong “pablei chiat” ka tuai damuai, tapa nan pasiam thaik thaot mbaok meta saong prein meraik di gah jirah rivang. Tui nan, Rajaei Han Quoc brei pasiam hukum, pandar dom labik blei pah sang padeih padei di ta-eng meuac urang, dalam nan hu bruk duh karei ka tuai damuai negar langiu, brei khan tantu ka yaom kaom saong ngak tui adat ka yaom kaom. Dom kuan mbang huak, khach san oh tantu cambaih laih ka yaom kaom atau mek jien biak glaong brei taong bhat catang…

Yaok rituh bhap bini Kenya daok gal tavak di Campuchia payua harak yak pathau tagok Toa an pakat glong di Nairobi, caong khin Rajaei Kenya langyah samar piah ba urang gilac veik mai pablei negar hadei tuk thau drei gaok urang pagat pablei lac ba nao ngak bruk di negar langiu. Dom urang payua harak yak bak khan lac urang ngak bruk biak gaih glar, hu harei ngak tal 16 mon. Dom urang khan lac daok taong paoh saong oh hu jru ruak dom laka kayua taong paoh./.