Page ini di Jabat Trung uong Ndang, Tong Bi thu Tô Lâm dang akaok mbang nyaom biai Mban Bi thu brei panuac ka pathau khan dom bruk naih gheih peih ngak Sarak 55 di Mban Bi thu ka bruk peih danak dak Tet nethak Asaih Waw 2026. Tamat blaoh mbang nyaom biai, Tong Bi thu Tô Lâm pok meyaom bruk ngak di dom pakat uy, kapul Ndang, karja, Mat tran Negar, bol lin pan phao karaong dalam dom urang jakar, kong chuc, vien chuc, urang ngak bruk hu ngak tani tanat bruk pato tacei di Mban Bi thu, khik kajap ka rahra raok Tet bui sambai, trei sir, anit ranam, an ninh, salamat, brei arthak siam gheih yam tame thun bahrau. Min, bruk di anak biak drak damak, Tong Bi thu pandar sa majam chinh tri brei ba tangin tame bruk ngak.

Tinh Dong Nai hu labaih 2.500 urang ngak bruk di dom doanh nghiep ngak bruk tapa Tet Nguyen dan nethak Athaik Waw 2026. Ini lac bruk kham merat piah sumu bruk ngak tabiak kaya kan saong tukvak pambuak bruk meng akaok thun. Dom doanh nghiep, don vi ngak bruk tapa Tet pataom tame ralo di dom gah, yau: jhik khan ao, klik takhaoh, ndap nda ngak meng kayau, ngak kaya dien tu saong ngak kaya mbang…Bruk ngak sumu oh lac daong ka doanh nghiep jao kaya ka urang pambuak bruk blei bo daok mboh bruk salih birau  dalam pablei salih meng dom harei akaok thun birau.

Dalam 9 harei padeih padi Tet Nguyen dan nethak Asaih Waw meng blaoh, tinh An Giang raok labaih 1,7 trieu mbang tuai damuai jirah rivang, dalam nan hu labaih 98 ribau tuai damuai dalam dunya, tagok labaih 37% dut haong tukvak ini thun dahlau. Daok di dac khu Phu Quoc, kuhria hu raok jaik 400.000 mbang tuai damuai. Tuai damuai mai jirah rivang tagok glaong mbiah, abih di nyu nan lac rahra saong tuai damuai mai jirah rivang me-in, duh paling di labik Chau Doc (Phuong Vĩnh Tế, Phuong Châu Đốc, xa Núi Cấm) kayua urak ini Labik Jirah rivang Núi Sam oh mek jien jirah rivang.

Di tapen tathik ikan Đông Tác, phường Phú Yên, tỉnh Đắk Lắk, rilo gilai vah hu ikan ngừ đại dương pataok tame. Hadei nao ngak mbang di tathik atah, thei jeng glaih min mbaok meta hadah hadai, kayua gilai pajeng bak ikan, ini lac bruk jak jeng siam mekre di dom harei nao ngak mbang di tathik tapa Tet. Tui yaok kuhria di Chi cuc  Thủy sản saong Tathik kaoh pulao tỉnh Đắk Lắk, dalam 5 harei Tet, hu 10 mbang gilai ikan taong mek ikan ngừ đại dương tapa Tet  glac mai pataok tame ar, kuhria abih tih ikan labaih 50 tấn. Tui kuhria dalam dom harei anak tal hu veik labaih 70 sruh gilai mai, ba tui rilo ikan hadang akaok thun birau.

Rilo gah ngak mbang pablei salih baoh kayau di tinh Dong Thap peih bambang peih pakak hadei Tet saong pataom blei baoh durian di po bein hu yaom biak glaong. Hadei Tet bhap bini, dom gilang pataom blei baoh durian pajaih Monthong janih A hu yaom meng 135.000 - 138.000 dong/kg. Daok baoh durian Ri6, gah ngak mbang pablei salih blei di gilang hu yaom meng 78.000 – 82.000 dong/kg. Ngan haong yaom ini, sang bein hu laba glaong meng 20.000 – 40.000 dong sa kilo. Yaom lac yaom glaong min taneh pala durian brei paik baoh hadei Tet oh rilo nan ba tal bruk takik kaya, yaom tagok glaong.

Indonesia pablei tabiak 2.280 tấn brah tapa A Rập Xê Út piah ka urang nao Haji. Brei panuac hadei var ginum biai di Mentri ngak bruk di Jakarta harei kabroi, Yam ndoc ngak bruk di Tong kong ty Hậu cần Karja Indonesia, ong Ahmad Rizal Ramdhani khan lac, 2.280 tấn brah pablei tabiak negar A Rập Xê Út, yaom 150 ti Rupiah - labaih 9,6 trieu dola Mỹ hu parabha jeng dua mbang di harei 28/2 saong harei 4 bilan 3. Brah nan parabha tal dom labik tahaneh mbang ka urang nao Haji tui agama Islam Indonesia mai tal Mecca.

         Akaok mentri Kong nghe Khai tin An Do Ashwini Vaishnaw brei thau, negar ini dui pachreih labaih 200 ty do la buh tame tri tue nhan tao dalam 2 thun anak tal. An Do tal ini jeng oh ka ngak tabiak hu kaya tri tue nhan tao bahrau dalam dunya piah meriak haong dom kaya mai meng My atau Trung Quoc. An Do daok ngak tantu labik Nyaom biai Glaong pakat Pambuak tal AI yau sa nen tang piah pambak tabiak sap ndom di dom negar daok patagok dalam quan tri AI dalam dunya.

Tui dom jabat yulit Thai Lan, tui kuhria dalam thun 2026, taneh ia ini meda taduan raok  labaih 36 trieu mbang tuai dunya. Njauk ndem tal, rilo tuai damuai daok pamong tal dom labik rivang ma-in langiu dom pasak bhian randap  yau Bangkok atau Phuket, salih ka dom bhum palei takik urang thau tal jang, dalam nan hu Chumphon – labik birau peih rivang ma-in  sinh thai saong alam dunya siam mekre./.