Kuhria tal mon 7 page 13/9 hajan ia sua di Bắc bộ ngak brei 336 urang metai saong lahik; 823 urang njauk rambuac. Hajan ia sua jeng ngak ka labaih 200 ha padai; jaik 40 ribau ha njam patam dauk dalam ia, khat lahik, jaik 200 ribau baoh sang khut tayah. Lào Cai lac tỉnh khat lahik trak haong 98 urang metai, 81 urang lahik. Pacang caga haong ribuk, hajan ia sua hadei di ribuk, dom bhum palei  brei panduan ba 74 riau 536 baoh sang, haong 130 ribau 246 urang nao tal labik salamat. Dalam nan, Thái Nguyên lac bhum palei hu panduan ba urang ralo abih ngan haong 25 ribau 821 baoh sang.

Bảo hiểm hu bayar 7.000 tỷ đồng khat lahik kayua rabuk ka 3. Kuhria tal biar harei 12/9, dom doanh nghiệp taduan hu panuac khan ka jaik 9.000 bruk khut, lahik drap ar saong radaih jamriak, hu 14 urang matai, 18 bruk daok dalam bảo hiểm prein yava. Taong abih jien bayar ka anek menuac saong saong drap ar dalam mbang rabuk ka 3 saong hajan ia sua hadei di rabuk lac 7.000 tỷ đồng. Dom doanh nghiệp bảo hiểm hu ieu pataom menuac nao tal labik rah tabiak bala piah taong yaom, bayar jien, piah daong tuai damuai urang blei bảo hiểm, daong pasaim samar drah dom khat lahik, samar tani tanat raidiuk, bruk ngak mbang, pala drak, pablei salih.

Dalam tuk khat lahik kayua ribuk ka 3, ia sua tagok glong ngak ka rilo baoh sang bhap bini di gah Barak njauk pacang cakak, dom janih jru yau jru pandiak, pandik tian, aih caraoh, katal, jru luk kalik, bang keo ca nhan, lac biak caong hu. Nan ye, Sở Y te TPHCM peih ngak Danak dak “ Kadung jru baoh sang” piah daong 30.000 kadung jru ka 10 tỉnh, ban gah Barak negar. Langiu di nan, Sở Y te hu brei bruk ka yaok sang iek ruak đa khoa, chuyen khoa di TP pambuak haong sa sang iek ruak quận, huyện jeng dom kapol y te, caga nao daong bruk iek ruak bhap bini tuk ia sua trun.

Yaom lac daok yam tame kreh bilan 9, min ia angaok dom mblang hamu tathuak ia xả lũ huyện Hồng Ngự, tỉnh Đồng Tháp daok biar, ngak brei kaya ikan jeng takik tui. Di mblang hamu xã Thường Phước 1 saong xã Thường Thới Hậu A, huyện Hồng Ngự, ia daok tame hamu tapa dom cống peih. Bhap bini dalam palei hu ba pandap tabiak hamu cap mek dom janih kaya ikan bilan ia ndik, dalam nan rilo abih lac ikan riel. Min tal tukvak ini, ikan hu oh rilo, ikan riel hu min oh ka ginup praong piah pablei ka urang blei salih. Tui Jabat ngak nong saong patagok palei pala huyện Hồng Ngự, di bilai Tân Châu angaok kraong Tiền duk hu harei 10-9 daok 2,27m. Mbaok ia biar jang tukvak ini thun blaoh jaik 1m nan ye kaya ikan jeng hu takik jang.

Tui Pasak Kuhria mboh dahlau bruk langik tasik pakat negar, meng ini tal melam 15/9, di bhum Tây Nguyên, Nam Bộ hu hajan mbiah, hajan khang saong hangin khang, hu labik hajan khang biak khang meng 40 tal 80 mm, hu labik labaih 120 mm, hajan ralo tuk biar harei saong melam. Hajan praong di bhum Tây Nguyên saong Nam Bộ  meda dui atah dalam dom harei anak  tal. Tui kuhria mboh dahlau, di dom labik hu hajan praong saong khang meda ba tal dauk ia di dom labik dhaong, biar; ia sua di dom kraong, craoh, glut jaleih taneh tapen mbon ceik.

Meng dom kham merat pasiam veik dom khut tayah di rabuk Yagi, bruk ngak mbang ngak huak nao mai daok dang daok hu siam veik di tỉnh Quảng Đông saong tỉnh pulao Hải Nam, gah meraong negar Trung Quốc. Urak ini, labaih 1 triệu sang gaok kan kandah kayua rabuk daok hu điện pandar veik. Di tỉnh pulao Hải Nam, hu ngak salih bruk  tathuak ia dauk dalam dom taneh ngak nong. Taphia nan, 97% kapul gilai ikan tasik hu tabiak tasik gilac veik. Hu jaik 74% danak dak daok dalam tukvak padang ngak di Hải Nam hu ngak veik hadei di tuk brei padeih kayua rabuk.

Rajaei Thái Lan peih bruk brei jien 10.000 Baht, samu 300 USD ka bhap bini di nyaom urang mbuan gaok kan kandah dalam xa hoi tuk danak dak Kadung jien Kỹ thuật số meng harei  25-26/9 ini. Akok mentri Jien padai Thái Lan ndom lac bruk peih ngak danak dak nan, lac njauk ngak chip piah pachreih urang blei pandar, pabak prein piah kinh te tagok khang jang. Langiu di nan, danak dak ini jeng hu ba jalan ka bruk patagok di kinh te so saong he thng pasak dữ liệu negar dalam tuk Thái Lan daok jhuk khang bruk salih tapa pandar số.

Mintri Ngoại giao Ấn Độ brei thau, dom urang ngak praong pakat glaong di Ấn Độ saong Trung Quốc bahrau hu mbang ginum biai ka dom bruk praong rah tui jalan taphia negar (LAC) di Ấn Độ saong Trung Quốc piah tani tanat saong pasiam talei pambuak bruk dua gah. Bruk ginum biai daong palagaih ka 2 gah pasang iek dom kham merat jaik ini piah duah tabiak jalan langyah samar ka dom bruk daok kandaong veik rah tui LAC, tapa nan daong tani tanat saong padang veik talei pambuak bruk di dua gah./.