Jalan halang veik piah khik ka yaok anek saih tok hu pilih ruah sa hatai caong di sa jalan pilih ruah dalam angan hatai caong di anek saih tut angan tame ginup dom kein njauk tame bac dai hoc, tui asal kadha brei ngak dahlau di abih di hatai caong glaong jang. Taphia di nan, dom labik pato pakai dai hoc jeng ngak tabiak dua nyaom halang veik gah barak saong gah maraong. nyaom halang gah barak kayua Sang bac Đại học Bách khoa Hà Nội dang akaok saong nyaom halang gah maraong kayua Sang bac Đại học Quốc gia ban raya Hồ Chí Minh rami ramik tacei jalan.

Tui Sở Lao động - Thương binh saong Xã hội Vĩnh Long, dalam tuk padeih hè ini, dalam tỉnh peih hu 4 mbang pato caluai ka labaih 1.190 uraniah. Dom tal pato caluai hu daong pabak ilamu caluai ia ka uraniah, patagok siam mekre salamat tuk daok di labik kraong ia, patrun patakik bala mblung ia. Hè thun halei dom pakat, dom gah saong puk palei di tỉnh Vĩnh Long jeng hu jhul khang bruk pathau khan, jak ba uraniah kham merat pasram pahat rup pabhap, me-in sambai paglaong prein yava, pakhang rup pabhap. 

Cục Cảnh sát Pacang khuah, padam khuah saong daong duah urang gaok bala brei thau, dalam bilan 7, dalam taneh ia hu 305 mbang apui khuah, ngak ka 19 urang metai, 10 urang njauk rambuac, khat lahik ka drap ar, jien padai tui kuhria lac labaih 11 tỷ đồng saong 12,2ha glai. Dalam taneh ia hu 3 mbang patuh, ngak brei 3 urang njauk rambuac. Gah canh sat pacang khuah padam khuah saong daong duah urang gaok bala, Cong an dom bhum palei daong pacang khuah padam khuah hu 316 mbang apui khuah, bala, daong hu ka 117 urang, pato tacei, daong ka yaok ratuh urang njauk bala dalam mbang apui khuah plaih nyaih di bala hu salamat, daong hu dom drap ar yaom 10,5 tỷ đồng.

TPHCM urak ini hu 3 darak pasar đầu mối lac Thủ Đức, Hóc Môn saong Bình Điền, yaok malam pabak yaok rabau tấn kaya nong, pandap mbang ka ban raya. Nan ye bruk khik kajap siam mekre salamat ka pandap mbang meng di labik pabak lac bruk praong. Tui ong Cao Thanh Bình – akaok mban Ilamu - Xã hội HĐND TPHCM, meyah daok bruk pablei salih tui hatai oh thau asal di nyu, dom darak pasar đầu mối khik hu prein yava ka menuac sia ban raya halei oh? Nan ye ong Bình hu panuac ieu dom gah pambuak tal, roh duah danak dak salih số khik iek salamat pandap mbang, khang hatai buh jien tame ngak danak dak piah khik kajap bruk duah thau hu asal di pandap. 

Huyện Phú Tân, tỉnh Cà Mau hu 10 bangsa, dalam nan hu 9 bangsa takik, hu labaih 3 ribau urang lac dom bangsa Khmer, Low, Thái, Mường, Nùng, Tày, Êđê, Dao, Lào. Piah paglaong raiduik ka mikva bangsa takik, tukvak tapa rilo danak dak, sarak daong ba hu peih ngak siam lagaih, rik tame ngak trun manieng dom baoh sang kan kathaot yaok thun meng 1,5-2%. Huyện Phú Tân hu 8/8 xã hu pok brei angan mek hu tanut chuan palei pala bahrau, dalam nan hu bruk kham merat rik daong di mikva bangsa takik. Tapa nan, hu daong cak rok patagok taong abih gah kinh tế - xã hội, paglaong bruk mbang ngui, daok dang, ma-in sambai di mikva bangsa takik.

Hajan ia sua, ia dauk daok ngak ka ruak kalik kanyik njaom mbak samar di Philippines, tapa nan, gah y tế Philippines hu ba tabiak panuac kakei tal bhap bini. Meng akaok thun tal ini, dom menuac njauk ruak xoắn khuẩn kalik kanyik katam di Philippines lac labaih 1.440 urang, dalam nan hu takik di abih lac 162 urang matai saong yaok pluh urang brei nduac thận nhân tạo. Mintri Y tế taneh ia ini brei padang “jalan talei pandiak” taduan mek dom urang ruak saong ieu bhap bini samar drah nao tal dom pasak iek ruak meyah mboh yau njauk ruak. 

Urang jakar Trung Quốc brei thau lac, gah ngak nong negar ini njauk pasiam veik prein pacang caga saong ngak patrun dom kanjak jhak di bala meng langik tasik, gam haong nan, sanya daong jien padai rilo jang veik piah pasiam dom kaya nong hadei di bala hajan ia sua. Tui Mintri Kaya ia, 8 baoh kraong di dom tỉnh Liêu Ninh, Cát Lâm, Hắc Long Giang saong dom bhum labik Nội Mông saong Tân Cương, gam haong rilo bhum labik karei, rahtabiak bala hajan ia sua khang dalam harei ini (13/8). Hajan khang ngak dauk rilo labik praong, hajan khang ka oh bhian mboh meng nan mai di 33 bilai tui iek bruk langik tasik.

Dom bác sĩ di negar Anh bahrau ini ngak hu siam bruk blac raih thận ka sa uranaih 7 thun njauk ruak meng bruk daong blac raih di robot. Salih ka bruk blac tabiak, dom bác sĩ pandar pandap blac raih caik angaok tangin robot hu ba tame tian tapa sa labik raih sit. Meng hu tangin robot, bác sĩ ngak hu siam bruk blac raih kan kandah dalam tian daok sit di uranaih. Urang caong lac anak tal, meda hu rilo jang bruk blac raih ka uraniah meng pandar robot./.