Harei Dulich Ban raya HCM mbang 19 thun 2023, ngan haong kadha “Labik pasak pataom gauk - Jalan nao chreih chrai” gam haong kadha "TP.HCM taduan raok ayut” daok peih ngak di TPHCM. Harei pataom nan hu jaik 50 tỉnh ban ngan haong 150 labik parang pandap gam haong yaok ribau pandap dulich biak pachreih hatai di dom D.N ba tuai damuai, khách sạn, kapal haok, labik rivang main dalam negar. Harei pataom piah pachreih tuai damuai dalam negar tuk padeih hè 2023, ba mbuan lagaih ka dom bhum palei saong D.N yaih khan dom pandap, dich vụ tal tuai damuai. Meng nan, pambuak bruk patgaok dulich, jhul pakhang bruk cakrok patagok kinh te - xa hoi dalam negar.

Uan salam Tết meng kan Chôl Chnăm Thmây 2023 di mikva Khmer, Công an tỉnh Bạc Liêu bahrau peih bruk alin pandap saong pathau khan, tacei pato  hukum ka mikva bangsa Khmer di xã Hưng Hội, huyện Vĩnh Lợi. Ini lac sa dalam dom tinh, ban hu mikva Khmer daok biak rilo di tỉnh Bạc Liêu. Tukvak ini, Công an tỉnh hu jao alin 100 paok pandap hu brah, mì gói, pandap panda pandar yaok harei ka rahra gaok kan kandah di dalam xã Hưng Hội ngan haong yaom jien abih tih labaih 40 triệu đồng.

 Meng akok thun mbiah tal ini jit ruak pandiak tabiak darah( SXH) di tỉnh Vĩnh Long tagok biak glong ngan haong labaih 460 mbang. Urang njom ruak tagok glong abih di ban Vĩnh Long. Gah y te tinh ini mboh lac jit ruak SXH brei tamuh khang jang dalam dom bilan hajan anak tal. Piah pacang caga jit ruak SXH njom mbak praong, langiu bruk blei dom jru hoa chat saong jru taong ruak, Vĩnh Long daok peih ngak rilo jalan pacang caga jit ruak. Dalam nan , njuak caik hatai tal burk pathau khan paglong jalan sahaneng pacang caga jit ruak ka bhap bini.

Di tỉnh Đồng Nai, kayua langik pandiak ngak ka rilo uranaih saong urang praong thun njauk tame sang iek ruak. Yaok harei, sang iek ruak Đa khoa Đồng Nai iek ruak ka labaih 200 urang ruak mai taong ruak saong 80 urang ruak ndih veik di sang iek ruak. Hu ginup dom janih ruak ka jalan tung pruac, yau ye njauk laka, tabiak darah, aih traoh…oh njauk lac di urang praong thun, uranaih njauk ruak di jalan tung pruac jeng tagok. Dom ranaih jeng pandiak glaong, takhaoh ta-aok saong aih traoh rilo mbang dalam harei, hu tuk megei handaoh rup pabhap. Tui dom bác sĩ, piah pacang caga plaih jaik ruak jalan tung pruac di uranaih, langiu di bruk brei mbang tani tanat pandap mbang, brei gam gam rao hacih tangin takaei ka uranaih. Urang sangka iek glang uranaih jeng njauk rao tangin tuk sangka atau brei ka uranaih mbang.

  Daok dalam bilan bhang pandiak, ia taba trun takik, rilo bhum palei dalam tỉnh Tiền Giang peih bruk kuac jalan ribong ba ia. Dalam nan, phun njam hang di ribong, krong kapal  rilo ngak gar jalan ia nduac, cakak bruk pabak ia. Yau nan ye, rilo labik, bhap bini hu pruh jru hóa học trun ribong ia piah pametai phun njam hang sumu ralo. Jalan nan ngak nerak tachauk halau ia trak, ngak metai dom kaya ala ia. Abih di nyu lac bala ka dom baoh sang pandar ia ribong piah ngak mbang, menyum, menei. Gah chức năng kakei dom bhum palei brei srong tagok atau pandar mac cakak ramik phun njam hang, oh brei prtuh jru hóa học trun ribong.

Dom đặc phái viên hạt nhân di Hàn Quốc saong Mỹ hu taom gauk di Seoul, piah ginum biai dom bruk an ninh di kaoh pulao Triều Tiên dalam tuk daok suh sah ka dom bruk tên lửa saong hạt nhân dak harei dak tagok di Triều Tiên. Hàn Quốc saong Mỹ njauk gauk brei patagok bruk pambuak gauk pacang caga biak catang, caga taong gilac biak khang yaok bruk khiêu khích halei meng Triều Tiên, gam tui di nan jeng tui iek biak catang bruk Triều Tiên hu veik dom bruk khiêu khích karei. Dua gah jeng njauk gauk jak ba rahra dunya jhul samar peih ngak dom sarak di Hội đồng Bảo an Liên Hợp Quốc, dalam nan hu gam bruk mai gilac veik palei negar di urang ngak Triều Tiên di negar langiu.

 Karja  Indonesia daok peih bruk brei brah oh mek jien tal yaok pluh trieu baoh sang hu mbang tui Danak dak daong xa hoi di rajaei. Tui nan, Jabat Hậu cần Taneh ia  Indonesia brei parabha labaih 640.600 tấn brah  tal 21 trieu 300 baoh sang di grauk labik dalam taneh. Danak dak brei brah dui atah dalam 3 bilan saong yaok baoh sang  hu daong 10 kilo brah. Brah hu ba tal dom labik taphia negar, labik suai patagok di Indonesia. Danak dak daong pandap mbang oh lac ba kein laba mai ka dom baoh sang bo daok trun bruk lạm phát, khik tani tanat yaom pandap mbang.

Urang dang akaok Gah Y tế dunya (WHO) brei thau lac, tui kuhria Gah Y tế dunya meda yah klaak dom bruk samar drah ka COVID-19 di sa tukvak dalam thun ini, min oh ba tabiak tukvak cambaih laih jang. Jabat y tế di Liên Hợp Quốc daok maong lac Covid-19 lac bruk samar drah ka prein yava di rahra ngak haduh hatai di dunya dalam labaih 3 thun tapa. Tui Taong yam ndok WHO, Ủy ban chuyên gia ka bruk jit praong COVID-19 meda ginum biai di bilan 5 ini saong meda brei thau tukvak yah klaak bruk samar drah./.