“Harei dunya pahadar urang plang kayua bala angaok jalan mbak” thun ini meda brei peih ngak di harei 20/11, ngan haong kadha “Peih ngak tui hukum salamat angaok jalan mbak saong padang ngak ilamu nao mai angaok jalan mbak”. Ini lac thun ka 11 Viet Nam gam haong dunya peih ngak dom bruk pahadar  dom urang plang kayau bala angaok jalan mbak, piah brei mboh hatai pandik harao palai damen dom urang jak vak jeng yau klak rabha bruk metai lahik, ndoa nong trak haong gauk gar baoh sang urang. Bilan 10 meng blaoh, dalam negar rah tabiak 9.212 mbang bala angaok jalan mbak, ngak brei 5.221 urang metai saong 6.140 urang njauk rambuac.

Piah dui pachreih urang buh jien tame ngak mbang, Akaok UBND tỉnh Bình Phước brei ngak danak dak patagok jalan mbak pambuak bhum saong dalam tỉnh. Tui nan, meng ini tal thun 2025, tỉnh ini brei peih ngak 34 danak dak jalan mbak haong yaom jien tui kuhria mboh lac labaih 16.600 tỷ đồng. Meng akaok thun tal ini, Bình Phước bahrau dui pachreih hu 30 danak dak buh jien tame ngak mbang, haong yaom phun jien tut angan labaih 107 triệu USD, lac biar dalam bhum Đông Nam bộ. Anak bruk nan, Bình Phước brei hu dom jalan ngak piah peih talaih phun jien hu makna praong ini, dalam nan, buh jien tame padang ngak jalan mbak hu maong lac kadha praong di abih.

UB bhap bini huyen Gò Công Tây, Tiền Giang saong Tập đoàn Công nghiệp Viễn thông quân đội Viettel – Dhar Tiền Giang birau padang tabiak Darak 4.0 - oh bayar jien tapak di darak Vĩnh Bình. Di darak 4.0 nan urang blei pandap di bhap bini brei bayar jien tapa điện tử, meng bruk pandar dom ứng dụng công nghệ số yau:  Ví điện tử, Mobile Banking, Internet Banking, mã QR saong dom ứng dụng di phone tangin. Meng bruk nan, mikva oh cang tabiak darak min njuak mbuan blei pandap, dich vụ.

UBND tỉnh Kiên Giang njauk hatai brei peih bruk taduan raok giao thừa saong cuh phao bingu tuk Tết Nguyên đán thun sak tapai 2023 di 5 labik meng jien jak ba rahra. Njauk hatai brei peih bruk taduan raok giao thừa saong cuh phao bingu patuh di ban Rạch Giá hu papar binguk tapak, abih tih yaom jien peih ngak tui kuhria lac  4 tỉ đồng.

 Piah takik bruk “ radaih dù, radaih padeih rah jalan” dalam ban,  Sở Giao thông Vận tải Ban raya Hồ Chí Minh birau hu harak pathau khan tagok UB bhap bini ban raya ka bruk ramik jalan mbak ngan haong radaih pajeng tuai hu laneng ndih di banraya, dalam  nan pakauk janih radaih nan peih dalam ban meng mong 6 mesup tal mong 10 melam, brei ngak tui meng harei 15/12 anak tal. Kuhria tal bilan 10 thun 2022, radaih ôtô pajeng tuai hu Sở Giao thông Vận tải Ban raya brei adat phù hiệu peih pajeng ka labaih 49.200 radaih; dalam nan laneng ndih labaih 1.100 sruh. 

Nyaom biai pakat glaong abih Kapul dom taneh ia hu nền kinh tế cakrok saong bahrau tagok dang akaok dunya (G20) hu tamat blaoh di harei 16/11 (tui mon pak nan). Dalam harak ndom puac tamat nyaom biai, Tổng thống Indonesia ndom lac, G20 hu daong ngak tabiak dom talei pambuak bruk khang kajap. Tổng thống taneh ia Chủ tịch G20 2022 hu jao ka-pắc brei ka Thủ tướng Ấn Độ Narendra Modi saong tadhau ayuh Ấn Độ dang ngak Chủ tịch G20 thun 2023 hu jak jeng haong bruk khik ramik saong peih ngak hu bruk pasiam veik dunya saong patagok abih gah jang.

 Hãng tin Reuters (Anh) ba panuac brei thau di Gah Hiệp ước Bắc Đại Tây Dương (NATO) lac, bruk patuh kayua tên lửa laik tame sa palei di Ba Lan, jaik taphia negar Ukraine meda mai meng hệ thống caga tên lửa di Ukraine. Dalam nan, hãng tin AFP( Pháp ) ba panuac Tổng thống Ba Lan lac, mbang patuh  nan meda lac kayua 1 tên lửa di dom gah bol lin di Ukraine pandar.

Tinh trùng di anek menuac trun sa meteh dalam 5 pluh thun tapa, daok tốc độ trun ye nyu tagok jang 2 mbang kuhria meng akaok abap XXII. Roh duah bahrau ini hu ba tagok mangaok “tạp chí Sinh sản người” harei 15/11, lac harei menuac sia dunya hu 8 tỷ urang. Roh duah hu peih dom bruk duah thau, iek tui 223 roh duah dahlau nan ka dom mẫu tinh trùng di labaih 57 rabau likei di 53 taneh ia. Dom urang roh duah hu panuac lac, dom tinh trùng kuhria rah tapa di 1 urang likei urak ini trun jaik tal tanut kan metian hu, lac dom yau, dom gu likei kumei di mangaok dunya kan hu anek tui jalan ndih daok haong gauk./.

Urang lang: A.Nghiem & M.P