Bruk tuyên giáo jeng hu ba akaok nao dahlau saong rik tame biak praong glaong

Harei ini 1/8 lac harei meng kan di gah Tuyên giáo. Dalam tukvak cách mạng halei, bruk tuyên giáo jeng hu ba akaok nao dahlau saong rik tame biak praong glaong dalam taong abih bruk pan akaok tacei jalan cách mạng di Đảng. Dom urang jakar di gah Tuyên giáo tuk halei jeng brei mboh bruk ngak di dom urang lin ba akaok nao dahlau gah jalan sahneng di Đảng. Piah pabak hu bruk di urak ini dalam tuk mbuan lagaih saong kan kandah pablak gauk, brei hu bruk kham marat glaong jang di taong abih gah dalam bruk salih bahrau, paglaong kein lagaih, pabak panuac ieu kakei, bruk ngak dalam tukvak bahrau urak ini.

Gah Cảnh sát giao thông Công an tỉnh Bình Thuận brei thau, hadei di sa bilan tabiak mbaok tabung glong pasang iek, langyah bruk ngak suan gah trật tự an toàn giao thông, hu ngak biên bản 4.321 urang ngak suan. Tapa nan, phat jien labaih 5 tỷ 774 triệu đồng; mek veik 518 harak adat peih radaih; khik mek 826 sruh radaih. Tapa pasang iek, gah cảnh sát giao thông hu langyah 446 urang hu menyum alak mbia tuk peih radaih; 1.520 urang njauk langyah, peih nduac samar jang adat ba tabiak di mangaok jalan song 179 radaih ngak suan ka bruk tambuak praongradiah, pajeng trak jang saong pajeng pandap praong tapa adat brei pajeng.

Bhum 2 Hải quân (daok di ban Vũng Tàu, tỉnh Bà Rịa-Vũng Tàu) brei thau, tuk maong 9 harei 31/7, gilai 278 di Vùng 2 Hải quân daok ngak bruk pasang iek, khik caga labik taong ikan di mangaok mblang tasik ye taduan hu cấp cứu meng gilai taong ikan BĐ 96433 TS di tỉnh Bình Định ieu daong samar drah kayua hu sa urang taong ikan njauk ula tasik kaik ba tal kan suak yava, pandik abih rup, labik kaik nyu brah bhong, oh mbang manyum, oh nao mai hu. Gilai 278 samar nao tal labik tuk maong 12 di harei nan, samar drah brei kapul quân y nduac tapa gilai taong ikan daong cấp cứu ka urang taong ikan njauk bala. Hadei di tuk mbaok mata salah salai, kapul quân y pato tacei gilai taong ikan ba mai Sang iek ruak Đa khoa huyện Côn Đảo piah taong ruak.

Harei 31/7, Gah Cảnh sát điều tra Công an tỉnh Cà Mau hu tabiak harak khởi tố urang, chap kreh , pasang iek labik daok saong labik ngak bruk di ong Đặng Hải Đăng (ndih tapui thun 1966), Yam ndok pasak pasang iek ruak kik (CDC) Cà Mau. Langiu di ong Đăng, dok hu 2 urang jakar njauk chap kreh piah pasang iek ka duas “ngak suan hukum bruk to yaom ngak khat lahik trak”. Gah công an mboh lac, tuk peih ngak harak gar đấu thầu blei kít dut iek COVID-19 di Công ty Việt Á, ong Đăng song dom urang jakar Sở Y tế song CDC Cà Mau peih ngfak oh njauk hukum to yaom, ngak suan dom bruk oh brei ngak dalam bruk to yaom tui adat di khoản 6 paka 89 Hukum to yaom; ngak khat lahik kadung jien karja labaih 12 tỷ đồng.

Maong 12, 40 minit harei 31/7, Ngô Văn Quốc (umo 38 thun), quân hàm đại úy, ngak bruk di Trại giam Bình Điền, Thừa Thiên-Huế, pan phao AK nduac tame 2 tiem ameh Hoàng Đức saong Thái Lợi, anak darak Đông Ba. Hadei di tuk cuh 3 tal 4 sap phao, Quốc hu mek rilo talam ameh, brei tame kadung blaoh nduac tabiak anak darak, prai dom kadung tabiak kreih jalan Trần Hưng Đạo saong di dom mbu kayau. Hadei di nan, Quốc nduac trun labik sang lục giác jalan Trịnh Công Sơn. Tal maong 2 bier harei nan, công an hu cap mek Ngô Văn Quốc. Sa urang kumei ngak di tiem ameh Thái Lợi njauk rambuac di hatung, hu ba tal sang iek ruak cấp cứu.

Dalam tuk brei cakak trun năng lượng pandar, dom taneh ia EU urak ni dok ba tabiak dom adat brei takik pandar năng lượng. Taphia dom jalan ngak praong yau pasiam dom gilang caik khí đốt, brei peih ngak veik dom sang mac điện dhan... ye dom jalan pachreih ba hu mong lac oh lagaih. Pagap yau di Đức, taneh ia ni hu panuac ieu bhap bini takik pandar điện, trun tuk vak menei ia, oh truac hadah labik laboa di dom boh sang prong, pachreih urang oh brei menei ia pandiak... Dalam tuk nan , di Italia song Tây Ban Nha, rajaei, yaom lac hu adat oh brei pandar am riak liar jhui peih ala 25 - 27 độ C dalam dom balik ngak bruk.

Harei ini (01/8), negar France meda tame mbang pandiak bahrau abih meda jhul nhiệt di dom tỉnh gah maraong negar tagok glaong jang meng 10-15 độ C dut saong yaok harei. Bruk kurang hajan meda dui atah dalam mateh akaok bilan 8, nan ye jaik abih dom tinh, ban hu ba tabiak sarak brei patakik pandar ia. Dom panuac kakei ka bruk mbuan khuah glai jeng hu tagok glaong.

Báo Indian Express di Ấn Độ harei kabroi brei thau, dalam harei 30/07, negar ni hu sa urang metai camereip, kayua ruak đậu mùa khỉ di bang Kê-ra-la (Kerala), di gah merong Ấn Độ. Tui nan, urang metai lac sa urang likei umo 22 thun, bahrau mai meng Các Tiểu vương quốc Ả Rập Thống nhất (UAE) di adit dahlau. Urak ni, Ấn Độ hu 4 urang ruak đậu mùa khỉ. Dom urang ruak karei, urak ni, pren yava dok siam, song dok dalam tuk tong ruak siam./.

 Urang lang: Hani Pha & Thu Thao - 01/08