Harei ini 22/8, dom sang bac đại học sumu gauk brei thau tanut chuan palih ruah meng tanut pakacah tamat THPT thun 2023. Tui bruk ba tabiak di Mentri Pato megru, dahlau mon 5 tuk biar  harei 24/8, dom sang bac đại học tame điểm palih ruah saong tanut pakacah palih ruah hu ba tagok he thong piah brei thau bruk palih ruah mbang ka 1. Meng harei 24/8 tal dahlau mon 5 tuk biar harei 8/9, anek saih brei tame he thong Mentri Pato megru brei thau hu tame bac. Meyah oh tame brei thau dalam tukvak ba tabiak, dom sang bac  meda thau lac anek saih oh bac, klak angan tabiak truh bruk palih ruah.

Urak ini gah pato megru tỉnh Ninh Thuận daok kham merat kuhria caga ka thun bac bahrau 2023-2024. Thun bac ini, dalam tỉnh hu 297 labik bac megru dom pakat haong abih tih labaih 149.160 adei anek saih. Piah khik kajap bruk bac ta-a di thun bac bahrau, Ninh Thuận hu caik tabiak 370 tỷ đồng meng dom phun jien piah ngak bilik bac, pasiam sang bac saong blei pandap panda bac ta-a ka dom sang bac di dom huyện, ban sit.

Tỉnh Trà Vinh urak ini hu labaih 12.200 labik ngak bruk gah ngak nong, dalam nan hu jaik 7.800 cơ sở pataom tame ngak 13 palei ngak meng kan, ngan haong labaih 36.400 urang ngak. Yau nan min, urak ini, dom palei ngak nan ngak mbang oh hu laba yau dahlau diah. Piah khik ramik saong patagok dom palei ngak tỉnh Trà Vinh daok pataom tame daong dom palei buh jien tame ngak, ramik pasiam, paglong cơ sở pandap panda; padang ngak pasak, labik pablei pandap saong yaih khan pandap di palei ngak. Langiu di nan, daong tapak sa mbang 50 trieu dong sa palei piah padang jalan khik ramik alam moi truong, ngak ho so taduan brei angan, padang dak talaoh yaih khan…

Tui Sở Ngak nong saong Patagok palei pala tỉnh Kiên Giang, urak ini Kiên Giang dang akaok taneh ia ka sang cim yến haong 2.995 baoh, praong abih tih dom sang nan, lac 730.630m2. Piah ka bruk pablei sruh cim yến tapa darak pasar Trung Quốc hu mbuan lagaih, dom sang raong brei pabak 3 bruk lac: Hu pasang iek jit ruak pabak ka bruk pablei tabiak negar lamngiu, hu pasang iek salamat pandap mbang, labik raong hu pabak mã số. Nan ye Chi cục raong glang – Thú y tỉnh hu tacei pato bruk raong, mek, ngak saong pablei sruh yến tapa darak pasar Trung Quốc.

Urak ini, urang nong di dom tỉnh, ban bhum gah Pei daok yuak padai he thu thun 2023. Hu mboh, di Hậu Giang, yaom padai that hu urang blei di hamu  meng 7.000 -8.200 đồng sa kg, tui janih padai. Padai yuak  hu meng 8 tal 10 tấn sa ha. Bilan he thu  thun ini, ralo urang ngak nong njauk padai pablei hu yaom glong. Tui rilo mikva  urang ngak nong ye ini lac bilan yuak padai hu ralo abih kuhria dalm 40 thun mai ini.

Quốc hội Campuchia njauk gauk brei pilih ruah Tiến sĩ Hun Manet tagok ngak Thủ tướng Campuchia nhiệm kỳ 7 meng thun 2023 tal thun 2028, saong brei tapa angan dom urang dalam Rajaei bahrau. Hu thau, Rajaei bahrau nhiệm kỳ VII di Thủ tướng Hun Manet hu 10 Phó Thủ tướng, 21 Akaok mintri pakat glaong saong 30 Akaok mintri di dom mintri saong jabat samu mintri. Dom akaok Mintri dalam rajaei bahrau di Campuchia lac dom urang ranaih di Đảng bhap bini Campuchia, rilo meng lac umo thun labaih kurang 40.

Sruh kapal haok pajeng ba ong Thaksin  pataok trun tuk mon 9 harei ini 22/8 di mblang kapal haok Don Mueang. Ong Thaksin, umo 74 thun, ngak Thủ tướng Thái Lan meng thun 2001, min njauk gah bol lin pajaleih rai ong di thun 2006. Ong njauk chap daok guk oh hu mbaok thun 2008 kayua pambak tame tuk daok ngak praong saong klak palei negar nao labik karei. Bruk ong Thaksin brei thau lac gilac veik mai Thái Lan, abih di nyu lac dalam tuk taneh ia  ini daok padang Rajaei birau. Jabat chức năng Thái Lan brei thau, caga blaoh blai dom bruk piah taduan saong brei ngak chip dom jalan tui hukum tố tụng hình sự ngan haong ong Thaksin.

Taneh ia Prang tabiak cảnh báo bhong meriak, lac tanut cảnh báo glaong abih di 4 tỉnh dalam mbang pandiak jhak. Ini lac mbang camereip abih dalam thun ini, Prang brei tabiak cảnh báo ni. Di ban gah meraong Vinsobres, nhiệt độ glaong di abih kuhria meng dahlau mai, tagok tal 42 độ C, glaong jang tanut kuhria rah tapa yaok thun jaik 10 độ C. Akaok Mintri Y tế Prang brei mboh hatai suh sah anak bruk kuhria mboh dahlau lac pandiak meda dui atah tal abih adit saong hu panuac kakei dom menuac prein yava oh siam oh khang kadang, brei hu jalan pacang caga piah plaih di tame sang iek ruak./.