Harei ini (31/5) lac Harei Dunya oh njuk pakao. Mek asal kadha “Kol drei caong hu pandap mbang, oh caong hu pakao” ka hrei ini, Gah Y tế dunya jak ba dom taneh ia jhul samar dom bruk ngak piah paglaong hatai sahaneng di rahra ka dom kan kandah di pakao ngak jhak tal prein yava, jien padai, alam saong an ninh pandap mbang. Hadei di 10 thun peih ngak Hukum pacang caga dom kanjak jhak di pakao, Việt Nam jeng daok dalam nyaom 15 taneh ia pandar pakao hala glaong abih di dunya. Tui kuhria paok jien bo urang pandar piah blei pakao lac labaih 50.000 tỷ đồng yaok thun. Nan lac ka oh ndem tal yaok piluh ribau tỷ đồng piah langyah ka dom kan kandah di ruak kik kayua thak pakao hu 7.000 janih ngak jhak tal prein yava, 69 janih ngak tabiak ruak ung thu.

Mintri jalan mbak pajeng ba bahrau tabiak harak jao ka mBan khik ramik danak dak Mỹ Thuận peih bruk ngak pathau khan roh duah bruk meda ngak hu danak dak tatua Cần Thơ 2, piah pasiam bruk pambuak jalan cao tốc Bắc - Nam tui quy hoạch. Hu thau, tui kuhria, tatua Cần Thơ 2 hu labik akaok pambuak tame labik jhung jalan cao tốc Mỹ Thuận - Cần Thơ di tỉnh Vĩnh Long, labik jhung pambuak tame labik akaok di jalan cao tốc Cần Thơ - Hậu Giang.  Nyau atah abih tih 15,35km. Tui kuhria hu peih tabiak ngak dahlau di thun 2030. Urak ini bruk nao mai meng TPHCM tal dom tỉnh dalam bhum taneran kraong CL daok hu tatua Cần Thơ bahrau, tatua Vàm Cống saong anak tal lac tatua Đại Ngãi (tui kuhria hu ngak salah di thun 2026)

UBND tỉnh Đồng Nai bahrau patabiak jalan ngak to yaom quyen pandar taneh di tỉnh dalam thun 2023. Dom labik taneh to yaom jeng daok dalam labik siam lagaih, jaik taphia haong dom gah jalan mbak, meda padang ngak sang danaok, cak rok patagok bruk pablei salih, dịch vụ. Dom huyện Trảng Bom, Cẩm Mỹ hu taong abih tih mblang taneh hu to yaom dalam thun ini lac biak praong, hu yaom labaih 640 tỷ đồng. Phun jien mek tame meng to yaom taneh hu pandar piah buh tame padang ngak cơ sở hạ tầng, abih di nyu nan lac jalan mbak. Tukvak anak tal, bruk to yaom meda daong ka bruk peih ngak siam lagaih kadung taneh, rik tame langyah caong ka sang danaok di rahra.

Mintri Ngoại giao daok pabak khau tin pambuak tal bruk rahra Việt Nam hu Philippines daong paklah di harei 4-5 meng bloh di tỉnh Pampanga, jaik ban ine Manila. Hadei di tuk thau hu bruk daong paklah tabiak, Cục Lãnh sự saong Đại sứ quán Việt Nam di Philippines hu pambuak bruk khang kajap haong karja pak nan. Gah  Việt Nam hu nao ravang, daong, duah thau, padang angan dom urang ini, abih di nyu lac dom urang hu harak gar nao mai abih tukvak. Dah mesup harei 30-5, hu 60 urang camereip abih dalam 437 urang Việt hu daong paklah tabiak truh sa labik me-in mbia di Philippines hu mai tal mblang kapal haoh Tân Sơn Nhất, TP.HCM. Mintri Ngoại giao daok pambuak bruk piah daong ba dom urang daok veik mai palei negar

Công an tỉnh Bình Dương jeng ka oh thau hu cambaih  angan di urang dalam bruk tangin, takei njauk cuh di labik tái định cư daok klak saoh di ban Tân Uyên. Piah thau ka angan di urang njauk bala, Công an Bình Dương hu tabiak panuac brei thau bruk duah urang metai nan haong dom đặc điểm nhận dạng. Urak ini công an hu taduan labaih 30 khau tin pathau khan di rahra. Meng khau tin ini, Công an hu ngak cambaih laih lac, pathau khan chip ka urang pabak khau tin ka gauk gar, urang ngak oh pathau khan hu. Min, tapa pasang iek, oh mboh urang halei deih yau dấu vân tay, ADN di urang njauk bala. Tui sahneng mboh, ini lac brukl pametai manuac blaoh cuh ba nao ndauk. Urak ini, dom kapul nghiệp vụ Mintri Công an daok daong ka Công an tỉnh Bình Dương langyah bruk ini.

Tổng thống Indonesia Joko Widodo brei thau logo ka ban ine bahrau Nusantara, hu pilih ruah meng 5 mẫu thiết kế saong hu bhap bini pilih ruah. Tổng thống Jokowi brei thau, logo bahrau asal kadha lac "phun di bruk diukrai". 5 gha di got brei mboh ka hatai sahneng Pancasila, 7 dhar yau ye dom baoh pulao praong di Indonesia saong 17 bingu brei mboh ka bruk độc lập di Indonesia, ngan saong Harei độc lập lac harei 17/8. Tổng thống Indonesia caong lac logo bahrau meda pabak hatai pachreih ka 1 ban ine bahrau, labik daok bahrau ka bhap bini saong jeng biểu tượng ka raidiuk di bhap bini Indonesia anak tal.

Hãng thông tấn Negar Triều Tiên (KCNA) brei thau lac, mbang cuh vệ tinh di taneh ia ini di dah page ini (31/5) oh jeng tuk tal ka 2 di tên lửa gaok bala, ngak ka vệ tinh laik trun tasik. Bol lin Hàn Quốc jeng brei thau lac, phương tiện Triều Tiên bahrau cuh tagok, nyu laik trun tasik Hoàng Hải. Hu thau, ini lac bruk kham marat cuh vệ tinh ka 6 di Triều Tiên saong lac mbang camriep kuhria  meng di thun 2016. Ini jeng lac mbang cuh vệ tinh pasang iek quân sự camriep abih di Triều Tiên.

Cảnh sát Thụy Sĩ brei thau jak jeng di bruk ngak kandauk hu pandar thông tin di sa urang ấu dâm daok njauk daok guk, daong mboh hu  2.200 kol duas tình dục uranaih saong dom kol pandar asal kadha khiêu dâm pambuak tal uranaih di dunya. Bruk duah thau hu peih tabiak ngak meng thun 2012 tuk cảnh sát Thụy Sĩ taduan hu panuac khan ka 1 urang mek angan lac “Ninja Turtle” piah ba tabiak dom asal kadha khiêu dâm pambuak tal uranaih tapa bruk klah rabha tài liệu padauk angan. Hadei di nan, cảnh sát duah mboh menuac mek angan nan, lac sa urang likei umo 62 thun hu quốc tịch Đức.