Harei ini 5/9, labaih 22 trieu anek saih dom sang bac mam non, phổ thông dalam taneh ia peih bruk tame thun bac birau thun 2023 -2024. Hu mbaok saong brei panuac di var peih bruk tame thun bac birau di Sang bac Pho thong bangsa gam bac gam daok tỉnh Gia Lai, Akok negar Võ Văn Thưởng iew pakat ủy, karja saong dom mban, dom gah di Gia Lai, tame thun bac birau  njauk brei patui veik bruk tacei ba ngak njauk dalam ka jalan tacei ba di Đảng, Karja ka bruk salih birau taong abih gah patao megru. Salih  birau bruk ngak, pakajap bruk cak rok patagok dom sang bac  Pho thong bangsa gam bac gam daok, sang bac Phổ thông bangsa bac bán trú, sang bac Pho thong hu anek saih  daok veik jalan pandiak saong kham ngak brei palahik bruk oh thau akhar ka bhap bini bhum urang bangsa takik di bhum atah bayah.

Di TPHCM, ong Nguyễn Văn Nên, UV Mintri Chính trị, Bí thư Thành uỷ TP.HCM mai hu mbaok tuk peih thun bac bahrau di sang bac THPT Nguyễn Thị Minh Khai (Quận 3). Sang bac THPT Nguyễn Thị Minh Khai lac sa dalam dom sang bac pato pakai pakat Trung học phổ thông dane angan di TP.HCM haong điểm tame tal bac 10 daok dalam tốp dang akaok di ban raya. Ban raya HCM hu labaih 1,7 triệu anek saih hu mbaok tame peih thun bac bahrau. Dalam harei ini, ban raya ba tame pandar 27 sang bac bahrau hu 441 duk bilik bac bahrau.

Tỉnh Cà Mau urak ini hu 32 bangsa takik ngan haong labaih 11.750 baoh sang, labaih 48.000 urang. Urak ini, tỉnh hu 6 agama nan lac: Phật giáo, Công giáo, Tin lành, Cao đài, Tịnh độ cư sĩ Phật hội Việt Nam saong Phật giáo Hòa Hảo. Dom thun tapa, MTTQ  dom pakat dalam tỉnh kham  merat pathau khan, jak ba  bhap bini bangsa takik, agama ngak siam jalan tacei ba di Đảng, sarak hukum di Karja. Tui nan, brei meriak gauk saong ndem puac oh njauk, neh rabha di dom urang jhak hatai, duah mboh pacang dom bruk ngak suan hukum ka bangsa, agama; langyah sumu dom bruk mblo tabiak di bhum palei.

Dalam jaik 8 bilan tapa, dalam taneh ia hu 55 urang metai kayua ruak njauk athau gila kaik di 25 tỉnh ban. Gia Lai lac tỉnh hu urang rua kayua sau gila kaik rilo abih, lac 9 urang, Bình Phước saong Bến Tre, yaok tỉnh 4 urang. 20 tỉnh ban karei hu meng 1 tal 2 urang metai. Ruak biak jhak kayua vi rút dại ba mai, bhian tagok tal glo akaok, tagok hệ thần kinh. Urang njauk ruak kayua njaom mbak vi rút tapa labik kaik, labik saluah angaok kalik. Urang njauk ruak kayua sau gila kaik bhian metai taong abih, lac 100%.  

Urak ini, gah Kiem lam, Kong an, Quan su tỉnh Đồng Nai daok patui bruk pambuak haong bhap bini peih praong bruk duah tui takai nao di ong Ka Sơr (ndih tapui 1958, bangsa Mạ), sang daok di xã Tà Lài, huyện Tân Phú, tame glai jaoh rabung di harei 30/8 mbiah tal harei ini oh mboh mai sang. Dalam tuk nao duah, bhap bini hu mboh inem takai dreih takai di ong Ka Sơr saong mbuk rabung, klau mbaik gai klauk trun taneh meng biar tal glong yau brei thau lac var jalan mai sang.

Mesup 5/9, Nyaom biai pakat glaong Kapul dom taneh ia Đông Nam Á (ASEAN) saong nyaom biai pakat glaong pambuak tal ngan saong kadha “ASEAN Thaik thaok: Pasak Patagok” hu peih tabiak di Indonesia. Peih tabiak meng harei 5 tal harei 7/9 ngan saong 12 mbang nyaom pakat glaong, nyaom biai pataom tame ginum biai 4 kadha praong, dalam nan hu bruk padang jalan ka Meta maong atah dhua di ASEAN, daong ka ASEAN jeng khang kadang jang piah caga dom cuang kandah di zaman bahrau, ba ASEAN jeng pasak patagok kinh tế, saong tasik Ấn Độ Dương-Thái Bình Dương jeng labik sron mbon saong ginup meda.

Gilang pariak negar Campuchia brei thau, paok jien yaom 50 trieu USD meda hu ba tabiak meng harei 6 tal harei 15/9 ini. Paok jien nan piah khik brei tani tanat yaom jien negar langiu hadei tuk mboh jien Riel dut saong jien dola Mỹ tagok gam gam dalam dom harei jaik ini. Gilang pariak negar Campuchia mboh lac, bruk jien Riel tagok yaom dut haong jien USD lac kayua bilan ngak tabiak pandap panda saong jien dola Mỹ tagok yaom di darak dunya hadei di tuk Cục Dữ trữ Liên bang Mỹ tagok jien laba.

Blah báo Le Monde tabiak yaok harei di Prang brei thau, dom menuac pala padai châu Âu meda khim klao bui sambai chreih chrai tuk sản lượng brah di châu Âu thun ini meda hu jaik 3 triệu tấn. Khik piah brah dunya di puac bilan pala thun 2023-2024 tui kuhria meda mek hu glaong di abih, labaih 198 triệu tấn, lac tanut oh ka bhian mboh kuhria meng dahlau mai. Yau nan min, tui pasang iek di dom chuyên gia kinh tế, darak pasar dunya jeng daok pandiak, yaom brah jeng daok di tanut glaong saong bruk catang tagok jeng oh ka trun./.