Dom labik pakacah dalam bhum taneran kraong Cuu Long peih ngak hu lagaih saong salamat

Harei ini 8/7, dom anek saih tame harei pakacah ka 2 ini jeng lac harei puac di mbang pakacah THPT. Dom labik pakacah dalam bhum taneran kraong Cuu Long peih ngak hu lagaih saong salamat. Bruk hu lagaih yau nan lac hu bruk daong oh lac sit di dom urang đoàn dam dara di dom tỉnh dalam bhum kham merat peih ngak danak dak “daong prein pakacah” piah ba mbuan lagaih di abih ka dom anek saih yam tapa mbang pakacah hu makna biak praong ini. Di tỉnh An Giang hu biak rilo urang daong bruk tahaneh yaok ribau var mbang huak oh mek jien payua mai ka dom labik pakacah alin brei dom anek saih sang daok atah, piah daong ka dom adei hu sahanang hatai pakacah.

Tal tukvak ini, tỉnh Bà Rịa-Vũng Tàu daok hu labaih 58.600 mbang vaccine caga COVID-19 abih tukvak pandar meng harei 30-31/5 saong 25/6. Tỉnh daok cang tacei pato langyah dom vaccine abih tukvak pandar ini di Viện Vệ sinh dịch tễ Trung ương.  Tui Sở Y tế tỉnh Bà Rịa-Vũng Tàu, makna kandaong labaih dom vaccine nan, lac kayua bruk klauk daok biar.

Cảnh sát jalan mbak tỉnh Bình Thuận birau peih bruk pathau khan haong dom po nhà hàng, kuan mbang menyum, labik menyum alak, labik chat tamia…di Ban Phan Thiet mbaoh tangin sanya brei kakei tuai mai mbang menyum ngak njauk tui bruk ba tabiak “Menyum alak mbia bloh – Oh peih radaih”. Tui nan, gah chức năng brei mbat logo decal hu vak huroh “ Menyum alak, mbia bloh– Oh peih radaih” angaok radaih taxi saong dom labik kuan mbang, menyum angaok dom jalan di pasak Ban Phan Thiết. Di var pathau khan, jaik abih dom po kuan mbang, nhà hàng,…saong dom urang peih radaih taxi njauk hatai pachreih tui.

Ravang me-in bilan hè daok tame tuk tabung glaong, min dalam tuk xang menyek tagok glaong, pambak tapak tal gah pajeng ba meng kapal haoh, ngak ka yaom harak kapal haoh gam gam tagok glaong tui, rilo rahra kuhria nao min sahneng  veik tuk buh jien tabiak blei harak kapal haoh. Angaok blah web pablei harak kapal haoh di dom hãng kapal haoh dalam taneh ia, yaom harak kapal haoh kuhria bloh jien thuế, phí dom jalan par yau: Hà Nội - Buôn Mê Thuột atau TP Hồ Chí Minh - Vinh... tagok 4 - 6 triệu sa harak nao mai. Daok jalan par dui pachreih hu rilo tuai lac Hà Nội - Côn Đảo hu tuk yaom harak tagok tal 10 triệu sa harak par nao mai.

Hadei di 5 harei kham merat duah, tukvak 1tuk 40 minit page ini, gah daong duah urang gaok bala hu duah mboh atau urang likei ngak kong angan Lý A Dia ndih tapui thun 1997, njauk ia sua ba theik tame danao ia thủy điện di puk Phi Lĩnh, xã Si Pa Phìn, huyện Nậm Pồ, tỉnh Điện Biên. Dahlau di nan page harei 3/7, labik pabah danao ka 3 danak dak thủy điện daok padang ngak ye ia sua tuh trun ngak brei 4 urang daok ngak bruk oh sumu nduac tabiak. 3 urang njauk rambuac hu sumu daong chip, ba nao cấp cứu  urak ini prein yawa hu siam.

Nyaom biai Ngoại trưởng Kapul dom taneh ia kinh tế patagok saong bahrau ndong tagok dang akaok dunya (G20) mesup ini hu peih tabiak di Bali Indonesia ngan saong kadha “Ba gauk padang sa dunya sron mbon, tani tanat saong ginup meda jang”. Rah tabiak dalam tuk dunya daok dang anak rilo cuang kandah yau bruk mesruh gauk, lạm phát, tagok yaom xang menyek, kurang pandap mbang.. taneh ia po sang lac Indonesia caong lac Nyaom biai meda duah tabiak dom jalan ngak ka dom bruk samar drah di dunya urak ini.

Page ini, Tổng thống Hàn Quốc Yoon Suk-yeol lambaok rajaei brei thau paok jien daong tagok labaih 600 triệu đô la Mỹ piah daong patrun jien mbang cai dalam baoh sang  ka bhap bini, dalam nan hu bruk klak jien je ngan haong dom pandap blei tame meng negar langiu saong patagok bruk daong ka dom urang hu jien mek tame takik.

Thủ tướng dahlau daih di Japon, ong Shinzo Abe hu ba tal sang iek ruak dalam tuk var drei jan hadei di tuk njauk urang loa cuh tame di mon 11h00 (tui mon Hà Nội) harei 8/7.  Bruk nan rah tabiak tuk ong daok ndom puac di ban Nara piah tranh cử tame Thượng viện harei 10/7 tal. Tui Đài NHK, cảnh sát chap mek hu urang cuh lac sa urang likei umo jaik 40 thun saong mek khik mbaik phao cuh pak di labik nan./.    

Urang lang: M. Phuong & Bhumi – 08/07