Piah bruk bac di sinh viên birau hu tani tanat, dom sang bac brei parabha rilo var piah taduan sinh viên tame bac tui dom gah piah plaih njiak bruk rilo gauk. Dom sang bac brei ka anek saih ngak harak gal tui jalan online di sang bac, hadei nan anek saih mai sang bac ngak salah abih harak gal tame bac tapak, piah takik lahik rilo tukvak ngak harak gal. Langiu di nan, dom sang bac  jeng brei hu thoi khoa bieu piah ka dom adei hu mbaok tame dom bruk pataom gauk piah sumu tukvak tame thun bac.

Piah khik salamat pandap mbang dalam bruk ngak saong pablei ahar Trung thu, meng ini tal tết Trung thu, kapul pasang iek di dom gah dalam tỉnh An Giang ka salamat pandap mbang tabiak pasang iek bruk ngak njauk adat hukum di dom labik ngak saong pablei ahar Trung thu dalam tỉnh.  Tapa pasang iek piah samar mboh, pacang cakak, langyah dom bruk ngak suan gah salamat pandap mbang, oh caik ka pandap oh thau meng halei mai hu mbaok di darak pasar. Khang hatai langyah catang dom bruk ngak suan adat hukum, gam pambuak bruk pathau khan ka salamat pandap mbang ka dom labik ngak saong pablei salih.

Mbiah tal ini, Trà Vinh hu daong the BHYT ka 207 urang hu angan je dalam bhap bini bangsa takik oh daok dalam nyaom urang hu daong brei  meng kadung jien Karja. Oh lac daong thẻ BHYT, yaok thun tỉnh Trà Vinh daok padang dom kapol urang jakar nao rivang, alih padap tuk le, tet ka urang hu angan je, kuhria tui jien  yaok pluh trieu dong. Langiu di nan, tỉnh daok bhian peih tal pasram, brei thau ka sarak, adat birau, piah urang hu angan je pathau khan, pambak praong dalam bhap bini  bangsa takik, rik tame khik kajap an ninh, salamat di bhum palei.

Anak bruk jit ruak tangin takai cambuai daok tagok, UBND tỉnh Ninh Thuận hu Harak tacei dom sở, ngành pambuak tal saong karja dom puk palei patagok dom jalan ngak piah pacang caga ruak, patrun patakik bruk njaom mbak, abih di nyu lac oh caik rah tabiak bruk menuac metai  Di Ninh Thuận, langik pandiak dui atah lac lagaih ka anek ruak tamuh tabiak, cakrok saong mbuan njaom mbak tabiak bhap bini. Kuhria tal harei 5/9, dalam tỉnh hu 394 urang njauk ruak tangin takai cambuai, oh hu urang halei metai.

Kayua rilo makna ba tal, urak ini bruk glut jaleih taneh tapen kraong, tapen tasik di pulao Tân Phú Đông, tỉnh Tiền Giang rah tabiak khang; dalam tuk nan phun jien piah pasiam veik di tinh daok kurang. Dom jalan glut jaleih atah labaih 1km, ia ndik lih tame lahik  taneh. Anak bruk nan, UBND tỉnh Tiền Giang brei ka huyen Tân Phú Đông buh jien tame ngak ar pacang glut jaleih samar chip di labik tapen kraong kapal Tân Long,  ngan haong phun jien labaih 5 tỷ đồng, jalan atah 50m. Dom jalan glut jaleih daok veik atah labaih 1km, khin hu 100 tỷ đồng piah ngak pasiam veik.

Trung Quốc cuh hu sa vệ tinh viễn thám bahrau tagok langik. Vệ tinh nao njauk jalan yau kuhria dahlau. Mbang cuh ini yau brei mboh bruk ngak, mang ka 486 di dom tên lửa đẩy Trường Chinh. Vệ tinh Dao Cảm-3303 meda hu pandar ka dom bruk ngak iek khoa học, pasang iek taneh riya, taong yaom năng suất phun pala, pacang caga bala meng langik tasik. Vệ tinh bahrau nan hu pandar piah pabak dom bruk thông tin viễn thám. Bruk cuh vệ tinh nan, lac bruk ngak ka 483 di dom tên lửa đẩy Trường Chinh.

Hãng  Thông tấn Negar Triều Tiên (KCNA) ba tin, taneh ia ini ba trun ia gilai kapal peih ala ia pacang hạt nhân tui jalan birau hu siam mekre. Khaw tin nan lac, ong Kim Jong-un hu mbaok di var ba kapal gilai tau ngam trun ia. Ini lac sa dalam dom bruk peih akok sa danak dak birau dalam bruk pakajap gah hải quân di Cộng hòa dân chủ nhân dân Triều Tiên.

Dom urang khảo cổ học di Peru hu ba tagok xác ướp hu meng 1.000 thun dahlau di labik hu rilo menuac sia daok di ban ine Lima di taneh ia ini. Akaok kapul roh duah lac Mirella Ganoza brei thau, ini lac xác ướp 1 urang praong hu mbuk atah, talang kang yau daok tamo saong xác ướp nan daok la. Xác ướp ini hu meng 1.000 thun dahlau, di zaman ilamu Ychsma, lac ilamu cakrok di bhum takai tasik gah kreh negar Peru harei ini, dahlau di tuk Đế chế Inca tagok rai di labik ini. Dom urang ilamu brei thau, mala haluk di ban ine Lima chreih chrai, daok khik biak rilo bruk, rilo kadha di sajarah. Urang caong lac meda duah mboh hu rilo kadha praong karei di labik ini./.