Thủ tướng Phạm Minh Chính dang akok Nyaom biai

Harei ini, di ban Cần Thơ, Thủ tướng Phạm Minh Chính dang akok Nyaom biai brei thau quy hoạch saong peih bruk buh jien tame ngak mbang di Bhum Taneran kraong Cuu Long vaktu 2021-2030.  Nyaom biai hu makna praong dalam bruk sahaneng njauk gauk di taong abih dom pakat, dom gah ka bruk ngak, labik dang saong yaom glaong di bhum saong pambuak bhum hoang gauk; pambuak bhum njauk lac brei tacei ba bruk cak rok patagok abih bhum saong yaok tỉnh, ban dalam bhum. Tapa nan, daong peih ngak hu siam, lagaih Sarak 13 di Mentri Chính trị saong Quy hoạch bhum taneran kraong Cuu Long hu mbaoh tangin blaoh; brei ngak sami samar lagaih njauk hatai, pambuak bruk, rik daong di dom ayut sahabat, dom taneh ia langiu pambuak ngak, dom po đầu tư dalam saong langiu negar piah rik daong peih ngak bruk lac ba Bhum Taneran kraong Cuu Long tal thun 2050 hu jeng bhum cak rok patagok kaya dut saong dalam taneh ia; lac labik siam piah daok ngan haong bhap bini, lac labik rivang main pachreih tuai damuai jeng yau po đầu tư.

Taom mbaok dom jabat báo chí di TPHCM tuk pahadar 97 thun Harei Báo chí cách mạng Việt Nam (21/6/1925- 21/6/2022), ong Nguyễn Xuân Phúc – akaok negar ndom lac, meng bruk ngak lc tui iek, phản biện xã hội, báo chí hu rik daong dak padang “karja di rahra, kayua rahra saong brei ka rahra”. Ong Nguyen Xuan Phúc jeng hu panuac caong lac, dom jabat báo chí ndom tal rilo jang dom bruk bo bol bhap rahra caik hatai sangka, daong palagaih ka rahra brei thau hatai sahneng, hatai caong di drei.

Taom gaok kapol urang QH Ban raya HCM ( đơn vị 4) dalam biar harei 20/6, rilo cử tri Q10, 12 brei thau bruk haduh hatai tuk xăng menyek tagok yaom glong gam gam ba tal dom janaih pandap pandar yaok harei tagok tui, ngak kan kandah tal raidiuk  di bhap bini. Gam haong nan, bruk salih tapuk siphau gam gam saong yaom tapuk dak thun dak tagok ngak brei cử tri haduh hatai jeng yau palai pajua biak ralo. Rilo bruk karei yau: jru ja, suai brei harak pandar sang daok chung cư; sarak ka urang jakar padeih hưu…jeng hu cử tri ndom tal.

Hội Liên hiệp urang kumei ban Vị Thanh, tỉnh Hậu Giang bahrau tabiak mbaok bruk “Kapul daong gauk dalam bhap bini bangsa Khmer”. Kapul daong gauk piah patagok prein khang abih gah, piah ka bhap bini bangsa Khmer daong gauk cakrok patagok abih gah meng pandap panda tal hatai sahneng. Tapa nan, Đảng ủy phường III, ban Vị Thanh hu alin hadiah 2 baoh sang anit ranam brei ka 2 sang Khmer kan kathaot, yaok baoh sang yaom 50 triệu đồng. Hội Liên hiệp urang kumei ban Vị Thanh jeng hu alin hadiah 20 pok pandap brei ka urang kumei Khmer kan kathaot.

Dalam 6 bilan akaok thun ini, dom camera pasang iek bruk nao mai angaok jalan Roya 1A tapa tỉnh Bình Thuận mboh hu labaih 22.700 mbang urang ngak suan bruk nao mai. Piah khik brei takik bala angaok jalan mbak, Cảnh sát jalan mbak tỉnh Bình Thuận birau tabiak jalan Ngak bruk tabung glong pasang iek, langyah dom bruk ngak suan angok jalan mbak dui atah 3 bilan. Dalam mbang ngak bruk tabung glong ini, cong an dom đơn vị palei, pataom tame pasang iek, langyah bruk ngak suan dom gah yau ye: jalan mbak, jalan kraong, tasik dalam negar. Meng nan pacang brei takik bala angaok jalan mbak, dom bruk gar jalan, oh caik rah tabiak bruk pakacah peih radaih suan hukum.

Hội đồng Liên minh châu Âu brei dui atah jang tukvak taong phạt Nga tal harei 23/6/2023 pambuak tal bruk taneh ia ini ba tame ka drei bán đảo Crưm haong ban Sevastopol. Dom bruk taong phat hu pakauk oh blei dom kaya pandap meng Crưm saong Sevastopol tame EU, oh brei buh jien tame ngak mbang gah cơ sở hạ tầng, gah du lịch; oh brei pablei dom janih pandap haong công nghệ ka Crưm. Dom jalan taong phat, cagar gauk gam gam hu dui atah jang, dui atah veik, ngak khat lahik tal kinh tế di EU saong Nga.

Tui  hãng tin Reuters di Anh, takik di abih 260 urang njauk pametai dalam sa mbang taong tame di harei 18/6 di dom urang cuh phao di bhum Oromiya, gah Pei Ethiopia. Rilo urang brei thau, dom urang njauk pametai tagok tal 320 urang. Dahlau di nan, ba tagok mạng xã hội Twitter, Thủ tướng Ethiopia ndom lac, bruk taong pametai bhap bini yau nan saong palei pajua bruk ngak mbang di bhap bini lac oh njauk.

Dom urang taong ikan di Campuchia taong mek hu sa drei ikan cá đuối atah 3 mét 9 saong trak 300 kg di kraong Mê-kông labik huyện Siem Bok, tỉnh Stung Treng. Hadei di tuk hu ghi hình, dom urang roh duah dunya hu pagam sa pandap tui iek tagok drei ikan nan saong palao nyu trun veik kraong. Sa urang roh duah brei thau, drei ikan ini, lac ikan ia taba praong abih di dunya. Kraong Mê-kông urak ini hu labaih 1.000 jnaih ikan daok diuk dalam kraong./.

 Urang lang: M. Phuong & Bhumi – 21/06