Dom Phó Thủ tướng saong dom Akaok Mintri gam hu mbaok tame javap jaloi

Harei ini, di Hà Nội, Ủy ban Thường vụ (TVQH) Quốc hội ginum biai mbang peih mbaok. Bruk njauk caik hatai nan lac di mbang ginum biai ini, Ủy ban TVQH meda peih bruk sua tangi saong javap jaloi. Nyaom bruk ka 1 hu Ủy ban TVQH sua tangi dom bruk di Mintri Công an. Bruk javap jaloi lac di Akaok Mintri Công an Tô Lâm. Kadha ndom ka bruk khik ramik Kanja ka bruk an ninh mạng; Langyah dom bruk pacang caga, langyah dom urang ngak suan di công nghệ gtlaong, abih di nyu nan lac bruk main mbia, pachot pagait, ba khau tin oh njauk. Nyaom bruk ka 2 lac kayua akaok Mintri Ilamo thể thao saong du lịch Nguyễn Văn Hùng javap jaloi. Asal kadha pataom tame bruk peih ngak dom sarak, hukum piah ka du lịch lac sa gah kinh tế praong. Di mbang sua tangi, dom Phó Thủ tướng saong dom Akaok Mintri gam hu mbaok tame javap jaloi dom panuac sua tangi, langyah dom bruk hu pambuak tal 2 gah ini.

Dalam 2 harei lac harei 10 saong harei 11/8 di tỉnh Bạc Liêu hu peih Harei pataom urang nong pakacah gauk pakat negar mbang ka 5, hu mbaok di 16 tỉnh, ban di bhum 4 là: TP.HCM, Bình Dương, Tây Ninh, Long An, Tiền Giang, Bến Tre, Đồng Tháp, An Giang, Vĩnh Long, Cần Thơ, Kiên Giang, Trà Vinh, Hậu Giang, Sóc Trăng, Bạc Liêu, Cà Mau. Rilo binah pakacah chreih chrai hu peih tabiak di Harei pataom urang nong pajacah gauk mbang ini piah patagok ilamu gah chuyển đổi số dalam ngak nong, pabak hatai caong di urang ngak nong.

Tỉnh Đồng Nai urak ini hu 206 urang hu angan je lambaok ka jaik 198 ribau urang bangsa takik. Kayua yau nan ye, bruk paglaong bruk ngak di manuac urang hu angan je dalam bruk pathau khan, jak ba bhap bini ngak njauk dom sarak, jalan ngak di Đảng, sarak, hukum di Kanja, rik tame bruk cak rok patagok kinh tế, khik caga an ninh chính trị, trật tự salamat dalam rahra lac hu makna biak praong. Ong Nguyễn Sơn Hùng, Phó akaok UBND tỉnh ieu kakei Mban Bangsa gam haong dom tinh, ban oh caik rahtabiak bruk ngak suan, pambak tame sarak meng dom danak dak duh ka urang hu angan je; gam tui di nan jeng samar drah pok mayaom dom urang angan je hu dom bruk ngak biak naih…

Meng akaok thun tal ini, dalam tỉnh Tiền Giang hu 5 labik glut jaleih praong, atah abih tih jaik 700 mét, bgak kan kandah tal bruk nao mai, ngak mbang di bhap bini. Langiu di nan, dalam tỉnh daok hu rilo labik glut jaleih dahlau tal urak ini oh ka pasiam veik hu. Piah samar pasiam bruk ini, Tiền Giang hu pok panuac likau Rajaei haong dom Mintri, dom gah pasang iek, brei jien đầu tư công tukvak 2022-2025 piah daong ka tỉnh Tiền Giang pasiam labik glut jaleih.

Tukvak tapa bruk blei, pablei jao taneh daok, taneh ngak mbang dalam bhum mikva bangsa takik di tỉnh Bình Phước daok rah tabiak sarau kadhau, rahtabiak bruk pambak tame bruk oh hu ilamo di mikva piah pachot pagait pablei salih, jao taneh daok, taneh ngak mbang, pala drak. Bruk ini ngak kan kandah oh sit tal bruk kinh tế - xã hội, an ninh trật tự di pak ini. Kayua yau nan ye, UBND tỉnh Bình Phước hu ieu kakei dom sở, ban, gah, dom huyện, ban sit, patui veik peih dom bruk langyah di bruk khik ramik, pacang caga bruk pachot pagait padang taneh, pablei taneh di bhum mikva bangsa takik.

Liên minh Điện lực Cuba (UNE) brei thau, sang mac nhiệt điện praong abih di Cuba brei padeih kayua bruk khuah kho menyek di labik ngak kong Matanzas. UNE mboh lac sang mac nhiệt điện ini oh ka ngak bruk veik hu saong pambuak tame jalan điện negar di tukvak tabung glaong. Tui kuhria mboh, hệ thống điện Cuba khat lahik jaik 1.192 megawat hadei di bruk ini. Pambuak tal bruk khuah kho menyek praong abih di Cuba, di labik ngak kong Matanzas bahrau hu sap patuh praong saong pui khuah glaong rilo mét. Dom gah daok hu mbaok di labik nan brei nduac tabiak truh labik nan. Urak ini oh ka hu panuac khan cambaih laoih ka bruk nan.

Mintri Quốc phòng Mỹ kuhria mboh lac labaih 80 ribau urang lin Nga njauk rambuac atau metai dalam mbang mesuh dui atah jaik 6 bilan tapa di Ucraina. Tui Mintri Quốc phòng Mỹ, yaom lac njauk khat lahik biak praong yau nan, min Nga jeng oh meda mek hu dom bruk ba tabiak dahlau di nan lac salih rajaei di Kiev saong ngak brei Ucraina jeng taneh ia oh daok độc lập saong quyen ngak po.

Jabat pacang caga saong pasang iek jit dịch COVID-19 di tỉnh Hải Nam (Trung Quốc) hu ieu pataom labaih 8.500 urang meng 18 tỉnh mai tal tỉnh ini piah daong pacang mbang tamuh jit bahrau di pak ini. Tal urak ini, Hải Nam hu 1.042 urang njauk COVID-19 saong 465 urang oh hu triệu chứng kuhria meng harei 1/8. Karja tỉnh Hải Nam hu khan brei thau 250 bhum mbuan njom mbak glaong COVID-19saong 145 labik mbuan njaom mbak mbiah./.

 Urang lang: Thu Thao & M. Phuong – 09/08