Harei ini, mbang nyaom ka 3, Quốc hội mbang ka XV tamat var ginum biai. Dalam nan var mesup, Quốc hội meda yar tangin brei tapa dom sarak hu makna praong, yau ye Sarak ngak iek bruk ngak, pato tacei bruk ngak, pato pakai bruk ngak ka dom urang guk langiu sang guk; Sarak ka bruk ngak iek dom sarak karei cak rok patagok tỉnh Khánh Hòa; Sarak ka bruk buh jien tame danak dak jalan Vành đai 4 bhum ban ine Hà Nội; Sarak ka bruk buh jien tame ngak jalan Vành đai 3 ban raya Hồ Chí Minh, danak dak padang ngak jalan radaih cao tốc Biên Hòa - Vũng Tàu (tukvak 1) saong danak dak padang ngak danak dak jalan radaih cao tốc Châu Đốc - Cần Thơ - Sóc Trăng (tukvak 1)...Dom urang QH meda yar tangin brei tapa Hukum pasiam veik, pabak dom paka di Hukum Sở hữu trí tuệ saong Hukum Pablei salih bảo hiểm (pasiam veik). Bier harei Quốc hội peih mbang tamat. Rayo sap ndem VN meda papar sap tapak mbang Tamat di Quốc hội.

Công an TPHCM bahrau  peih  bruk brei 100 urang jakar, urang lin bac tamat đại học công an chính quy mai ngak bruk daong pabak ka  công an xã di dom huyện Hóc Môn, Củ Chi, Nhà Bè, Cần Giờ, Bình Chánh. Thiếu tướng Lê Hồng Nam, Yam ndok Công an TPHCM brei thau, meng bilan 1 tal bilan 5-2022, công an pakat  xã hu taduan 3.874  mbang khan brei thau ka kol duas ngak suan adat hukum. Cong An ban raya  hu langyah  3.482 panuac khan. Tui kuhria dalam tuk vak anak tal, bruk ngak suan adat hukum daok rah tabiak srau kadau, nan ye bruk brei urang jakar, urang lin  chính quy mai dom  xã lac biak njauk biak lagaih.

UBND tỉnh Sóc Trăng bahrau mbaoh tangin brei ngak danak dak cak rok patagok bruk ngak nong hữu cơ tukvak 2022 tal 2025, saong pamaong tal thun 2030 ngan haong abih tih yaom jien tui kuhria lac labaih 60 tỷ đồng. Tui nan piah ngak nong khang kajap, lagaih haong langik tasik. Dalam nan kham marat peih praong mblang taneh ngak hữu cơ hu labaih 400 ha. Yaom pandap panda di labaih 1 ha taneh pala drak hữu cơ hu pok brei angan glaong jang meng 1,5  tal 1,8 mbang dut saong bruk ngak oh hữu cơ.

Chi cục pala drak song khik ramik  janih phun pala tỉnh Bến Tre dok pambuak song urang nong, kapul pambuak bruk, HTX song  doanh nghiệp pablei tabiak negar langiu kruac bung klik hajao piah peih ngak, tacei pato bruk  cấp mã vùng” bhum pala, pambuan palagaih ka doanh nghiệp pablei tapa  Mỹ song dom taneh ia châu Âu, Trung Quốc. Kruac bung klik hajao  lac janih boh kayau ka  7 di taneh ia tame drak pasa  Hoa Kỳ. Urak ni, boh kayau that di  Việt Nam pablei tapa  Hoa Kỳ hu ba mai  pok jien labaih 20 triệu USD yaok thun.

Viện Pasteur Ban raya Hồ Chí Minh brei thau, dalam 1 bilan mai ini, dom urang ruak pandiak tabiak darah di dom tỉnh gah maraong daok tagok samar. Min, rilo tinh, ban daok kurang jru pametai jamaok saong jru taong ruak. Kayua yau nan ye, Viện Pasteur ban raya Hồ Chí Minh likau Mintri Y tế hu jalan daong samar drah ka dom tinh, ban daok kurang jru pametai jamaok.

Akaok mintri  Quốc phòng dom taneh ia  NATO hu tabiak sarak dong rilo phao ndao  trak ka  Ucraina, yaom lac dak harei dak hu rilo panuac lac tal tuk dom taneh ia brei duah jalan ngoại giao piah padeih bruk mesruh gauk. Dalam tuk nan,  Mỹ jeng ndom lac daok dong ka  Ukraine sa pok jien  peih bruk quân sự patui di nan  hu yaom  1 tỷ đô-la Mỹ, dalam nan hu rilo janih phao jang yau tên lửa chống hạm.

Trung Quốc daok tabiak panuac brei thau ka hajan khang saong ia sua di labaih 50 kraong di 2 tỉnh Phúc Kiến saong Quảng Tây daok tapa tanut báo động. Hu jaik 85.000 urang njauk paduan ba nao daok di labik karei kayua ia sua tagok glaong, takik di nyu hu 3 urang metai. Dom tinh, ban hu tabiak panuac “báo động đỏ” ka ia sua. Tui kuhria, gah Maraong saong gah Timun taneh ia ini daok gaok sa mbang hajan khang di harei ini saong harei paguh, gam haong hajan biak khang ngan haong ia hajan meng 100-180mm.

Dom cố vấn độc lập di Cục Khik ramik pandap mbang song jru tavoa Mỹ hu ba tabiak panuac ieu brei adat  pandar  vaccine Covid-19 di  Pfizer song  Moderna ka uranaih meng  6 bilan tal umo  5 thun.  Dalam nan,  Pfizer hu pandar bruk klauk  3 mbang  ka uranaih  meng  6 bilan tal umo  4 thun, Moderna hu brei 2 mbang klauk  ka umo  6 bilan tal 5 thun. Mỹ urak ni, dok hu jiak  20 triệu uranaih meng  6 bilan tal  5 thun song ni lac umo puac di abih dok cang  piah hu klauk  pacang Covid-19 di taneh ia ni ./.

Urang lang: Thu Thảo & H.Pha – 16/02/2022