Harei ini (31/10), TPHCM brei pandar sarak kuhria yaom taneh birau piah kuhria dom jien padai pambuak tal taneh riya yau jien pandar taneh, jien je kuhria tui jien mek tame di yaok urang. Sarak yaom taneh hu brei pandar tal abih thun 2025, trun labaih 20 -25% dut saong dự thảo camereip min daok tagok meng 4 tal 38 mbang dut saong yaom taneh dahlau diah, brei kuhria tui yaok labik taneh. Yaom nan piah kuhria jien bayar taneh, jien pandar taneh saong dom jien karei. Brei taong yaom biar jang darak pasar labaih 25-50%, yaom  taneh brei ramik pasiam veik piah njauk tui hukum cambaic laic ka dom bruk pablei salih jeng yau bruk kak jien je atau bayar jien taneh.

Bruk pamong tal di Danak dak patagok khang kajap phun thanh long di tỉnh Bình Thuận kham merat tal thun 2030, taneh pala phun thanh long dalam tỉnh labaih 25.000 hecta, brei paik baoh labaih 550.000 tấn; jien mek tame meng bruk pablei baoh thanh long tabiak negar langiu tui sarak tagok kuhria rah tapa labaih 5% sa thun. Piah patagok phun thanh long hu khang kajap, hu kien laba glong, Mban thuong vu Tinh uy Bình Thuan caong khin hu parilo bruk pambuak gauk ngak mbang, pambuak tui yaok bruk, abih di nyu nan lac pambuak bhap bini saong doanh nghiep, HTX, kapol nyaom  dalam bruk ngak tabiak, ngak tabiak, pablei pandap ngak meng thanh long.

Hu mbaok saong brei panuac di Nyaom roya dom Bangsa takik tỉnh Kiên Giang mbang ka 4 birau peih ngak, Thu truong, Pho Akok UB Bangsa Nông Thị Hà caong khin, tỉnh Kiên Giang njauk pakajap dom pakat chinh tri di bhum urang bangsa takik saong bhum ceik, abih di nyu lac dom xã taphia negar, xã bhum atah bayah, bhum biak kan kandah. Sangka tal bruk pato pasram, pabak ilamo, patagok urang jakar, abih di nyu lac urang jakar bangsa takik di labik. Tỉnh Kiên Giang kham merat tal thun 2029 jien mek tame kuhria rah tapa yaok urang bangsa takik sumu meteh kuhria tui jien mek tame di dalam tỉnh; trun baoh sang kathaot dsalam bhap bini takik daok ala 2%; camereip oh daok dom xã, puk palei biak kan kandah…

Palei Katuh - Tuấn Tú, xã An Hải, huyện Ninh Phước, tỉnh Ninh Thuận, urak ini hu 550 baoh sang urang bangsa Cam. Palei Katuh ngak pala 65 ha phun rabung tay jao saong 65 ha hamu padai pala 2 mbang dalam sa thun gam haong raong athur. Raidiuk mikva mbang ngui hu kaya meda, dalam palei daok 5 baoh sang kathaot. Hu jak jeng yau nan, njauk ndem tal bruk rik daong oh lac sit di Bí thư Chi bộ, Urang hu agan je Kiều Thị Khuê. Muk Kiều Thị Khuê tuk halei jeng kham merat jak ba urang jakar, urang đảng jum pataom dak padang palei Katuh tui tanut chuan palei pala birau kieu mau. Muk jak ba dom baoh sang halan hatian kaoh taneh brei peih praong jalan nao mai dalam mblang hamu, pagam gom truac hadah, padang ngak paga di labik mblang caoh mbanh, jalan palei piah hadah- hijao- hacih – mekre…

Tui kuhria mboh dahlau meng harei 2 - 4/11, bhum gah ala dom kraong bhum gah Pei Nam Bộ hu ia ndik biak glong di akaok bilan 10 tui saka ia Bulan. Dom balai ia Mỹ Thuận, Vĩnh Long saong Cần Thơ, ia ndik tagok glong pakat 3, meng 5 tal 15 cm. Di Gành Hào, Bạc Liêu ia tagok jiak tanut pakat 3. Kakei dahlau ia ndik di dom labik dhong dalam tapen kraong, abih di nyu lac di ban Cần Thơ saong tỉnh Vĩnh Long. Tui kuhria meng ini tal puac thun meda hu dom mbang ia ndik tuk ia Bulan 10 Pumi, bilan 11 saomng bilan 12 saka ia bulan.

Page harei 31/10 tui mon Viet Nam, Triều Tiên cuh ten lua đạn đạo tabiak tasik gah Đông bán đảo Triều Tiên. Bol lin Hàn Quốc daok langyah bruk cuh ten lua birau abih ini di Triều Tiên. Akok Hoi ndong Tham muu Pambuak Bol lin  Hàn Quốc mboh lac, ten lua bo Trieu Tien cuh tagok lac ten lua dan đao par atah hu cuh tagok glong. Jabat Tình báo Quốc phòng di Hàn Quốc hu khan brei thau  bruk Triều Tiên hu pagam labik cuh di dong di sa labik yau brei mboh bruk caga cuh veik ten lua tapa dom bhum taneh tuk peih bruk palih ruah Tổng thống Mỹ.

Negar Anh birau hu urang camereip njom ruak bien the đậu mùa khỉ angan Ib. Urang ini birau nao ma-in yulit tal dom taneh ia châu Phi hu ruak đậu mùa khỉ. Urang thau drei njom  ruak pak di London saong hu ba tame sa sang iek ruak chuyen khoa piah duk iek. Meng kaok thun tal ini, hu labaih 44.000 mbang urang njom ruak atau mbuan njom ruak đậu mùa khỉ di Châu Phi, hu labaih 1.000 mbang urang metai.

Tui gah Y te Dunya, ruak lao salih ka COVID-19 ngak metai manuac kayua ruak njom mbak di thun 2023. Thun 2023 hu labaih 8,2 trieu urang birau hu dut mboh ruak lao nan lac ralo abih kuhria meng thun 1995. Ruak lao daok mboh ralo di  bhap bini Đông Nam Á, Châu Phi saong Tây Thái Bình Dương…kuhria abih tih hu labaih meteh urang ruak lao di dunya.