Harei ini(3/6), Quốc hội yam tapa adit ngak bruk ka 3 di mbang nyaom ka 7. Mesup, Quốc hội pang dom harak pathau khan di: Akaok Mintri Ilamu The thao saong Du lịch Nguyễn Văn Hùng, hu Thủ tướng Rajaei ủy quyền brei puac harak pathau khan ka bruk padang ngak danak dak bruk ngak negar ka patagok ilamu tukvak 2025 - 2035. Chủ nhiệm UB Ilamu, pato megru di Quốc hội Nguyễn Đắc Vinh puac harak pathau khan pasang iek, taong yaom bruk buh jien padang ngak danak dak. Biar harei dom urang QH ginum biai di hội trường ka dự án Hukum Khik ramik, ba pandar phao ndao, pandap patuh saong pandap daong hỗ trợ (pasiam veik) saong dự án Hukum pasiam veik dom paka di Hukum Cảnh vệ.

Di tuk mai ravang saong ngak bruk di Quảng Bình, Thủ tướng Phạm Minh Chính haong kapul ngak bruk hu mai ravang saong alin hadiah pandap ka uraniah, urang jaoh jo di Pasak ngak bruk xã hội tỉnh Quảng Bình – labik daok raong 80 urang jaoh jo, uraniah hu thar vak biak kan kandah di dalam tỉnh. Ndom biai di Pasak, Thủ tướng caong khin dom uraniah, dom urang kan kandah daok di Pasak, oh padeih kham merat, khang hatai, yam tapa thar vak,, bui sambai jia tame raidiuk, kham merat pasram pahat, paglaong akaok sahneng saong prein yava, gam haong nan, pachreih ba dom urang hu thar vak kan kandah dreih yau nan yam tagok dalam raidiuk.

Jeng dalam harei 2/6, di TP Vũng Tàu, tỉnh Bà Rịa - Vũng Tàu, Mban Thanh niên Quân đội (Tổng Cục Chính trị quân đội - Bộ Quốc Phòng) pambuak bruk haong dom jabat, dom gah, karja palei,  peih bruk dam dara halan hatian bilan hè saong harei pataom anit ranam bhum taphai negar, tasik pulao dalam dam dara urang lin thun 2024. Di tuk peih bruk, Báo Người Lao Động hu alin hadiah 2.000 hala dok taneh ia meng danak dak “hadah mbaok mata hala daok taneh ia” brei ka Cục Chính trị Bộ đội Biên phòng piah payua veik ka urang taong ikan. Báo jeng hu payua alin 20 pok jien bac (yaok pok yaom 2 triệu đồng) brei ka dom anek saih bac da-a naih joi, yam tapa kan kandah, lac anek bhik di Biên phòng tỉnh Bà Rịa - Vũng Tàu saong 50 pok jien bac (yaok pok yaom 2 triệu đồng) brei ka dom anek saih, sinh viên sang kan kandah, bac da-a naih joi di dalam tỉnh.

Urak ini, tỉnh Đồng Tháp daok hu 2.524 sang kathaot, sang jaik si kathaot daok gaok kan kandah ka sang daok, caong hu padang sang bharau. Danak dak “palahik sang taik tahak” di dalam tỉnh Đồng Tháp ba tabiak bruk lac tal bilan 9/2025 hu ngak bharau 2.000 baoh sang brei ka dom sang kan kandah gah sang daok, pamaong tal palahik sang taik tahak di dalam tỉnh di thun 2029. UBMT negar VN tỉnh Đồng Tháp bahrau ba tabiak danak dak palahik sang taik tahak dalam tỉnh. Tapa nan taduan hu jien rik daong labaih 16 tỷ meteh meng dom kapul nyaom, doanh nghiệp, menuac urang daong brei Kadung jien daong ka urang kan kathaot.

Di Palei Ilamu – Dulich dom bangsa Viet Nam (Đồng Mô, Sơn Tây, Hà Nội) daok peih ngak dom bruk ilamo bilan 6 ngan haong kadha “ Ilamo baoh sang dom bangsa Viet Nam”. Bruk ngak bilan 6 hu  mbaok  di jaik 100 bhap bini mai meng 16 bangsa  saong bhap bini bangsa Giẻ Triêng tal tỉnh Kon Tum piah yaih khan dom ilamo biak gheih di bhap bini dom bangsa takik. Bruk ini peih ngak meng harei 1 tal harei 30/6.

Mintri ngak kong Indonesia brei thau, hu daong ka rahra blei radaih mac điện labaih 30 rabau sruh, meblah 60,1% bruk daong yaom ka 50 rabau radaih mac điện dalam kadung jien karja thun 2024. Tui danak dak daong brei, yaok urang meda hu trun yaom 7 triệu Rp (samu 435,36 USD) tuk blei sa sruh radaih mac điện.  Kuhria tal kreh bilan 5 năm 2024, abih tih dom radaih điện di Indonesia, lac radaih 2 kong, radaih 3 baoh, radaih pajeng tuai, radaih ngak mbang saong radaih buýt, hu tal 144.547 sruh.

Caga bruk peih ngak The van hoi Olympic 2024, tame bilan 1 meng blaoh, karja ban Paris hu khan brei thau kareoh pabah mbang dom  labik pablei salih di bein bingu Champs de Mars, dalam nan hu sang daoh tamia roi Xăng-đờ Mác (Champs de Mars) di Paris. Bruk ba tabiak nan  di karja ban Paris gaok oh lac takik bhap bini ban ine oh njauk hatai. Anak bruk oh njuak hatai di bhap bini, karja ban Paris brei klak bruk kareih pabah mbang sang daoh roi Champs de Mars. Salih tame nan, sang daoh roi Champs de Mars brei padeih peih pabah mbang ka urang tame maong iek meng harei 31/5 saong brei peih pabah mbang veik di bilan 10 thun ini.

Dom urang ilamu gah langik tasik mboh lac, sóng nhiệt jhak daok ngak kan kandah khang di bhum Nam Á. Makna lac mai meng biến đổi khí hậu daok rah tabiak di dunya. Bruk nan rah tabiak di adit blaoh tuk sa mbang pandiak di Pakistan saong Ấn Độ biak khang biak jhak. Nam Á lac labik daok di 1/5 menuac sia dunya. Bhum taneh ini jeng mbuan gaok kan kandah anak bruk langik tasik oh siam kayua biến đổi khí hậu ngak ka langik tasik biak jhak./.