Di var taom mbaok urang QH lac urang bangsa takik, halau janeng agama, gru pato hu mbaok Harei jum pataom taong abih bangsa (18/11) saong lac Harei Gru pato Viet Nam (20/11) peih tabiak di biar harei sup 14/11, Akok QH Vương Đình Huệ caong khin dom urang QH lac bangsa takik, nhân sĩ, trí thức, urang halau janeng agama saong gru pato kham merat hu mbaok tame bruk padang ngak brei salah dom hukum. Gam haong nan, dom urang lambaok njauk rik daong dak padang bruk pato megru Viet Nam salih birau, paglong ilamu, pato pakai urang ngak bruk, duah saong pabak ilamu ka urang padang ngak saong patagok taneh ia.

Đoàn Khối Jabat - Doanh nghiệp tỉnh Bến Tre pambuak bruk haong Kênh VOV giao thông, Sang iek ruak 30-4, Sang iek ruak Công an TPHCM, Phòng khám Đông Á bahrau peih bruk iek ruak, brei jru saong alin hadiah pandap ka urang kan kathaot, urang gaok kan kandah di xã Thạnh Phú Đông, huyện Giồng Trôm. Labaih 300 bhap bini hu dom y, bác sỹ iek ruak saong brei jru, alin pandap, abih tih kuhria tabiak yaom jien lac labaih 200 triệu đồng. Bruk ngak ini piah klah rabha kan kandah haong bhap bini kan kathaot, sang sarak karja daok di bhum atah bayah, piah ba bui sambai chreih chrai, pambuak pakajap talei jum pataom bol bala haong bhap bini.

Yaok pluh ribau bhap bini di ban Thuận An, tỉnh Bình Dương gaok kan kandah kayua jit COVID-19 mbiah tal ini jeng oh ka taduan hu jien daong tui Sarak 68 di Rajaei ngan haong yaom jien lac 136 tỷ đồng. Dom urang nan hu pasang iek blaoh hồ sơ  saong hu  tabiak dom harak brei bayar jien. Min kayua oh ka hu jien nan ye bruk bayar jien daok suai damuai. Yaok ribau urang di ban Dĩ An jeng oh hu daong tui Sarak 68 ngan haong jaik 164 tỷ đồng.

Piah pabak ka bruk caong pasram caluai ia, pacang caga mblung ia ka uranaih, meng thun 2019, tỉnh Tiền Giang hu buh tabiak meng kadung jien karja tỉnh labaih 23 tỷ đồng piah padang ngak mblang bein ia – sang uranaih. Bruk ini hu ngak salah meng akaok thun 2021, min jeng daok klaak saoh mbiah tal harei ini. Tui langyah di Tỉnh đoàn Tiền Giang, tỉnh đoàn daok pok tagok Sở Jien padai pasang iek tabiak yaom jien tame abah mbang ngan saong uranaih tuk tame labik ini. Tuk halei hu salah bruk tabiak yaom jien ini, mblang bein ia meng peih pabah mbang ngak bruk.

Jabat Cảnh sát pacang khuah, padam khuah saong daong urang gaok bala ( C.An tỉnh Ninh Thuận) brei padeih  ngak bruk ngan haong 4 labik peih karaoke kayua oh khik hu siam bruk pacang caga apui khuah, padam khuah. Dahlau di nan, bilan 8 thun 2022, gah chức năng brei padeih ngak bruk 4 labik nan nan kayua oh khik hu siam bruk pacang caga apui khuah, padam khuah tui hukum. Hadei di abih tukvak brei padeih, gah chức năng nao pasang iek  ye mboh dom labik nan  oh ka ngak ginup dom bruk ba tabiak  piah pacang khuah padam khuah; mbuan ba tal apui khuah patuh saong ngak khat lahik trak. Kayua yau nan ye, Công an tỉnh Ninh Thuận ba tabiak bruk brei dom labik nan padeih ngak. 

Adit pakat glaong Ginum biai pambuak bruk kinh tế châu Á-Thái Bình Dương (APEC) mbang ka 29 hu peih tabiak di ban ine Bangkok harei 14/11 saong dui atah tal harei 19/11. Dalam adit ini meda hu dom mbang ginum biai di dom urang ngak praong pakat glaong (SOM), ginum biai ka “Dom bruk pamaong tal di Bangkok” ngan saong bruk kinh tế Sinh học-Tuần hoàn-Xanh di taneh ia po sang Thái Lan; dom nyaom biai pakat akaok mintri, ginum biai rilo kadha, meng patagok samu gauk saong khang kajap tal đầu tư, pablei salih peih praong saong khang kajap…Ini lac mbang APEC camereip abih hu peih tabiak ngak tapak gilac veik kuhria meng di tuk jit praong COVID-19 tamuh tabiak di jhung thun 2019.

Bilai pasang iek pakat negar di Trung Quốc hu ba tabiak panuac kakei dahlau tanut sambo kanyik katam ka pandiak bhang tua riya, kayua rilo bhum dalam taneh ia ini daok kurang hajan. Meng harei 15 tal harei 17 bilan 11 anak tal, dom labik di bhum gah Tây Nam, gah Đông saong gah Meraong negar ini meda hu hajan mbiah tal praong. Yaom lac hajan meda daong patrun pandiak thu lagu min dom bhum gaok kan kandah jeng daok hu tacei pato jhul pakhang bruk pacang caga pandiak bhang saong daong caga dom bruk oh lagaih rah tabiak.

Menuac sia dunya hu 8 tỷ urang di harei ini (15/11) tui kuhria mboh dahlau di Liên Hợp Quốc. Bruk ini brei mboh chất lượng raidiuk jeng yau dom sarak iek glang prein yava hu bruk salih bahrau siam. Bruk patagok menuac sia trun khang kuhria meng labaih meteh abap tapa, meyah tukvak camereip di dom thun 60 di abap dahlau, bruk patagok menuac sia lac labaih 2% yaok thun, ye tui kuhria tal thun 2050, bruk patagok menuac sia tok daok 0,5%. Makna lac bruk menek, bruk ndih tapui di rilo taneh ia mangaok dunya dak harei dak trun. Tui nan, menuac sia dunya meda hu 8,5 tỷ menuac di thun 2030./.

Urang lang: Bhumi & M. Phương